《拉郎配之搶笛》文覺非 張玉珍 附曲詞

董 代——文覺非     董大嫂——張玉珍

董代：（白：聖論錢塘縣境，征選美女八百，不論官民人等，不管肥瘦黑白，限令三日征齊，送交欽差選擇，唉吔，咁就攞命囉。）【花】錢塘少女，選嗮都唔夠八百名，此后仲邊處有人談婚嫁，我做吹嘀打呢行生意，咁就聽食泥沙。

張教頭：（白：董代！）（念白：董代呀，董代呀，正要揾你幫忙下，避過風頭走過罅，你答應我心頭就放下，喇嘎又喇嘎）

董代：（白：咦！張教頭，乜事啊？）

張教頭：（白：你個老婆做慣媒人，求你幫忙撮合，好等我個女趕快出嫁）

董代：（白：哦，老朋友，得，得，得，好易辦㗎啫）

張教頭：（白：一於拜托，就此回家。）

董代：（白：請呀，）

張教頭：（白：請）

董代：（白：弊啦！我嘅老婆今朝一早又被人掹去啦，唔知去邊度，叫我邊處揾佢至得㗎）

董大嫂：（白：董代）【梳妝臺】叫句我哋夫呀，呢次就發財，東村富家女，又揾我做媒，承接嘀打，照顧埋董代。

董代：我哋妻，我好辛苦，我為揾你去做媒。

董大嫂：（白：喂！喂！喂！你咪行住，聽我講先）

董代：（白：你咪講住，跟我行先啊！）

董大嫂：（白：你有乜嘢緊要啫？）

董代：（白：你又有乜嘢緊要啫？）

董大嫂：（白：你聽我講）

董代：（白：你聽我講）

董大嫂：（白：你聽我講）

董代：（白：唉吔，呢週時就慣嗮，好啦，咁你講先啦）

董大嫂：（白：聽呀）【快慢板】王員外，拉到李秀才，揾你吹嘀打，即時嫁女。

董代：（白：哦，咁就碰崩頭呢次）

董大嫂：（白：此話怎解呀？）

董代：（白：聽呀）張教頭，曾托我，請你為媒，替佢女兒，揾女婿，即成婚配。

董大嫂：（白：唓！財來自有方，就唔使咁踉忙，做完一單至一單，你同我吹咗呢一臺先啦）

董代：【七字清】喂，喂，喂，你咁唔分輕重，你就太不該，教頭本是我哋朋友輩，佢既然有煩悶，應替佢解開。【三字經】阿侄女佢生來，的確人可愛，更應系匹配，果個李秀才。【花】你立刻把李玉秀才帶到張家，免人哋焦急等待。

董大嫂：（白：唉吔，咁又點得㗎~）【水仙花】我做媒人豈有立亂來，怎可謀求個李秀才，佢半路被人拉咗去，已成親都不可再。

董代：張宣個女求配難，我早經擔帶為人解憂，若果咁都做唔妥，你點為媒。

董大嫂：【和尚思妻】媒我慣做媒，配也難合配，皆因婚嫁，日中有幾十臺，我四方去，我四方咁去，都難撮合一對，你拚之失信，就去把嘀打吹。

董代：我不去吹，我顧存信譽，應替張家解窘免受苦處，細想下果個秀才，定不愛王氏女，你實在太不該，你實在太不該，只顧王員外，實情你要順從我，將李玉拉過來。

董大嫂：【減字芙蓉】唓，咁樣拉翻轉頭，我個名字仲使愛㗎咩，此后仲有邊個嚟我做媒。

董代：我失信咗張教頭，人家就鬧我董代，有妻做媒人，唔肯替佢消災，義氣竟全無，行街撞面都無人睬。

董大嫂：【白欖】哼！唔睬有乜緊要，最怕無飯開唧，若果媒人做唔成，你嘅生意亦要等待。

董代：你一單都未做妥，我經已吹咗八臺喇，你咪凈係顧自己，你要顧下朋情在得嘎，若果咁都做唔妥，試問我個心點開呢，以后吹嘀打，你們咪揾我董代。

董大嫂：（白：咪行住！你當真不去？）

董代：（白：我果然不去）

董不嫂：（白：你果然不去？）

董代：（白：我當真不去）

董大嫂：（白：可怒呀）【快中板】分明推搪做唔來，阻礙時光難忍耐，必須做好趕下臺。【花】喂，你來來來~

董代：你來我唔來

董大嫂：為何你不來

董代：你叫我來做乜呀！

董大嫂：唉吔吔，你分明想摞彩。（白：好，搶咗佢枝笛至得）

董代：（白：弊啦！俾佢搶咗我個笛嘴添，老婆，畀返我笛嘴我啦，老婆。）【沉花】唉吔吔，我越叫佢越走，叫極都叫唔來。【蕩舟】叫唔掂，要更改，冇笛點去趕下臺，去員外家中自有主宰，問過李秀才，果真唔愿意，我替佢營謀跳出來。（白：我就走、走、走）

【完】