广播专辑 弄堂茄山胡689 到天马山看斜塔

到天马山看斜塔


文/沈鸿鑫


 大家侪晓得意大利有一座比萨斜塔。比萨斜塔坐落辣海意大利北部海滨城市比萨，伊原本是比萨教堂建筑群个组成部分。斜塔高55米，平面为圆形，总共有八层，第八层是个钟亭，朝里面缩进。塔里向有螺旋形扶梯通到顶层。斜塔辣海公元1174年动工，因为设计者对塔基地质状况不大了解，建到第三层，就出现倾斜现象，勿得勿停工。几年以后又开始施工，到公元1350年建成。虽然建造过程当中采取了一眼补救措施，但建成后，塔顶中心点还是偏离垂直中心线2.1米。之后个几百年里，因为地基承载能力勿平衡，塔身朝南面倾斜个趋势越来越明显。


 传说公元1590年，出生辣比萨城个意大利物理学家伽利略，曾辣比萨斜塔浪做自由落体实验，拿两只重量勿一样个铅球从相同高度同时厾下去，结果两只铅球几乎同时落地，由此发现了自由落体定律。从此以后，搿座斜塔闻名世界，成为世界著名个旅游观光热点，吸引大批游客到搿搭旅游，为当地带来巨大个经济利益。为了防止搿座“钱途远大”个塔倒塌，意大利政府多次采取措施拯救宝塔，但是到20世纪末，塔顶中心点偏离垂直中心线个距离仍旧达到4.4米。


 其实中国也有勿少斜塔，我晓得辣阿拉江南地区嗰就有两座，一座是苏州虎丘山浪个虎丘塔，另外一座是上海松江天马山浪个护珠宝光塔，两座塔侪有千年历史。最近我忽然来了兴致，想去天马山看斜塔。先乘地铁9号线到佘山，再转乘松江67路公交车到天马山。公交车下来步行到一个小镇，穿过一条狭长热闹个小街，天马山就辣眼门前了。


 天马山也叫干山，据说是因为春秋吴国干将辣搿搭铸剑。后来因为山有南北两个山峰，山势形状有点像一匹马，所以叫伊天马山。虽然天马山是“松江九峰”当中个最高峰，但是海拔勿到一百米，山势勿算陡。等我一口气爬上北峰，就辣北峰右面看到一座宝塔。


 搿座护珠宝光塔七层八角，高约廿米，塔身向东南方向倾斜，而且角度勿小。碰巧有一个旅行团正辣游览，一个年纪勿大个女导游正辣介绍宝塔个历史，我正好旁听。听伊介绍，宝塔最早是北宋元丰二年（公元1079年）建造嗰，到南宋绍兴二十七年（公元1157年），宋高宗赵构赐五色舍利藏于塔内，之后宝塔旁边经常会有宝光显露，所以被称为护珠塔或护珠宝光塔。南宋淳祐五年（公元1245年）重修过一趟。到了清朝乾隆五十三年（公元1788年），护珠塔发生火灾，扶梯、楼板等木质结构全部烧光，只有砖砌个塔身留下来。


 后来有人辣砖缝里发现宋代元丰钱币，引来交关人拆砖寻宝，结果辣塔底挖出一只大窟窿，再加地基不稳，宝塔就一点点向东南方向倾斜了，到1982年勘查个辰光，发现塔顶中心点偏离垂直中心点2.27米，倾斜度超过6.86度，超过比萨斜塔个5.5度。搿座宝塔也就有了“天下第一斜塔”的称号。


 为了防止护珠宝光塔继续倾斜甚至倒塌，相关修缮工程随后启动。搿搭就勿能勿提徐文达师傅，伊是苏州香山木工世家出身，从小就学了一把好手艺。中国传统木工分为大作匠人和小作匠人，其中大作匠人造房子，小作匠人做家具。大作匠人里向个重要一系就是苏州香山匠人。徐文达参加过好几座古塔个修缮工程，创造了交关古建筑修复个新技术、新办法，比如：“锥状砌块”“借转技术”“六分木接头法”“巴竿技术”等等。为了实现“按现状加固”个目标，徐师傅用竹架撑扶塔体，每层腰檐用铁箍加固，再用8根钢筋从塔顶拉到塔基，用水泥固定辣石质地面浪，成功达成预期。


 听了介绍，我对搿座“第一斜塔”更加感兴趣了，拍了勿少照片。希望辣今后个岁月里，伊能继续保持“斜而勿倒”，长长久久存在下去。