《拉郎配之成親》文覺非 張玉珍 白超鴻 劉美卿 附曲詞

李 玉——白超鴻      董 代——文覺非

董大嫂——張玉珍   張彩鳳 ——劉美卿

李玉：恨只恨，逼我定婚姻。

董大嫂：你不能甩身，不甩身。

李玉：冤屈婚姻，冤屈婚姻，滿腔憤恨，我誓不依允。

董大嫂：秀才好心，不要變更，小姐貌美，大可對親。

李玉：任她好似月里嫦娥，我也不肯。

董大嫂：（白：唉吔，勸來勸去都勸唔聽，我揾王員外至同你講啦）

董代：（白：老婆，畀返個笛嘴我啦）

董大嫂：（白：哎吔，董代乜你嚟咗啦，睇你滿頭大汗，嗱！畀返個笛嘴你啦！準備拜堂啦）

董代：（白：喂，秀才答應啦？）

董大嫂：（白：唓！有話唔答應咩，佢整色水之嘛！你而家同佢傾下先，我通知王員外叫小姐梳妝，準備拜堂）

董代：（白：得啦！我會講掂佢啦，你唔使慌）

董大嫂：（白：咁我就去啵）

董代：（白：李秀才）

李玉：（白：董代哥）你何以到來？

董代：為將秀才你尋問，

李玉：有何要事？

董代：就為呢頭婚姻。

李玉：你無謂再談，

董代：你何須瞞隱。

李玉：（白：董代哥）【花】我并非情愿，他們逼我成親呀！怎能逃出王家，望你將吾指引。

董代：（白：好！今晚洞房，趁未拜堂，扒出西窗，跳過東墻，有人接應，不用慌忙，立即行事，包管無妨。）

李玉：（白：多謝董代哥）【花】就此拜別，依計而行。

董代：（白：一身輕嗮，你走我都走囉）

董大嫂：（白：李秀才，李秀才，哎吔，新郎哥失蹤添，立即話畀王員外知至得）

彩鳳:（白：居家有若驚弓鳥，女兒何罪似楚囚）

【斷腸花】

心中怨，昏君作孽禍及女流，深宮內恨滿胸，幾多好女子，青春誤了徒白首。想到父親幾天來痛苦不休，空致淚流怎消受，情懷誰為訴，解不開萬縷愁。

（白：邊個呀？嚇！你，你呢個賊子，好膽！）

【連環西皮】

真真披猖，真真披猖，觸犯姑娘，敢作跳墻，你來看槍。

李玉：【沉花】唉吔吔，我知書識禮，并未有立壞心腸。（白：姑娘，饒命呀）

彩鳳：（白：你係邊度嚟㗎？）

李玉：（白：我係隔壁王家跳過嚟㗎）

彩鳳：（白：嚇，你好大膽）【平湖秋月】原來你是個書生卻逾墻，半夜太披猖作小丑跳樑，有何用意你盡快講，不得欺騙巧舌如簧。（白：講！）

李玉：我求原諒，我求原諒，冒昧求生多苦況，歸家慰我慈幃望，怎知遭到被隔壁王家，夾硬拉郎，困在樓房定要婚配，央告幾番也被強逼不肯放。

彩鳳：婚姻，婚姻豈有這些波浪，難道王家竟有此勾當，抑或是你立意不良，我要查明真相，未許以虛作實，胡言亂推搪。

李玉：寒生寧敢狂妄，心中確實，確實有苦衷，求諒監，逼得深夜跳粉墻。

彩鳳：（白：好！饒你一次，起身啦！）

李玉：（白：多謝姑娘）
彩鳳：（白：嚇！樵樓二更，哎吔，我，我快要大禍臨頭囉）

李玉：（白：點解呢姑娘，點解呀？）

彩鳳：（白：相公）因為朝廷命官，昨天已到了錢塘，挑選美女進宮，消息傳來魂欲喪，可嘆我爹爹，心里更彷徨，痛難量，恐怕難逃劫運時，選中便遭殃，寧不腸斷心凄愴。

李玉：【二王】你父女橫遭禍降，我亦為你凄涼，愧我一介書生，未有助人力量。

彩鳳：相公你藏身有地，我總算為你幫忙。我今禍在燃眉，有誰為奴著想。

李玉：（白：這個嘛）【長句滾花】她情懇切，我暗思量，受人恩義豈能忘，她言中有意向我求倚仗，若果結成鳳侶，她就可免進宮墻。世間難得此好女兒，看她武藝高強，英姿颯爽。【減字芙蓉】姑娘無焦慮，我愿作幫忙，

彩鳳：深感公子恩，有何善法想呀？

李玉：只要我共你，（白：我共你）又怕語出太荒唐。

彩鳳：看他欲語又無言，似將婚事講，何不上前來問白，但愿有幸配才郎。

董代：（白：來到張教頭門口喇，里面有人傾緊偈啵，等我聽下至得）

彩鳳：（白：相公）【花】剛才你話到口唇邊，你又何妨直講。（白：相公，我~）

李玉：（白：姑娘，你點呀？）

彩鳳：（白：我~，唔知啦）

李玉：（白：咁~咁我都係唔知啦）

董代：（白：呵呵！佢又話唔知，佢又話唔知，冚巴唥我知！呵呵！好，開門！）

彩鳳：（白：邊個啊？）

董代：（白：我係你哋好街坊三嬸啊）

彩鳳：（白：嚇，三嬸啊！三嬸聽日至嚟啦）

董代：（白：聽日至嚟啊，你蘇州過后都冇艇搭啦！快啲開門啦！）

彩鳳：（白：哦！嚟啦！嚟啦！相公啊！有人嚟你躲埋先啦！三嬸！哼！原來系董大叔，又話畀我聽係亞三嬸咁，半夜三更畀你嚇壞人啊！）

董代：（白：點會嚇得你親啦，你從來都係有驚無險，如果我唔話係亞三嬸，我又驚你唔開門畀我呢）

彩鳳：（白：點會呢！董大叔，飲茶啦！）

董代：（白：哈~今夜杯茶唔同味啵，甜甜哋，好似新抱茶咁味）

彩鳳：（白：董大叔，你攞人便宜，哎呀~董大叔三更啦，你仲唔走）

董代：（白：唔走㗎啦！你阿爹約定我嚟，等到天光都要等到佢返嚟至得㗎）

彩鳳：（白：哎呀，急死人啦）

董代：（白：唔使急，嗱！等我唱支歌仔你聽下）

彩鳳：（白：唱歌啊？唔好唱，我眼瞓啊）

董代：（白：眼瞓？睇你眼仔碌碌，聽完我支歌，你眼瞓都無埋，聽嘢啦）三更鑼鼓響叮當，章家有位小姑娘，

彩鳳：（白：董大叔，乜你唱我啊）

董代：（白：你姓弓長果個張，我唱呢個係長尾章，咪嘈啦）佢說道夜深唔愿聽唱，偏偏又喜歡學西廂，因為佢生成幾似鶯鶯樣，獨惜佢缺少一位紅娘，曾記初更新月上，佢聲聲長嘆誤了時光，遞柬無人多失望，點知個張生獨自跳高墻（BOOM）

彩鳳：（白：唔知邊度有人跳墻咩？）

董代：（白：我話有人跳墻咩，不過我話個張生咁係樣跳墻之嘛！）

彩鳳：（白：唔好唱啦！我唔喜歡聽）

董代：（白：你唔喜歡聽，你聽頭唔聽尾啦啵，你嫁個老公想唔想到尾啊？）

彩鳳：（白：董大叔啊）

董代：話說佢倆個相逢生波浪，鶯鶯故意作驚慌，怪責個張生來白撞，聲聲話要拉佢去公堂。張生就把真情講，登時打動小姐心肝，大好姻緣從天降，倆人有意結鸞凰，但話到唇邊難以講啵，無媒無問怎磋商，忽然嚟咗一個董老漢，個張生狼狽糴咗入房。

彩鳳：（白：哎呀，董大叔，點解你走入我間房啊？）

董代：（白：我冇入你間房啦，我學張生之嘛）

彩鳳：（白：唔使你學，你都唱錯嗮）

董代：（白：點錯啊）

彩鳳：【花】西廂何來個董老漢，你分明信口雌黃。

董代：我唱嘅係董西廂，寫書果個人就係董老漢。

彩鳳：（白：董大叔，你亂咁唱嚟取笑我，話你聽啊，我要你賠償名譽㗎）

董代：（白：賠咩畀你都得，等一等啦嚇，李秀才）

李玉：（白：董代哥）

董代：（白：嗱！彩鳳，賠返個秀才畀你啦，查實一切擺佈都係我，何必咁心怯呢，咁你倆個都愿意呢嘛？）

彩鳳、李玉：（白：愿意！）

董代：（白：好！男家女家我包做妥，嘀嘀打打慶小登科，只要我支笛大聲嚟吹過，左鄰右里知道彩鳳你出嫁咗，就可以避免挑選去做宮娥啦嘛，拜堂，動樂！）

李玉：（白：董代哥）【花】既成婚禮已正名堂，我欲回家向慈母告知情況。

彩鳳：路上還未寧靜。相公要步步提防。

李玉：（白：小生自當謹慎，暫且告別）

彩鳳：（白：慢住！相公，）

李玉：（白：姑娘）

彩鳳：（白：你貴姓名啊？）

董代：（白：哈哈哈！做埋夫妻都唔知佢姓乜名乜㗎！哈哈哈）

【完】