《呆佬賀壽》梁醒波 白鳳英 關海山 附曲詞

小提琴：梁權  掌板：黃浩
琵琶：羅正庭  色士風：羅持光
結他：司徒紹  大阮：黃一鳴
桐簫：余  茂  揚琴：潘世倫
大胡：曾進濠  鈸：盧錦   鑼：陳德權
呆   佬——梁醒波  
呆佬妻——白鳳英
外    父——關海山
呆佬子——莫佩文


旦：【貴妃醉酒】
黛眉雙鎖困，嘆家貧，
（白：呆佬果人雖然呆呆哋啫，但係果人都係好好嘅）
（續唱）
夫婿戇直人呆笨，只怨命運空悲憤，爹媽輕信媒人誤結盟，今日時屆爹佢壽辰，應盡兒女本份。
（白：本來老父壽辰，理應與夫同返娘家拜壽嘅，唉！惟是家道貧窮，少不免要張羅賀禮囉，所謂人情緊過債，不如叫佢出來想下辦法至得，呆佬，呆佬）
生：（白：嚟啦！嚟啦！）
【滿場飛】
我唔算笨食飽瞓，佢一叫我連隨就起身，佢定有因，要快去叩見嬌妻大人。
（白：乜嘢啊？）
旦：（接唱）
無掛慮只顧食飽瞓，家計從來未上過心，今天係阿爹慶壽誔，要賀金爹爹嘅壽辰，
生：（接唱）
嘩！真真開心
旦：（接唱）
你因乜開心啫
生：（接唱）
因為有得飲囉
旦：（接唱）
真令我擝嘅
生：（接唱）
我問句嬌妻乜事得擝啫
旦：（接唱）
知否禮物想買又無銀
生：（接唱）
哦~無禮物，點將外父氹又？
旦：（接唱）
手信全無未盡孝心
生：（接唱）
你欲孝親，等我諗
旦：（接唱）
等你諗，恐怕蚊都瞓
生：（白：等我諗啦）
旦：（白：諗乜鬼啊你）
生：（白：揾啲咩做手信好呢？）
旦：【花下句】
日上中天時正午
生：（白：係啊，晏㗎啦）
旦：（接唱）
張羅無計，怎成行？
（白：想下辦法啦呆佬）
生：（白：咪嘈啦，諗緊，啊~有辦法啦）
旦：（白：有辦法？）
生：【花高句】
我阿爹尋夜去捉田雞，
旦：（白：捉田雞關咩事呀？）
生：（白：捉咗好多蛤乸，田雞，即系蛤乸）
（續唱）
佢足足捉咗成籮，呢啲就可以做現成嘅禮品，係嘛
旦：（白：係啵！所謂物輕情意重，呢會又俾你叻翻一次啦，呆佬）
生：（白：次次都係咁叻㗎啦）
旦：（白：贊佢就爛得意，咁你就快啲換過件長衫，）
生：（白：換長衫）
旦：（白：挽住籠田雞，代表我去同阿爹拜壽啦）
生：（白：我而家即刻去，你唔去啊？）
旦：（白：我都係唔去囉）
生：（白：我一個人去點得㗎又，去啦）
旦：【中板下句】
自慚裙布荊釵，姐姐們珠光寶氣，我恐防失禮眾親朋，何況我豆寇胎含，來往道路崎嶇，足未出戶先倦困。
生：（接唱）
我叫句好嬌妻，我亦曉得憐香惜玉，當能代表你去賀生辰，一切都有我代勞，你即管在家休養金軀，
（白：弊，弊，弊）
【花】
弊在我無探咗外父成年，我又唔認佢間屋，你叫我如何尋揾。
旦：（白：我早知你遴迍啦，呆佬）
【花鼓芙蓉】
我畀定草紙多張，你不用多憂困，
（白：呢沓草紙，你記住一入巷每一間派一張，果間就係啦）
生：（白：收尾張就係啦）
旦：（接唱）
總之派完之后，便到你岳丈家內行
生：（白：咁我識囉）
旦：（白：識呢嘛）
生：（接唱）
我會緊記于心，草紙派完就唔在揾係嘛
（白：咁都唔記得咩，咁我而家去啦）
旦：（白：快啲去，快啲返呀）
（接唱）
佢雖然呆夾笨，但為人殊謹慎。
（白：等我返入去先）
生：（白：行起嚟唔係遠啊）
（提田雞一籠邊行邊唱【步步高】）
行行行，咄聲眨下眼入到叢林，漸覺人倦困，急到心又震，不若抖一陣然后再起行，今朝瞓因口渴不應太過飲水多，覺得腹痛陣陣，隨街將水放就冇得震
（白：唉哋，越講越急添，士可忍孰不可忍，趁冇人，快啲匿走入樹林放低佢先至得囉，舒服嗮）
（田雞呱呱叫）
（白：嚇，你又急呀，真係遴迍，大早出聲啦同埋一齊囉，好啦，放你出嚟，放你出嚟，去啦去啦，咪走唔切啦，嗱！搞掂就快啲翻嚟下，哎呀！你做乜跳嗮落塘啊？使乜咁衛生呢，又話要沖過涼㖞，快啲翻嚟，翻嚟！弊呀呢趟，阿崩叫狗，佢越叫越走，弊啦弊啦，呢次揾咩禮物同外父拜壽呢？惟有返去話俾老婆聽，呢次實聽鬧得囉！老婆）
旦：（白：呆佬，你咁快返嚟，阿爹冇叫你飲咩？）
生：（白：飲鬼飲馬咩，走到半路，人有三急，點知果籠田雞佢又話急，咁我又放佢出嚟一齊，松下啦，點知佢哋跳嗮落塘洗身啊）
旦：（白：今次真係俾你激死人囉）
【沉花下句】
唉吔吔，你可算是天下第一個呆人。
依稀記，尚有雞蛋一籮，勉強作為禮品。
（白：呆佬，呢次唔好咁撞板喇，快啲去啦！）
生：（提雞蛋一籮起【夜上海】）
我行復行，急步行，嬌妻不怪我呆人，呢次唔會笨，仲點會笨，畀啲田雞呃氹。（一才）點解急開好似又震，而家有個雷神肚內行！
（過序鼓聲）
偏偏絞肚痛難禁，唔通肚啲米田共，急於想到野外把花來淋！
（包才收掘有韻急口令）
急急復急急，想忍忍唔得，惟有入樹林，放入蛋一笠，唔得唔得，不如砸定舊大石頭，等你想走唔走得，呆佬好笨么，呢次萬中無一失。
（大開邊）
（白：嘩！松嗮松嗮，乜哋又係啊？睇你哋攪得幾遴迍，攪到成笠黃白物，邋遢夾污糟，想唔同你沖涼都唔得，得番個細半笠，都送畀外父做生日，行到入巷口，記住派完草紙即刻就直入，
旦：【花下句】
一自夫郎去后，轉眼便兩個時辰，雖禮物輕微，聊盡女兒孝行
丑：（沖頭工介起【連環西皮】）
好丑不分，好彩甩身，掃把摑頭，猛拍落嚟，頸都拍崩，
旦：【沉花下句】
唉吔吔，你所因何故，走到失魂
丑：（怨白：一日都係你啦老婆）
【爽二王】
你教我草紙派完，可以無須查問
旦：（序）
當然係唔駛問
丑：（曲）
我昂然直入，睇見廳內好多人
旦：（序）
賀客與共親朋。
丑：（曲）
有個著件白長衫，（一才）仲要我叩頭，跪稟
旦：（序）
當時你點跪稟
丑：（曲）
我祝佢年年有今日，歲歲有今辰
旦：（序）
一定恭喜錯死人
丑：（曲）
有對福壽燈籠，在門前掛緊
旦：（序）
入錯喪家唔駛問
丑：（曲）
啱啱派完草紙（一才）我唔記得我用去冇留心
旦：（序）
難怪畀人打一身
（曲）
你恭喜錯喪家（一才）只怨夫郎呆笨
（白：我真係畀你激死啦，好彩我擸擸埋仲有一兩銀，攞個利是封，封畀阿爹做利是，我怕咗你啦呆佬，最多我同你一齊去罷啦。）
丑：（白：一齊去就放心啰）
【平湖秋月】
行行行。我哋步過山崗轉入叢林，我又怕你心急個肚又淋，實行再急亦要忍，小心拖我大人
旦：（接唱）
待我沿途來奉告，你在人前毋懼震，記緊我父如問你，解答要溫文
丑：（接唱）
妻啊佢會如何問？一心驚怕問到詩書詞共賦，講錯笑壞人
旦：（接唱）
佢在人前盤問你，你要應對隨機表聰敏，想必爹爹會將你問，佢只牛牯是否聽教，天天幫你下種去耕耘？同時會問老爺與家姑佢，未見親宴飲賀筵前作嘉賓？
丑：（接唱）
還須求妻憐憫，先先教定我就會就冇駛驚，我惟有小心緊記夾留神
旦：（白）
呆佬，我教定你，如果亞爹第一句問你，你就話駛掛住只老畜牲，時時都拉佢去山前食草嘅，如果亞爹問你第二句，你就話佢日日去寺門同和尚捉棋，有時捉到夜仲係寺門同和尚瞓覺就得嘅喇！記唔記得啊？
丑：（白）
何止記得，記突添吖。我會喇，包冇撞板嘅老婆！好聲行老婆
外父：【鳳凰臺】
壽誕年年多遠親，婿共女聯群，回家賀我良辰，最令我關心一人，就係細女佢，太苦困，嫁著呆夫太不合襯，佢不識詩書禮，品性又呆笨，無大志，令人實覺擔心，此婚姻，鴛鴦點錯共結婚，只為盲婚多黑暗，莫非天注定緣份，令佢白捱苦半生，凄涼成永恨
（白）
男怕入錯行，女怕嫁錯郎，一日都佢亞媽誤信媒妁之言，又唔等我係外埠番嚟商量下，咁就嫁埋個女，好彩個細女并無埋怨，自甘食貧，女婿雖呆，但為人忠厚，今日佢夫妻歸寧拜壽，我要設法幫助佢哋解決困難，個心至覺得安樂嘅。
（快地錦，呆佬提雞蛋與呆佬妻仝上介）
旦：（白）
恭喜亞爹恭喜亞爹，松柏長青，身壯力健
外父：（白）
乖乖，起身啦細女
丑：（白）
我恭喜外父大人撲冚椿海 ，大脾南生
外父：（白）
喂！你講乜嘢啊賢婿？我呢排有多少撞聾，你講過
旦：（一才帶笑掩白）
爹亞爹，你講錯啦，呆佬話恭喜你福如東海，壽比南山㖞。
外父：（白）
咁都幾曉講說話吖，係喇賢婿啊
（禿頭起【春風得意】）
令尊為乜未來臨？
丑：（接唱）
請岳丈毋用掛，我天天帶住只老畜牲，去前山將草餵，時時喫草散步叢林。
（序）
外父：（浪里白）
嚇？乜當老竇係老畜牲㗎！
旦：（急白）
佢以為你問借畀佢只牛牯啊
（接唱）
佢為人呆又賢，答非所問，當你關心掛念只畜牲
外父：（接唱）
雖則問也非所答，佢認真有本心，有責任感唔係賢喇
（白）
三姐！
（續唱）
乜佢唔係照咁問㗎，其實我夠謹慎，不過丈人問到我心驚膽又震
外父：（接唱）
你哋同來賀壽辰，應該帶埋令壽堂駕臨舍下，親家休要當外人，我素來情重冇睇小人
丑：（接唱）
你要揾老襯，佢時常到寺門，佢鐘意捉棋到夜沉沉，仲陪埋和尚瞓到清晨
外父：（的的撐大怒白）
唉吔
【花下句】
你一片胡言真不孝，（一才）
居然將老竇當畜牲，我問馬咀你講牛頭（一才）
又話令壽堂捉棋捉到天光，陪和尚瞓
旦：（白）
點解，點解你會咁講？
丑：（驚震白）
你仲好講添，你教我㗎嘛！你真好帶揭喇
旦：（白）
亞爹，你聽我解釋啦
【花下句】
為免呆夫婿難應對，我將問題假設教郎君
丑：【花高句】
估話你問完只牛牯問爸爸（一才）
點知你令尊令堂，乜嘢堂乜嘢尊，搞到我胡胡混混
外父：（白）
你教㗎，都算你情有可原，無心之失啦！
旦：（白）
呆佬，不如你唱只壽歌同外父拜壽吖
外父：（白）
至緊要好意頭㗎 ！
丑：（白）
包好意頭嘅
【板眼】
我先賀喜，你買定副長生（一才）
外父：（白）
喂，乜叫我棺材啊？
丑：（白）
聽落去至得㗎！
（續唱）
將佢高高浪起，，千祈咪趁地淋
（白）
呢啲叫做上壽吖嘛
旦：（白）
係啵爹，凡有錢人家，預早買定柳州壽板，仲年年壽長，加多一片福州漆添啵。
外父：（白）
係？
丑：（續唱）
恭喜你日日出墟場，將藥材鋪幫襯（一才）
外父：（白）
又嚟啦！大吉利是！
丑：（續唱）
買多啲鹿耳鹿尾巴，與共長白野抄參。（一才）
旦：（白）
買啲嚟補身都好㗎爹
丑：（續唱）
保祐你福無重至（一才）
外父：（白）
講真的！
丑：（續唱）
今朝至（一才）
旦：（白）
好意頭啊
丑：（續唱）
禍不單行（一才）
外父：（白）
咩話！
丑：（續唱）
昨天行。（拉腔）
旦：（白）
亞爹，呆佬一心係善頌善討嘅，不過講嘢一橛橛啫
外父：（白）
咁你都呆者幾勻循嘅！
【長二王】
聽來一語一驚心（一才）
丑：（接唱）
自問并無揾笨（一才）
外父：（接唱）
初時激氣聽落笑吟吟
旦：（接唱）
夫婿愚呆幸有好品行
外父：（接唱）
今日呆人拜壽，壽歌聽過好開心，難得你有急才，我要跟查你學問。
丑：（白）
三姐，岳丈話要考文章啊，我唔得㗎
外父：（白）
放心啦！唔係考文章，我想出對聯你對，如果對得通夾工整嘅，我多分份身家畀你
旦：（白）
呆佬，咁即管試下啦
丑：（白）
即管試下啦
外父：（白）
咁你聽住喇！山狗上山，山巖逛住山狗腳，詠詠嗡嗡。
丑：（白）
呢次立起喇，仲話易過食菜
旦；（白）
呆佬，你聽住我講，你記唔得個朝你拉牛過水啊？
丑：（一才白）
係，聽住喇外父，水牛落水，水坑浸過水牛頭，哞哞爺爺。
旦：（白）
算唔算工整啊爹？
外父：（白）
工整就係工整，不過我睇佢撞彩嘅啫。
丑：（白）
乜撞彩啊？唔啱再出過對吖！
【花下句】
我雖無學問憑感觸，就算我一時撞彩都似層層
外父：【花高句】
若然呢次你對得通（一才）
我嘅家財有分一份。
（白）
你聽住喇！龍潭扒龍船，龍鬚癡住龍鬚糖，黐黐��
丑：（白）
呢回真係搞到一抽一能喇
旦：（白）
呆佬，你記唔記得我哋睇人跑馬仔啊？
丑：（白）
得咗，你聽住我對喇外父，馬路跑馬仔，馬蹄踩住馬蹄糕，滑滑潺潺
外父：（大喜白）
好嘢，抵分份身家畀你唔賢婿
丑：（白）
咁就多謝夾盛惠喇外父
旦：【花下句】
呆人自有呆福份，夫妻跪拜父恩深。
（開邊仝跪拜介）
忽覺得珠胎動（介）痛離支（介）
唉吔吔，莫非臨盆時近。（拉士字腔）
外父：（白）
乖女就快添丁喇賢婿，快啲扶佢入房啦
丑：（白）
忍住先，忍住啊（扶下介）
（大笛叫官叫介）
丑：（沖頭抱斗官上介）
外父：【三腳櫈下句】
你夫妻來拜壽，拜出三個人，是女抑或是男，忙將賢婿問
丑：（接唱）
去得祠堂分豬肉，今日雙喜已來臨
【花】
拜完外父大壽又添丁（一才）
蘇蝦彌月之期，我一定要請你飲
外父：【花下句】
乖女初為人母，應在娘家休養精神，拜完大壽又添孫（一才）
為著教養孫兒，將身家分多畀外孫一份
丑：（白）
多謝嗮喇外父，外父，而家我想出番對對你對啵，我出對頭，你對對尾啊，肚餓食飽飽
外父：（白）
好，等我去飲姜酌個日到交卷啦！
丑：（白）
得之至啦！唔怕你奸
【花下句】
今日丁財兩旺，我幫你招待嘉賓。