广播专辑 弄堂茄山胡691 罚款单寄到屋里向

罚款单寄到屋里向  
  
　　文 / 杨荪敏
　　前几天辣小区门口，门卫老汤辣末生头喊牢我，讲公安局交管处寄给我一张违章罚款单。我一记头糊涂脱了，退休后我已经长远勿开车子了，哪能还会交通违法？打开信封一看，原来是处罚行人呒没按照信号标志过马路。就是穿红灯啦！罚款数目：廿块。


　　原来现在信息技术交关发达；行人勿看红绿灯穿马路，马上就会被电子警察拍下来。拍下来个人像面孔数据，到档案库里一比对，姓名、地址，全部煞辣势清。假使侬定规勿领盆、勿承认，葛末交警可以给侬看保留辣海个录像，说明几月几号几点钟、侬辣啥地方穿个红灯，一眼呒没还价。


　　我仔细一看，老汤弄错了一层楼，罚款单浪个名字也勿是我嗰。总算松了一口气。其实，有常时我看看呒没来往个车子，也真个穿过红灯。乃末提醒自家要当心点了。倒勿是肉痛钞票，总觉得因为搿种原因去交罚款实在坍台。再讲，上海个交通秩序，也确实要靠阿拉每个上海人自觉。