《傻仔拜壽》梁醒波、林少芬 附曲詞

梁醒波，林少芬，尤聲普，李揚聲，周麗兒，雲展鵬，林鳳仙

三姐：【反線蔭華山】偷偷慨嘆，非因慨嘆稼穡艱，偷偷慨嘆，皆因夫婿，佢太懵得交關，好比凈曉得食飯，做嚇小生意亦不慣，想佢伶俐真正係難，佢做嘢雖則冇學偷懶，鬼咁笨，雞蛋都慌吹去揾塊石磧爛，周身顛肺包撞板，確真難辦、難辦，凡做親嘢的確冇一次話唔受彈，偷偷慨嘆，皆因夫婿佢太懵得交關。（白：而家都經已咁晏嘅喇，仲未見佢出來，唔知佢又匿埋響里便攪乜鬼，阿茂，阿茂啊！）

阿茂：（白：哦）

三姐：【禿頭反線龍飛鳳舞引子】嚟啦！

阿茂：嚟喇！

三姐：你成朝匿響里便作反咩？存心偷安態度懶閑。

阿茂：望三姐咪將我責難，我實在響里底瞓著眼咋！

三姐：你瞓到咁晏定然撞板，冇振作懶得太交關。

阿茂：你有教過我一切說話，我我永遠記得冇學懶囉

三姐：（白：嚇，瞓到咁晏仲話唔懶？嗱！你聽住喇，（茂應介）聽日係我阿爹生日，（茂應介）而家我就要送禮返屋企先，聽日你記得來同外父拜壽喇）

阿茂：（白：哦，得喇，咪住，你哋嗰條村好多屋嘅，我都唔知外父住喺邊間嚟，都唔記得囉）

三姐：（白：我已經整定咗一揸竹簽俾你，聽日你來到村口之后，由第一間屋起，每間屋門口插一枝，（茂應介）一直插到最后嗰枝（茂應介）你睇見門口有對大燈籠嗰間就係嘅喇。）

阿茂：（白：得啊，得啊，咪住，不過外父過樣又，又唔記得咪樣囉啵）

三姐：（白：著長衫有須嗰個就係你外你啦，你見倒佢之后，就話恭喜外父年年有今日，歲歲有今朝，知嗎？）

阿茂：（白：知喇）

三姐：（白：唏吔，你咁鬼遴迍，講一次俾我聽啦！）

阿茂：（白：嚇，唔信得人，又要我講，著長衫嘅，有須嘅嗰個，就係外父，嘻嘻，得喇啩三姐係嗎，我記得嗮喇哩）

三姐：（白：唔，咁就得喇，嗱，我行先喇）

阿茂：哦~！【剪剪花】遊遊逛，著件藍布舊長衫，大搖大擺真生猛，哎喲！到處遊遊逛，哎喲！一間屋插一枝竹簪，哎喲！見一間，插一間，實情有乜嘢難，哎喲！插咗呢一間，又插嗰一間，絕無艱難，哎喲！（白：嘩，唔得唔得，嘩，點解只腳痛痛哋呢喂）【反線戲水鴛鴦】唔多慣，對鞋太硬，著起真正難行，我驚將時間阻晏，急急腳快轉彎，攪到我幾乎躀，實在細小監硬嚟踭㖞，逼得對腳冤冤痛痛，真唔慣。（白：嘩，講講嚇，又肚餓，又腳痛，逐枝竹簪來插㖞，插到幾時插完唧，唔係喇，不如打孖來插，咁唔係快快趣趣插嗮佢囉呵，仲話我呆佬㖞，嘻嘻嘻嘻，啊！冇錯喇，係呢間喇！門口掛住對大燈籠，係喇，呢度係喇！直入喇，啊，呢個有須嘅喇。（行入介）三姐都話有須嘅係外父喇，呢個梗係喇，嘻嘻，外父，外父，係喇！又唔記得喇，啊！記得恭喜外父，恭喜你年年有今日，歲歲有今朝。）

老者：（白：嚇，你話乜嘢話？豈有此理，我掌過你把咀）
阿茂：（白：哎吔吔吔，做乜嘢我來同你拜壽，你做乜嘢要打起我嚟啊）

老者：（白：抵打）

阿茂：（白：仲話抵打）

老者：【白欖】你傻得太過交關，蠢得太過凄慘，人家在開緊喪，你當人家係生日辦，明明掛起對藍燈籠，點解你唔帶眼呢）

阿茂：【白欖】係咁就撞大板，錯到無得扳，老伯你一定係見識多，食監多過我食飯，唔該你教教我，要點講至啱）

老者：【白欖】你應該勸人咪傷心，你話人死猶如合埋眼，老人歸老逝，死咗仲安閑，福壽得全歸，唔好偷偷喊，何況人死如燈滅，喊亦都唔喊返。（白：咁話啊）

阿茂：（白：哦~！原來要咁講至啱）

老者：（白：啊呆佬，你梗係想同我外父戴老爺拜壽定啦，係嘛）

阿茂：（白：唔記得乜老爺啦）

老者：（白：戴老爺，我怕你啦，我話俾你聽，一直行到去街尾，掛起對紅燈籠嗰間就係啦，知嘛？）

阿茂：（白：哦，唔該嗮！得閑請嚟坐下）

老者：（白：保你大囉）

阿茂：（白：嘩，街尾都好遠下，嘩！只腳又痛，到囉！係啦，唔會錯囉！門口掛對紅色燈籠，唔會錯喇！直入去得啦）

三姐：（白：阿茂，乜你咁遴迍，顧住躀親）

阿茂：（白：門檻高）

三姐：（白：咁遲至嚟，快同外父拜壽啦）

阿茂：（白：得啦，我曉啦！恭喜外父，賀喜外父）

戴父：（白：得啦，得啦，哈哈哈）

阿茂：【滾花】外父啊，你唔好咁傷心，你唔好偷偷喊，人死猶如合埋眼，老人歸老逝，死咗仲安閑，難得福壽全歸，休怨嘆，何況人死如燈滅，喊亦都喊唔返，外父啊，你死落陰曹，最好就去買鴨蛋。

戴父：【連環西皮】你顛得交關，懵得交關，滿口胡言，你呢份人傻得太慘！

阿茂：【沉花下句】嘩嘩嘩，做乜外父你忽然好似黑面玄壇。

三姐：（白：阿茂，點解你噏埋嗮啲咁嘅說話啊？到底邊個都你講嘅？）

阿茂：（白：係你教嘅㖞，指意你教嘅就蔽，頭先係個有須嘅伯伯教我，佢話咁講就啱）

三姐：（白：真係俾你激死我啦，等我教過你）

阿茂：（白：又教過）

三姐：（白：你一陣埋去同阿爹，樣樣都加個壽字咁就冇撞板啦，去啦）

阿茂：（白：哦！又要講過，樣樣都加個壽字係嘛！）

三姐：（白：好聲啲講啊）

阿茂：（白：你大早又唔講明又，得啦，咁好容易啫，嘻嘻！外父，我又同你拜過壽喇）【木魚】恭喜你福如東海，恭喜您壽比大南山。恭喜您食完壽桃，就湧起成嚿壽痰，｛各人反應｝嗰陣冤起嗰副壽容，仲突起雙壽眼，飲埋杯壽酒，壽命怕冇得扳，著起件壽衣，仲加埋副壽板，成個壽頭壽腦，一世俾人彈。

大姐、二姐：（白：啋！大吉利是，妹夫乜你咁講㗎，正一烏皮白皮！）

戴父：（怒白：呸！）【三腳櫈】你越講越糊涂，氣得我吹眼和碌髯，莫非你有心來混鬧，立意向我為難。

大姐：今日係阿爹嘅壽辰，喂！豈容你咁

二姐：（白：係啊）居然咁膽大，你把口都冇遮攔。

大姐夫：睇見你副尊容，當堂都要噴飯。

二姐夫：唔通你食懵咗，喉嚨塞住啖寒啖。（茂應介）

三姐：【花上句】夫啊，點解你做人做得咁癡呆，教極唔聽偏撞板。

二姐夫：（白：喂，襟兄啊！你睇嚇個傻佬，懵口懵面咁，喂，我哋夾埋撚化嚇佢都好啵）

大姐夫:（大姐、二姐同白：好啊），我哋唔俾酒佢飲，唔俾飯佢食，等佢流嚇口水至得，嚟！我哋飲杯！

阿茂：（白：我冇杯啵！）

大姐夫：【漁歌晚唱】大家干杯恭賀泰山，（白：飲，飲，飲）福與天高祿與星耀。

二姐夫：我上前奉美酒恭祝壽誕，痛飲一杯（白：飲）暢敘到通宵達旦。

大姐：人人暢飲，有個傻人恨到起痰

二姐：呢呢有個大只三，喉嚨有啖痰，週身笨相想話喊㖞

大姐夫：佢怨錯嚟食呢一餐，佢慘過罰坐監，慘過罰坐監，佢想吃白飯亦難辦。

二姐夫：一於少理，一於由佢，吃白飯，我哋大家嘆，大家嘆，猛笑一番。

大姐：人哋有人哋，我哋大眾真係嘆啵，猛笑一番。

大、二姐夫：嚟，嚟，嚟，大家干杯，恭贺泰山。

阿茂：（白：我冇杯！）

大、二姐：福與天高，壽與星燦（白：飲杯！）

三姐：（白：两位家姐，两位姐夫，）【长二王下句】何须諷刺语双關。夫婿癡呆多冒犯，還希恕諒你哋莫為難，分屬姻親休施白眼，幸毋挑撥，故意掀起波瀾，須知欺負愚庸，徒受世人齒冷。

阿茂：（白：蝦人，蝦人，蝦人哋！）

大姐：（白：阿三妹，我哋不過同妹夫開嚇玩笑啫，咁你又駛乜咁認真啊）

二姐：（白：係啊，駛乜咁認真啊）

阿茂：（喊嚷白：三姐，三姐，我好肚餓啊！）【醉頭陀】餓到手騰腳震好凄慘，餓到牙較都梗埋想話喊，（白：酒又唔俾飲，飯又唔俾飯我食，係唔係想餓死人啊，我唔制啊，我唔制啊！）

三姐：鬼叫你傻傻更更撞正板，教而未變令我心淡，（白：一日都係你自己唔爭氣，仲有乜好講啊）

阿茂：（白：外父，想餓死人啊）你哋咁黑心，要受彈，保佑你哋全家個個發雞盲。

二姐：（白：啋！大吉利是！）

大姐：（白：正一好噏噏唔噏，快啲吐口水講過啊）

阿茂：你哋眼坦坦，我就笑開顏，鬼叫你咁衰抵你跌落潭。

戴父：（白：唏，真係豈有此理）【爽七字清中板下句】語無倫次確麻煩，擾亂壽堂真荒誕，目無尊長太冥頑，即速離開毋怠慢。（浪白：唏，真係越睇越眼冤，你倆個快啲扯啊！）

三姐：（浪白：爹，你唔趕我都扯囉！）嫁夫愚拙確為難，飽受欺凌徒怨嘆，多留此地更無顏。及早回家免遭白眼。（浪白：阿茂，我哋扯啦！）

阿茂：（浪白：扯，扯，扯，我而家餓到腳都軟埋，我唔會行啊，行唔郁啊）

三姐：（浪白：阿茂。你乖喇，我錫番你一啖，你聽我話啦嚇）

阿茂：（浪白：嘻嘻，你錫咗我又成個精神嘅喇，香香嘅唧，你錫過）咁就實行唔飲佢呢一餐，寧愿番歸炒冷飯，冇酒冇肉幾咁閑。【花】嘻嘻，只要三姐老婆錫我，我就開心，我阿茂做人都好頸硬。（白：外父，出，出年至嚟拜你喇）

戴父：（白：哼！躝啦！躝啦）

三姐：（白：走啦茂）

戴父：【嘆氣花下句】唉！千楝萬揀揀個傻女婿，真係越思越想越心煩。