《交通燈》梁醒波 白鳳英 附曲詞

撰曲：羅寶生

交通燈——梁醒波  賈夫人——白鳳英

生：哈哈哈！我大名係交通燈，係人就揾佢笨，撞埋就當老襯，靠指更兼光棍，亂點紅點綠，熟嘅人都滾，在太平山下，我都算撈得掯。我排場似高等華人，長期住希爾頓，出入唔行坐HILIMAN，高等Ballroom{舞廳｝去腳震，今日頭段好新聞，闊婆游埠心興奮，用計淘古井，我愛色兼愛黃金，（白：行遲執輸飛車去見下佢先。）

侍應：（白：喂！鄧生，你揾邊位呀？）

生：（白：嚇！又係你啊？）

侍應：（白：係呀）

生：（白：喂！701號房，Mr’s賈{賈夫人｝，快啲）

侍應：（白：好，好，賈太）

旦：（白：嚇）

侍應：（白：有位鄧先生嚟拜候你）

旦：（白：哦，請佢入嚟啦）

侍應：（白：好，好，好，請鄧先生）

生：（白：Hello,｛你好｝）【錦城春】Madam{女士｝，我何幸今朝相會最榮幸。

旦：君你熱情待儂是誰人？

生：你夫婿舊時係我良朋呀！

旦：先生你認識我Husband｛丈夫｝

生：（係）大家好深交，小學共同窗，我亞Fat｛肥｝遠近聞名係姓鄧。

旦：心景仰Mr鄧｛鄧先生｝

生：我真失禮你褒獎甚，衷心敬仰敬仰Madam｛女士｝。

旦：你係肥仔鄧，人稱交通燈，我丈夫生前成日呻㗎啦！

生：（嚇？）

旦：佢話你夠思想有腦筋，身體夠壯計策超人。

生：我人最笨，我未算得掯，待人虔誠盡嗮心。

旦：合我心，有正義感，忠耿對待人。你何以獨來未見尊夫人？

生：唉！佳偶難求未結婚。

旦：你未結婚咩，我介紹你

生：介紹我？

旦：標準嘅美人

生：真真灰心。

旦：因乜灰心啫？

生：只為女人

旦：只為女人？

生：係近世啲“囡袋”只係拜金，風騷放蕩專好迷人，我人老實被啲“囡袋”氹，轉眼無情佢易變心，為女人傷心，激心，傾起女人都憤。

旦：（白：咁對唔住囉啵）

生：（白：呵呵，唔緊要）

旦：【走馬】我無心出語令你懷怒憤，我來道歉，衷心真抱憾。

生：（白：唔相干，）嫂嫂咪大發嬌嗔啦！

旦：皆因我係女人，你講得啲女人，直情係個壞人。

生：（白：唔係，）阿嫂你誤會太深。

旦：哼！你不應亂來罵女人。

生：愿來認錯，衷心之以后唔罵女人係啦！

旦：唔！其實你係只蠢豬兼夾笨，天下之間女人好多有品行。

生：承認我係最蠢豬做人最笨，我為了舊情人，傷神，多情人為了情字抱恨，佢另愛別人，枉我為佢相思太苦困。

旦：（白：哼，咁你就傻仔啦！）

生：（白：我傻？）

旦：【平湖秋月】咁嘅無情人，你仲為佢相思休記舊痕，你要另結新歡好夢另尋。

生：恨我情誤種入了心，一顆癡心要拋卻未能，我係情場情種，我係情壇情聖，我想到為情自殺，癡心真堪憫。

旦：婚姻要有緣和份，我夫妻難諧白發，情夢散心碎更斷魂。

生：呵呵~！你今次寰遊世界拋去哀感，盡去愁思心間悲憤，東方之珠，風景有好多美麗，我陪伴嫂渡海登山去，再返新界就會好精神，遺忘舊創痕抖返下，盡我衷心我安慰玉人，能令你開心嘅。

旦：哎吔！難得，

生：（白：唔緊要）

旦：逢君憐憫

生：（白：唔相干）開心到極，我伴個觀音，哈哈，一周處旅行，【秋水伊人】我哋同遊山頂，風光美景最動人，徘徊花蔭，野花香氣襲人，睇見雙雙鴛侶漫步行，令人羨煞心中興奮，可惜鸞鳳各自嘆孤單，天公作弄人。

旦：唉！天心太狠，孤影孓身有誰憫，寸心痛莫禁。

生：應該訪知心，安慰夕晨，韶華易逝人易老，青春不復再臨。

旦：不堪見春花秋月痕，堪悲兩鬢霜哪得知心？

生：你是個天仙女，生觀音，你有消息再嫁人，通街觀音兵甘拜石榴裙。

旦：（白：真係嘅？）

生：（白：珍珠都冇咁真）

旦：（白：你一言驚醒我添，係哩！快啲帶我去買嘢）

生：（白：得得得，）

旦：（白：送俾我班好朋友呀）

生：（白：嚇，乜你有好多朋友嘅咩？）

旦：（白：唔，牛皮大王個孫啦，火鉆專家個新抱啦啵，地產權威嘅承繼孫，呢班都係我麻雀友添㗎，一場遊埠無啲手信俾佢哋點得啫）

生：（白：哦！咁應該囉！去囉）

旦：（白：咪住！我啲旅行支票留享酒店，仲要返去攞㗎）

生：（白：唔使，唔使，我有支票簿，買完嘢我同你去新界逛一逛）

旦：（白：咁啊！好呀）

生：(白：去囉，去囉）【蕩舟】呢處遂道夠摩登，建筑巴閉殊動人

旦：都算款式新，不過并唔掯，外國尤動人

生：可惜無時間，可以寰球上旅行。

旦：【西皮】你尋歡不妨趁后生，你要好趁機會有我相陪和在你身近。

生：嚇，伴玉人我開嗮心，觀音體貼我做善財，乘機會去跟，富婆喜愛交通燈，問心實在榮幸，定有緣份，快些進行，遲啲就時候呡。

旦：無謂再傾，你應進行辦手續跟我一齊旅行。

生：（白：從命，從命。）【紅豆曲】我心興奮對佳人，今生也無憾。

旦：粉已裉脂又殘人亦老，心中有愧未能認佳人。

生：是佳人，是美人。

旦：是美人？

生：真風韻

旦：兼風韻

生：今世定難尋，但愿我一生對玉人，獻我情心共妹心相印。今晚不回家

旦：（白：唔，我行足一日，鬼咁倦，我而家要休息，你返去瞓啦！）

生：（白：你攰呀，攰就好易啫，好易，好易）【送君】我拿手松骨，拿手打揸骨，我同妹將骨揼。

旦：我唔多想松骨，唔多想揸骨，而家好想瞓。

生：（白：啱嗮）我愿伴妹你身跟。

旦：你要聽佳人命令

生：（白：知道，知道）

旦：明晨六點鐘到，兩家傾心啦！

生：（白：咁我享被梳化瞓到六點，唔係得囉）

旦：（白：哎喲，咁快就唔聽話㖞）

生：（白：聽！聽！聽！）

旦：（白：咁至乖仔㗎，抵錫你一啖）

生：（白：咁就錫囉！Good night打令{晚安｝）

旦：（白：Good night｛晚安｝)

生：（白：聽朝六點嚇，）

旦：（白：不準遲）

生：（白：有早冇遲）

旦：（白：又唔準早）

生：（白：咁，咁踏正六點係啦！）

旦：（白：係喇）

生：（白：嘻嘻嘻，六點，六點）

旦：（白：嘻嘻嘻，六點，六點）

生：（白：嘻，好喇，）而家正六點心興奮，成大功得到玉人。

侍應：（白：鄧先生早晨！）

生：（白：Morning，嚟，拎只牛去使啦！)

侍應：（白：多謝，多謝鄧先生呀，亞賈夫人有封信留返你啵）

生：（白：嚇，佢去邊呀？）

侍應：（白：今朝早五點起飛，走咗啦！）

生：（白：嚇！唔使自己嚇自己，佢最低限度都留返旅行支票俾我啲錢我嘅，好，等我拆開封信睇嚇咋，夫人素仰交通燈，哦！仰慕我，偷呃棍騙專害人，咦！咁嘅！誰知姑娘一出馬，哎吔，當堂損失十萬銀。哎吔！慘啦！慘啦！慘啦！而家我明白啦！佢話果個六點正，即係指天篤地。我有名係交通燈，仲俾佢點，點返我轉頭，我都點紅點綠，仲俾佢點到添。）呢次慘囉，死囉，遇啱光棍真傷心，交通燈偏碰災瘟，我俾佢迷惑太笨，清嗮倉十萬金，以后覺悟革身心，靠滾嘅人是滯運。

【曲終】