《知足者貧亦樂》梁醒波 尹飛燕 附曲詞

作曲：龐秋華

收音機播出：（白：現在報告股票行情，大吉玻璃廠升十二元五角，佳利牛皮升十三元，非洲象牙升八元，成交踴躍，估計下午仍會上升。

生：哈哈，【不再相見】啲股票好似啲物價飛漲，轉眼之間已經開雙。我跟番碰著財路，心中興奮樂洋洋。哈哈，炒正股票令我歡暢，都算我精叻腦筋識想，怪不得有人話我係闊佬福相，想發達要醒目，呢個社會多花樣，一睺準有機會，看風使浬就有行，要舒服，要享受，有錢就乜都香，執輸咗，聽失敗，勢必慘痛下場。我知道啲股票定會高漲，所以我心中有嗮主張，去借幾千博十零萬，那怕欠下了一筆賬，（白：一個人行起運有條路嘅，真係笨，早知係咁，度多啲添充實下，容乜易唧，三兩個會合就發梗嘅，係唔係）

旦：【木偶寄情】恨我夫君偏見亦深，永不知足真過分，為了享福不顧現實，一心只盼轉運，佢待我雖則體貼萬分，每天歸家必慰問，但佢心底充滿欲望，渴望成富實太可憫，只怕他主意立壞亂胡混，應勸他不要羨慕學他人，白領階級不算下等，理應安心守責任，大眾相依相愛度活，縱是貧困亦覺興奮。

生：咳~~

旦：（白：咦！阿肥，乜今日咁早返呀？）

生：（白：霎戇！乜阿肥阿肥你都叫呀，大少都唔叫聲，咁混帳，下次不準，快啲同我掛好件衫，摞對拖鞋嚟我踢下）

旦：（白：嘩，，你食咗蒜頭咩你，咁大口氣）

生：（白：嘻嘻~，咪嘈！開冷氣，倒杯白蘭地嚟我，等我舒舒服服抖下腦筋先）

旦：（白：哼！你今日撞邪咩？）

生：（白：乜撞邪）

旦：（白：去邊度有冷氣開啊？邊度揾白蘭地啊？你估你係財神啊？）

生：（白：嘻嘻！好話喇！使乜講）【百鳥和鳴】財神，財神，而家我成為咗財神，唔準你諸多責問，唔準話肥人肥騰騰，一朝發達邊個唔震。

旦：你施威又作狀，到底有整乜鬼咁陳，聲聲話發達，氣焰神態望見真可憤。

生：你不必調查猛追問，精精地快啲巴結發達人，小心奉承有益大，包你今后腳嗯嗯添啵。

旦：（白：哼！發開口夢咩）

生：（白：乜發開口夢呀）

旦：（白：放暑假啦！啲仔女要交留位費啦！）

生：（白：我知，我知，我知，你同我定啦！呢啲咁嘅小意思，咪傷我腦筋）【禿頭中板】財運快亨通，不用再愁煩，事關我手頭，有好多股票，一日漲漲漲幾回，樣樣當頭喜，容乜易發達，好過中馬標。等佢升到最高峰，然后拋出都未遲，保證發大財，一定賺到笑，哈哈哈，得運一條龍，零舍心興奮，銀紙就到手，駛乜眼眉調。【花】呵呵呵，個陣乜都搞掂笑呵呵，唔駛成日耽憂心跳跳。

旦：哼！【長二王下句】睇你未富先驕，原來學人炒股票，呢種投機生意等似風卷落狂潮。

生：（白：你噏乜嘢呀）

旦：變化無窮，得失難預料。

生：（白：咪亂噏嘢）

旦：有人無端發達，

生：（白：係我啦）

旦：有人破產蕭條

生：（白：唏！大吉利是）

旦：你不過白領一名，買賣全不曉，正一盲從附會，可謂幼稚無聊。

生：（白：唏！你真係亂講無為）

旦：還仲得意忘形，真係可憐可笑。

生：（白：唏！你真係冇見識到極囉）【雙雙高】因乜你個頭腦，仲會咁古老㗎，呢種生意，正式厚利路，係人都知得道，你想坐冷氣車，抑或住洋房別墅，想買鉆石與珍珠，我都可以辦到，實行任你擺佈，有錢氣自豪。

旦：其實我心中從未有想到，貪快活，衣豐食足，一生美好，惟望兩餐溫暖，永不想作富豪。

生：你真正無識得，笨頭和笨腦，要快活要享福，必須趁機揾路數，為求達到一切，有錢方有用途，人無橫財難富，嘆下世界最高。

旦：名利看得重，勢必走錯路途。

生：（白：係！你都傻夾䝨，我點會走錯路啫，呢次我實發梗㗎）

旦：（白：哼！咁易發達，（生：乜唔易，）仲駛有人做工咩）

生：（白：你咪嘈，係處嘈生嗮，等我瞓足精神，朝日我將啲股票一拋出，賺到啲銀紙，同你寰游世界。）

收音機播出：（白：現在報告股票行情，大吉玻璃廠直線下降至一元五角，佳利牛皮跌至二元，非洲象牙跌至一元八角，估計下午仍會繼續下跌。股票行情報告完畢。）

生：【叫痛曲】哎吔，哎吔，弊囉！慘囉！驟聽消息不大妥，股票暴跌嚇死我，冚個身標冷汗，一聽廣播，心驚膽破，眼定定傻咗，弊囉！慘囉！累到仆街千錯萬錯，呢次就快破產囉，亂咁炒終惹禍，乜都汪嗮，貪心之過，確係大泡和。（白：死啦~呢筆錢我同我舅仔借，而家血本無歸，我點對得佢住呢？）弊囉，慘囉，蝕嗮資金，激壞我，搞到負債最衰我，立錯心，想發達，點知慘過一刀拮我，注定受災磨，（白：呢次真係雞毛鴨血喇，啲股票冚巴唥拋唔出全部死嗮火，冇命啦）

旦：（白：你又話消息靈通）

生：（白：係呀）

旦：（白：你又話有死黨通知）

生：（白：就係知人口面不知心，累得咁慘，唉，總之唔夠運係啦，有乜好講呢？）

旦：【中板】古語有明言，富貴由天定，寧向直中取，莫向曲中求，財來自有方。

生：（白：係，而家知錯，）

旦：唔駛咁踉忙，何必慕虛榮，何必貪享受。

生：（白：蠢呀，蠢呀）

旦：早要兒女成材，有道平安是福，知足貧亦樂，安份永無愁，但得天天相敘笑開顏，何須念念不忘求富有。

生：【二王下句】妻你一言驚醒，使我覺岸回頭，欠下舅仔個筆金錢，只有分期還夠，此后克勤克儉，不再妄想，奢求，我真係吽囉

旦：（白：好囉）你知錯尚可救，趁勢勒馬早回頭，從今休再盼享受，過份惹心憂。

生：（白：我知道囉）我知道罪深厚，踏錯路線枉營謀，從今不會再荒謬，盼望饒恕莫追究。

旦：不必多悔恨。

生：（白：係）

旦：只要虛心肯接受

生：（白：接受）

旦：毋忘前非依正路線走

生：你是我佳偶，又是我益友，恕我笨過一頭牛。

合：窮苦失意要忍受，我哋為快樂佳偶。哈哈哈！

【完】