《拉郎配之戲官》文覺非 孔憲珠 附曲詞

縣官——孔憲珠董代——文覺非

縣官：（白：哎呀，乜四更㗎啦！唉！）鼓打四更天，更添人意亂，我係一個堂堂知縣，都枉有無上威權，深夜改扮民裝，替兒女拉郎成婚眷，派出那衙差李六，至今未見回旋，難道走遍錢塘，總無一個男人遇見。

衙差：（白：稟上大人，老爺，拉到一個啦）

縣官：（白：哦！等我睇下佢先，咦，咦，喂，乜呢個嘢上咗年紀啦啵）

衙差：（白：老爺，我問過佢，佢話佢廿、廿幾歲咋）

縣官：（白：乜廿幾歲咋？）

衙差：（白：生得老積啲啫）

縣官：（白：乜佢身世著得咁差㗎？）

衙差：（白：嚟種人至夠老實嘛）

縣官：（白：幾老實嘅）

衙差：（白：老實）

縣官：（白：好啦！）姑且算數，等我問下佢先，（白：喂，你~）

董代：（白：老爺，咩啦！）

縣官：（白：你等下先）若果我問佢有無妻室，佢一定不肯明言，好！等我抹角轉彎，先行試佢一兩遍先咋。喂！你三更半夜一支公想度去邊？

董代：（白：問我去邊度啊？）

縣官：（白：係囉，你去邊度）

董代：佢梗係慌我仲有下臺，唔得閑做佢呢一邊定囉。（白：須又剃我嘅，人又拉得我返嚟）我梗係賺埋你個封利市錢。（白：老爺）我現在得閑無事歸家轉囉。

縣官：（白：哦！你返屋企）咁你屋企仲有冇第二個人添呢？

董代：佢梗係想揾多一個人，然之后至夠體面定囉。（白：黑嘛嘛，去邊度揾啊，老爺）我從來單身一個混咗廿多年。

縣官：（白：乜話！你係單身漢）

董代：（白：係）

縣官：（白：所以呢，一試就試出佢有無老婆囉）【花】你家中父母是否兩全，將來至稟明高堂，首先我哋先相談妥善。

董代：（白：問我有無父母啊）

縣官：（白：係囉）

董代：乜佢越講越遠，講咗去個一邊，（白：請我返嚟吹嘀打啫，點會查家宅嘅？哦！）原來佢又係拉郎，我以為佢拉嘀打佬就算。（白：正話聽到佢叫聲佢大人，呢個梗係官喇，恃官仗勢，亂拉一通，好！撚化下你至得，我父母死嗮啦老爺）

縣官：（白：唓！乜老爺呀？）

董代：（白：我父母啊）

縣官：（白：你父母死嗮㗎啦！咁你父母有冇同你定下婚配）

董代：（白：我父母早死，點會同我成親得㗎？）

縣官：（白：咁就無嘢咁歡喜得過囉）

董代：（白：老爺，你聽到我雙親早死就歡天喜地，睇你都幾黑心啵）

縣官：（白：唔係）我把情由講白，你比我更歡喜無邊，我先嚟問你一聲，詩賦文章你懂得深定淺呢？

董代：（白：詩賦文章，哎呀，咪玩啦！大人啊，)我係董

縣官：（白：哦！得啦，得啦）你既然係懂，就同出孔孟之門，待我即出對聯，你要立即交卷。

董代：（白：叫我對對啊？）

縣官：（白：係呀，對對啊）

董代：（白：試下啦！）

縣官：（白：好！聽住啦！千里緣萬里緣，翁今有婿，呢個係對頭，你諗啦！）

董代：（白：叫我對對尾啊老爺，聽住啦老爺！五尺合六尺合，士不離工）

縣官：（白：好嘢啵！好嘢，好嘢！五尺合六尺合，佢就對千里緣萬里緣，數目字對返數目字，工整啊！士不離工，佢就對翁今有婿，士就係讀書佬，工就係打工仔，人物對返人物，妙極！哎呀~睇嚟呢個係才子嚟啵）【減字芙蓉】難得你才學廣，出口便成文。

董代：（白：過獎！過獎）

縣官：你一定讀盡萬卷書呢，所以就唔使諗。

董代：我讀過兩個月，識得八個音。

縣官：（白：咁就絕頂聰明，係呢）我仲想領教下你嘅詩才，請你即景吟來，賦下一首五言八韻。

董代：（白：叫我賦五言八韻啊？你問下我五音六律好過啦）

縣官：（白：我想欣賞下你的詩啦嘛）

董代：（白：咁你總唔想聽我下支笛）

縣官：（白：詩以言志）

董代：（白：我笛可謀生）

縣官：（白：你梗係好喜歡音樂定囉）

董代：（白：當然啦！我靠佢揾食呢）

縣官：（白：乜話，乜你靠佢揾食㗎，咁你做乜嘢㗎？）

董代：（白：我做嘀打佬囉）

縣官：（白：乜你做嘀打佬㗎，呢趟死人都得囉）

董代：（白：死人揾我都啱㗎老爺）

縣官：（白：大吉利市）成晚同你談論詞文，點知道你係做八音。【白欖】心火滾，你個正衰神，點解你唔講明，你自己係乜嘢身份呢？

董代：你幾時問過我，以乜嘢為生呢？

縣官：我問你讀過有幾年書嘛？

董代：我唔係話我識得八個音

縣官：你話乜都懂！

董代：我姓董梗係要同你講真。

縣官：（白：豈有此理，分明有意戲弄本官，人嚟！與我打）

董代：喂！喂！喂！大老爺，我并無胡言一遍，都係你自己聽唔真。你話我是否懂得詩書，我話董代不是笨人，講到個董字你就不容我再稟，你回頭又叫我，畀對對聯過我對，搞到我心亂紛紛，咁我就無可奈何，只有亂咁諗啦！

縣官：因何你又會識對對呢？

董代：果啲係我吹慣嘅曲文啊嘛

縣官：（白：乜話，果啲係曲文嚟，五尺合六尺合）

董代：（白：即係五尺合六尺合）

縣官：（白：你去死啦你）【花】畀你當堂氣到我眼瞪瞪，我怒沖沖，弊囉！天光將近，畀佢激到我跳跳，然得打佢一身，但係天色都快亮，仲未拉到第二個人，佢雖則係下賤之人，係低幾等，好過我女兒被選送去伴人君，好啦！移碪就船算你有福份，喂！同你做埋親戚，等你平步青雲。

董代：（白：好！等你跳下先得）【花】難得老爺帶挈，真係萬代沾恩。

縣官：（白：哦！咁就妥嗮囉）你快啲拜倒跟前，證明訂份係呢！

董代：（白：遵命！拜見舅父）

縣官：（白：唓！乜舅父啊）

董代:（白：你話同我做親戚嘛）

縣官：（白：我招你做女婿）

董代：（白：嚇，招我做女婿？你揾人做都啦你！）

縣官：（白：點解啊？）

董代：皆因我已結婚姻，夫妻倆義厚情深，窮也開心度日辰，我唔會貪心再娶有錢人。

縣官：（白：混帳！）分明有心瞞騙阻我時辰，人嚟打佢一身，以泄我心頭之恨。

董代：（白：老爺，我唔肯做你女婿，你做乜要打我啊？）

縣官：（白：你點解要瞞騙我？）

董代：（白：我冇瞞騙過你啊）

縣官：（白：仲話冇，我問你有冇父母）

董代：（白：我唔係話畀你聽我父母早死咩）

縣官：（白：我問你父母有冇同你訂下婚配，你又話冇）

董代：（白：我父母早死又點同我成親，我呢個老婆係我自己親手娶）

縣官：（白：衰人）實行要打你，以正風化人心，警戒愚頑睇佢下次仲敢唔敢。

董代：（白：下次仲拉我嚟）

縣官：（白：鬼拉你，打！）

旁白：（白：欽差大人到）

縣官：（白：弊囉，欽差大人發現只官船添，不知欽差大人駕到，有失遠迎，望祈恕罪啊）

欽差：（白：縣大人，選美期限已到，為何不在縣衙征集美女，乘坐官船到此何事？）

縣官：（白：大人你唔明白，刁民非常狡滑，有女到處躲藏，卑職親來搜索，昨晚搜到天光，依然兩手拍拍。）

董代：（白：老爺咁樣拉法，一世唔方發達，選美變咗拉郎，連我胡須都刮）

欽差：（白：咁樣係乜嘢一回事啊？）

董代：（白：大人聽我講白）朝中消息到呢處地方，宣布選美又貼咗張榜啦啵，嚇得滿城有女嘅聽見三魂喪，個個想嫁女，唔愿做皇娘，大老爺未有女婿，佢臨時就去拉郎，啱啱我正想回家堂，官差撞見就不愿放，截住我嚟要做女婿（白：拉拉扯扯，扯扯拉拉）拉我返家內，一支嘀打逼即刻我去拜堂，我唔肯制，佢唔肯放，講到我舌燥口焦干，佢還未肯退讓，我把情況都稟上。

欽差：（白：狗官，你好膽！）知法犯法罪難當，敢將選美皇令抗，有女不報去拉郎，限令今早如數選齊，把你女兒一同送上。

縣官：【沉花】哎吔吔，枉費心機捱眼瞓，結果女兒難免進宮墻。

董代：（白：哈哈哈，大人妙計安天下，賠了女兒又折兵囉）

【完】