广播专辑 弄堂茄山胡688 倒背如流个沈寂

倒背如流个沈寂  
  
周允中  
 


　　沈寂是老上海，最擅长写老上海背景个历史题材小说，无论是洋场大亨、电影明星、政界要员，还是各行各业个老百姓，辣辣伊笔下侪是活灵活现。


　　上世纪50年代初，沈寂从香港回沪，之后一直辣上海电影制片厂做编剧，国产科幻电影《珊瑚岛上的死光》个剧本就是伊编写嗰。后来伊写个连载小说《大亨》反映黄金荣辣旧上海个生涯，连载不到半月就好评如潮，由此伊个写作触角转到老上海领域。


　　最早介绍我和沈寂见面嗰是《世纪》杂志个编辑张鑫，因为沈寂个地址就是伊拨我嗰。当时，我爷老头子周楞伽个文坛回忆录《伤逝与谈往》刚由黑龙江人民出版社出版，沈寂个《大亨》也辣《新民晚报》连载。我冒昧前去拜访。


　　初次见面，讲起老底子个事体，伊头思煞煞清，我拿出迭本书后记，问伊，1943年我爷编个《万岁》杂志第五期，侬作为文艺习作发表个《路》是处女作口伐？伊讲，我最早辣辣那爷编个《文艺连丛》上发表过短篇小说《十一个》，是讲十一个上海女学生渡江北上准备参加新四军，结果辣辣青弋江惨遭日寇枪杀个故事，可以讲，那爷是我文学上个引路人之一。


　　有一趟，《上海滩》杂志社开座谈会，阿拉两个人再次见面，我讲起解放前编《小说月报》顾冷观个大囡儿顾晓悦辣美国波士顿大学教书，过一段辰光要来看伊，伊老高兴了，连讲：“欢迎，欢迎。”


　　后来，我跟顾晓悦，还有钟子芒个囡儿等人一道去拜访伊。谈兴蛮浓，天黑了，顾晓悦做东，辣沈寂家对面个饭店吃饭，问伊吃点啥，伊喉咙乓乓响：“红烧肉，胖嗰瘦嗰侪可以，勿要看我90岁了，我是一日勿可以呒没肉。”


　　搿天，老先生个话匣子被阿拉迭些小辈打开了，伊越讲越兴奋，还讲起小辰光调皮捣蛋个事体。有一次，老师布置课堂作业，要求背诵诸葛亮个《出师表》，伊背勿出来，被老师狠狠尅了一顿。伊光火了，勿买账，夜里钻进被头筒里，仍旧辣辣死记硬背。


　　第二天，老师又要伊背，伊勿慌勿忙提出，从头到底背勿稀奇，今朝弄点噱头被大家看看，从最后一个字倒背上去。同学听了侪摇头，心想：“侬浪头忒大，讲闲话不托下巴。”“吹牛皮！”有同学喊。


　　沈寂勿慌勿忙，用一口贼骨挺硬个宁波官话，一字一句倒背出来，一点勿错。老师跟同学听得目瞪口呆。有同学真心叹服，讲：“吃勿消，本事介大，犯规口来。”