一起来说嘉兴话054 黄梅天

嘉1：“黄梅天”。每年额黄梅天，嘉兴宁才有点头痛，天天落雨，夷闷夷潮，覅讲乞额，衣裳、家生连墙头才要发霉，所以讲梅雨，嘉兴宁夷叫“霉雨”，发霉额霉。黄梅天勿是一天，是一段辰光。一般来讲，6月6号到15号格辰光“入梅”，7月8号到19号格辰光“出梅”，勿过伢勿一定，比方讲今年就是：

亲妈：舅公要回去哩，明明倷帮忙拿把伞，格天夷落雨哩

明明：哦，亲妈。……舅公，洋伞

舅公：谢谢，明明。今年黄梅天真式早，“芒种”呒没过就入梅，应该要算“早梅雨”哩，十几年碰着一次，今年格黄梅天要长哩

明明：舅公，今年黄梅天早叫早梅雨，格么有艾梅雨伐？

舅公：有额哦，有两年6月靠20号才入梅，格么就是迟梅雨哩。迟梅雨辰光短，勿过雷阵雨多。讲起来“阵头黄梅”容易发大水。

明明：黄梅天太讨厌哩，天天落雨，伢体育课才了室内，球伢勿好踢。

舅公：明明，黄梅天讨厌是讨厌，勿过呒没伢勿来三，要是空梅勿落雨，格年要旱灾，那倷喜欢乞格水蜜桃啊，葡萄啊才要呒没哩……

亲妈：就是讲，老天爷安排好额，多伢勿好少伢勿好，嗯奴顶怕么是“小暑一声雷，翻转做黄梅南”呶，那么到辰光晒霉伢来勿及

大爹：格两天雨一落，夜里厢还有点冷飕飕，好哩好哩，倷两个覅拖老舅公哩，走了半天伢呒么走……

普：“黄梅”在中国史籍中记载较多，如唐代柳宗元《梅雨》说：梅实迎时雨，苍茫值晚春。中国历书上一向有梅雨起始日、终止日的记载。其实黄梅雨是一种复杂的天气气候现象，相对正常梅雨而言，“早梅雨”、“迟梅雨”、“空梅”以及严重的“倒黄梅”，都属于异常梅雨。

嘉兴1：“黄梅时节家家雨，青草池塘处处蛙”，一起来说嘉兴话，“黄梅天”，倷会得讲哩伐？