《傻仔洞房》梁醒波 林少芬 附曲詞

生：

（白：我而家幾靚，幾威威，好似個菩薩咁㖞，）

【板眼】

睇我全身裝扮，十足個土地公公，原來娶老婆咁得意，真系零舍唔同，其實乜嘢叫做成親，我一概唔懂，又話人倫大禮，到底乜東東，今晚花燭洞房，我都唔知點樣洞，好似倒瀉咗籮蟹，真係亂嗮大籠。

（白：唉，點樣洞呢喂，真係嚇師傅囉，又未洞過，有啦！叻仔啦我！我諗到拎碌大竹昇入去，響地下昀咁棟，昀咁棟，墻又棟，柜又棟咁唔係得囉，嘻嘻嘻，老婆呀老婆，我而家嚟洞房啦我）

【南島風光】

我洞，洞，洞我亂咁洞，我洞，洞，洞我亂咁洞，亂咁亂咁樁，挺起心胸，出猛氣力，起勢咁洞，我猛洞猛洞

旦：（接唱）

你一派胡言，聽見就面紅，睇你份人真正係笨蟲，頭痛頭痛。

生：（接唱）

我洞房係最熟，唔係發噏瘋㗎真正會洞，你睇我幾威風。

旦：（接唱）

你蠢過只豬公，天生愚鈍似鼻涕蟲，睇見你頭痛，睇見你頭痛。

生：

（白：嚇！你見頭痛咩，我知啦，我知啦！你成晚嬲實果塊布係頭處，焗都焗到頭痛啦！唔怕我曉醫，我同你揭開佢，包你舒服，唔會痛，包你唔痛㗎啦！嘩，原來你咁靚㗎）

反線【葉落風聲】

好似豬乸咁靚，真巴閉囉，周身福氣快生豬仔，細望嬌妻確係幾威，零舍美麗，碌起雙眼仲夠威，難怪我越睇更越迷。

旦：反線【點秋香】

你失禮，失禮，動作輕挑態度曳，竟敢偷偷吻嬌妻膽大妄為。

生：（接唱）

尊聲嬌妻，請你莫怪夫婿，我居心非不軌。

旦：（接唱）

雖則夫妻，也不應該粗魯亂咁嚟，應該兩家相敬相尊，偕老在繡幃。

生：（學唱）

在繡幃

旦：

（白：你做咩學口學舌啫你）

生：

（白：你唔係講咩，係囉係囉，老婆你講得咁算你啱，我阿爹話都過，佢話我今晚成身木虱，千祈唔好乞米㗎啦）

旦：

（白：咩成身木虱，唔好乞米啊?)

生：

（白：係呀，我阿爹係咁話㗎）

旦：

（白：你阿爹係咁話？）

生：

（白：係呀）

旦：

（白：我明白啦，佢梗係話，你今晚成家立室，叫你千祈唔好失禮，係唔係啊？）

生：

（白：成家立室，成身木虱；唔好失禮，唔好乞米。係啦！係啦！你真係叻啫，俾你一估就俾你估中）

旦：

（白：咁你阿爹仲咩吩咐你添啊？）

生：

（白：仲有咩吩咐，好似仲有啲㗎，仲有啲㗎）

【賣雜貨】

佢吩咐朝朝伴只豬，至緊要韌皮，晚晚共嬌妻，好到生癡，倆家都有味，潮潮氣㖞，倆家都有味哎喲）

旦：

（白：我真係唔信，我估你啊爹佢一定唔係咁講嘅）

生：

（白：係就係啦！唔係咁講係點講唧）

旦：

（白：佢一定係話）

【賣雜貨】

佢吩咐你朝朝熟讀四書，至緊咪韌皮，晚晚共嬌妻相愛相依，倆家都有義，和和氣，倆家都有義哎喲

（白：佢係唔係咁講呢？）

生：

（白：唉吔，係囉，冚巴唥俾你估中嗮，係咁講嘅，越睇越靚個老婆）

旦：【長句滾花】上句

又可憐又心翳，今生嫁著個呆夫婿，睇佢傻頭傻腦，亂噏無謂，對住個咁嘅丈夫真難抵，有道是嫁雞隨雞，怨亦怨唔嚟，我要警醒佢愚蒙，惟有尋求善計。

生：

（白：咦！老婆，你又頭痛呀？又頭痛過？）

旦：

（白：唔係）

生：

（白：唔係？唔係？你耷低頭，諗緊嘢啊？諗緊嘢啊？）

旦：

（白：唔係！我睇你求先揸住支竹昇入嚟，起勢咁棟間房，真係又好嬲又好笑）

生：

（白：咁係抵你嬲呀，唔係嬲在阿爹成日噅我娶老婆囉，原來娶老婆咁多首尾嘅，又要洞房又要乜乜物物，又唔教人，教得唔三唔四，搞到我無嗮符，我自己諗出嚟㗎，幾叻馬，我唔係摞支大竹昇入嚟，亂咁洞囉，咁洞好唔好呀老婆？）

旦：

（白：唔係咁洞法㗎）

生：

（白：咁洞唔啱咩？）

旦：

（白：梗係唔啱啦）

【木魚】

花燭洞房乃是人倫禮

（生攝白：係囉教下我啦）

應該交杯合巹，比翼相棲，

（生攝白：又要有翼啊？）

魚水同歡恩情永系，共偕白首慶眉齊。

生：

（白：慘啦！你講咗一連串，成舊漏咁多，我都唔知你噏乜嘢添）

禿唱【長二王】下句

乜嘢叫做比翼相棲啫，乜嘢叫做恩情永系得㗎，乜嘢叫做交杯合巹，乜嘢叫做慶眉齊，乜嘢叫做魚水同歡，我都懵懵閉，唔該你解明解白，我最多樣樣做齊，你千祈咪將我難為。

旦：【曲】

我哋永遠不分開，咁就叫做恩情永系；

生：【序】

哦！咁就好似一孖鬼炸鬼之嘛。

旦：【曲】

飲過合歡美酒，做一對快活（生攝白：要飲酒㗎，慘啦！）夫妻，

生：【序】

咁就凄涼果個凄，

【曲】

事關飲酒慘過飲砒霜嘅，聽見就當堂閉翳。

旦：【序】

嗱！呢啲不過係循下例咋，

【曲】

你既然唔鐘意（生攝白：唔鐘意，唔鐘意）飲唔飲都絕無問題。

生：【雨打芭蕉】中段

咁樣嘅情形就易話為，爹爹教導之時，佢都完全未有提，原來一雙夫妻要學孖公仔。

旦：（接唱）

你年齡年齡唔係細，點解竟然懵懵閉，以后凡事咪亂嚟，咪癲癲廢廢。

生：

（白：老婆呀老婆，我又想，又想）

旦：

（白：你想乜唧）

生：

（白：我想錫啖面珠仔囉，嚟啦，嚟啦）

旦：

（白：咁大個人，咪剩係掛錫面珠仔得㗎，俾人睇見好丑㗎）

生：

（白：丑㗎，阿爹又教我咁樣做，真係）

【減字芙蓉】

佢話記得今晚洞房，至緊錫多幾啖面珠仔

旦：

（白：哦，咁你就聽嗮佢說話）

生：

（白：係囉）

（接唱）

最多當你係豬一樣，食共瞓與你一齊

旦：（白：我啋！點解你當我係豬唧你）

生：

因為我最愛果只肥豬，日日都陪佢傾下偈

（白：我咁大個仔最鐘意果只肥豬乸）

旦：

真係當堂俾佢激壞，正一混賬東西。

【花】

睇你做人傻得咁交關，試問如何同過世

（白：真係俾你激死我啦）

生：

（白：老婆，唔好嬲呀！唔敢唔敢，我揸耳仔認錯，你唔好嬲啦，你唔鐘意錫面珠，我以后唔錫係啦，唔錫啦唔錫啦）

旦：

（白：咁又唔使唔錫，如果你以后想錫面珠都得，不過我要有條件囉）

生：

（白：又要條要件，咩條咩件啫）

旦：

（白：梗係啦！嗱！從今晚起你要聽嗮我說話，做人要正正經經，咁你肯唔肯應承我啊？）

生：

（白：聽嗮你說話 ，要正正經經，咩叫正正經經？好似啲師姑和尚咁卟卟卟，念到求經關帝經咁，果啲經係唔係呀？）

旦：

（白：唔係果啲呀！你聽住啦）

【中板】下句

首先教你做人

生：【序】

實在點做人？

旦：（接唱）

應該循規蹈矩，切勿任性胡為，

生：【序】

唔會再胡為

旦：（接唱）

說話要當心

生：【序】

此后我會當心

旦：（接唱）

舉步要溫文，待人要彬彬有禮。

生：【序】

點樣叫做有禮得㗎？

旦：（接唱）

知否禽獸也通靈，做人安可無理性，盼君緊記莫忘遺

（生攝白：係囉係囉）

此后樣樣聽從我主張，千祈咪個心肝唔拉肺。

（白：記得嘛？）

生：

（白：好啦！好啦！以后我乜嘢都聽嗮老婆嘅說話，老婆叫我行就行，叫我企就企，老婆叫我坐就坐，老婆當係老竇一樣咁唔係得囉，係唔係）

旦：

（白：你咪個開口又老婆，埋口又老婆得㗎，你哋聽見會笑你㗎嘛）

生：

（白：唔係叫老婆，咁叫乜嘢至啱㗎？）

旦：

（白：你叫我做三姐啦）

生：

（白：三姐，三姐，又好，阿三姐，而家我好眼瞓，我出去覺覺豬囉，聽日至孖你傾偈啦！三姐老婆）

旦：

（白：喂！喂！你咪行住，你去邊度瞓啫）

生：

（白：同我啊媽媽覺豬）

旦：

（白：你真係傻到咁離嗮譜啫，咁大個仔，仲同阿媽瞓㗎咩）

生：

（白：唔同阿媽瞓，同邊個瞓，佢晚晚喛住我瞓，喛豬乖喛豬大咁喛我啵）

旦：

（白：由今晚起你就大個仔，以后都三姐喛你瞓）

生：（白：你曉喛我咩，爛叻）

旦：（白：梗係曉啦）

生：（白：你要喛抱實我咁喛豬乖咁啵）

旦：（白：係囉，抱實你喛囉）

生：（白：又好，又好，俾你喛下至得）

旦：（白：咁就乖啦）

【花】

知否今晚洞房夜，應該夫妻攜手入羅緯。

（白：埋嚟啦傻仔）

生：（白：又，又洞過房啊）