广播专辑 弄堂茄山胡700 德大西菜个味道

冬天里吃“独角蟹”


文/费 平


“小姑娘，称两斤‘独角蟹’！”“啥？蟹？叔叔，搿搭勿卖蟹”……


有一趟辣屋里附近菜场卖豆芽个摊位浪向，一个十几岁小姑娘对我讲个“独角蟹”木知木觉，还以为我走错了摊位！“哈哈，每次侪是侬姆妈称拨我，今朝侬来看摊啦？”“我姆妈有事体走开了。”“噢！小姑娘，我买个是发芽豆，上海人就叫‘独角蟹’！”“嘿嘿，有意思。”


上海人称发芽豆“独角蟹”是从形状浪来看嗰。搿是用晒干个蚕豆放辣水里向浸泡后出芽，因只有一根芽，豆形又像螃蟹，所以起了个“本地人侪懂、外地人懵懂”个名字。


 我平常欢喜吃豆类食品，每年四五月份是蚕豆大量上市个季节，整个一季阿拉屋里侪要陪牢伊从上市吃到下市。农历二月以后，首批蚕豆“闪亮登场”，五六元一斤，有辰光要卖到十元一斤。搿辰光上市个蚕豆虽然嫩但交关青涩，卖相好看，内涵不足，想要尝鲜，买两斤也能炒出一小盘。之后蚕豆开始慢慢交多起来了，本地豆、外地豆、日本豆，品种勿少，价钿也便宜，最便宜个辰光五块洋钿可以买七斤。可惜到了搿辰光，虽然蚕豆颗粒饱满，但明显长得老了，炒了吃口感勿好，只好拿皮剥脱，或油氽或烧汤。部分作坊或工场会大量收购，晒干制作“发芽豆”。


 蚕豆落市以后，餐桌浪顶替伊地位个就是毛豆。毛豆可以吃到农历十月，再以后因是大棚里种植，加上价钿相对贵一点，买个人就少了。搿些辰光，我欢喜个“独角蟹”每天就“爬”上餐桌。冬天喝点小酒，最欢喜个下酒菜就是“独角蟹”，有菜没菜，“独角蟹”总归勿会少嗰。


 蚕豆又称胡豆，一年生或二年生草本，原产于西南亚和北非，相传由西汉张骞自西域引入。据说蚕豆里向勿但有比较多个维生素、蛋白质和碳水化合物，还有钙、锌、锰、磷脂等调节大脑和神经组织个重要成分，而且不含胆固醇，经常吃对身体有好处。


 眼门前冬季来临，搿家卖发芽豆个摊位是我常常光顾嗰，老板娘看到我就是一声“独角蟹”……辣我个影响下，妻子也老喜欢吃了。冬天早餐，一碗热腾腾个米粥，加上“独角蟹”炒“雪里蕻”咸菜，真是味道勿要太好。


 讲起来，也的确比较奇怪，“独角蟹”炒咸菜就是“绝配”，有辰光忘记买咸菜，光是发芽豆清炒，味道就是勿鲜，只有咸菜个“咸”与“酸”渗透进豆里，才会“鲜美无穷”。