第115集：场景--误会（7） 演绎：麦+Mo+言

场景—误会（7）演绎：麦+mo+言
导演、编剧、剪辑、后期制作：麦麦
麦麦扮演：义工1、婆婆、CC
Mo 扮演：陈杰、阿聪
言 扮演：发哥
…………………
星期日上午11点，海珠区老人康体中心饭堂
义工1：陈杰，呢度差几份汤啊！
陈杰：哦，要几份啊？
义工1：“毕”3份嚟啊。仲有，拿两份水果啊
陈杰：好。
婆婆：唔该畀份饭我呀
陈杰：咦，婆婆，点解你自己落嚟拿嘅，我哋等阵会送上去你房间喔
婆婆：哎，我唔想喺房间食啊。每日都一个人对住四面墙
陈杰：婆婆，咁你等我一阵，我整埋呢几盒饭陪你一齐食呀
婆婆：好啊好啊
陈杰：嗱，婆婆，你拿住呢盒饭先，你坐去啯边等下我，我好快过嚟。
婆婆：哦，你快D嚟啊
发哥：喂，杰仔，过嚟帮手搬箱嘢去后院啊
陈杰：嚟啦。放喺边啊？
发哥：沓上去啯堆嘢度就得架啦。
陈杰：嗯。搞掂啦！仲有无咩要搬啊？
发哥：无啦。嘿，我同你讲声，头先嗰个婆婆系前几日先入嚟嘅，佢老伴走咗几年啦，独子长期喺外面混埋D唔三唔四嘅人，无钱就返屋企拿，有钱就连佢老豆姓咩都唔记得，最近仲学人吸毒添，畀拉咗去戒毒所。系婆婆住嘅啯边居委会申请婆婆过嚟我哋呢边嘅。如果你陪佢倾计，就千祈唔好讲起佢屋企人喔，知唔知啊。
陈杰：好，我知道啦。
发哥：系啦，杰仔，我见你个个礼拜都嚟呢度做义工。你唔使拍拖咩？
陈杰：呃…
发哥：如果你无女朋友，我有个外甥女唔错架，做医生架，上星期先嚟过我哋呢度义诊，好有爱心架。介绍你识呀不如。
陈杰：呃…唔使啦。
发哥：哎，交个朋友无妨呀。你哋后生仔女，一次生两次熟啦
陈杰：呃，发哥，我去派饭啦。
发哥：嗱，一于咁话啦，我阵间叫佢过嚟啦
…………………………………
星期日中午12：:15分，阿聪喺CC屋企
聪：喂，快D开门啊，好重啊D嘢！
C：哎，你搞咩啊？
聪：我买咗蟹子面同D馅料上嚟包云吞饺子啊
C：哇，萝卜、冬菇、猪肉、韭菜，粟米……你买咁多嘢上嚟，两个人食到几时啊！
聪：嘻嘻，包完其实都唔系好多架炸，食唔嗮咪放冰箱囖。可以做早餐啊
C：你唔可以直接买云吞面咩？点解要买生嘅馅料上嚟包呢！
聪：自己包干净卫生D吖嘛。馅料又可以沟多几样，无咁单一呀。
而且包云吞饺子几好玩呀
C：你自己慢慢玩
聪：喂，一齐包啊。我自己包到几时啊
C：唔理你啦，我去执嘢
聪：嘿，网上买啯D搬屋收纳袋，你收到没啊？
C：收到啦，我都执咗两袋啦。哎，搬屋真系好烦，好多垃杂嘢要执啊！
聪：梗系啦，你平时间屋就乱七八糟，又唔识分类喔。即食面同感冒药放埋一齐，洗衣机入面竟然有支唇膏！厨房洗手盆仲有三张纸巾！你点做女仔架！
C：哎呀，啯支唇膏我新买架！放咗入衫袋唔记得拿返出嚟阿，连埋件衫擗落洗衣机一齐洗啦。厨房卫生巾？哦，我系想拿去厕所架，咁啱有电话，讲完就唔记得啦。
聪：你只大头虾，上心D啦，咩都唔记得！
C：哎，好攰啊。唔执啦。如果我有钱，全部都唔要啦，重新买过呀！嘿，食得没啊，我好肚饿啦。
聪：又肚饿啦。你肚入面系咪生虫啊！
C：生你个头啊，我无食早餐啊，你上嚟前我先啱啱起床炸。
聪：我包咗十几只，咁我渌住呢D畀你食先囖。你等阵啦。
C：嘻嘻，唔该聪哥哥。
聪：（在厨房大声喊）喂，有无搞错啊，你屋企厨房入面咩调味料都无嘅！！
C：作死你咩，咁大声！咁我平时又唔煮饭，唔系食即食面就系叫外卖，要调味料嚟做咩喔。
聪：咁都唔至于连油、盐都无挂。哎，我落去买啦
C：唔使买啦，我都就快搬啦。不如我哋干脆落去食啦
聪：哈，剩低咁多馅料点算啊？
C：放喺冰箱先囖，等阵你走啯时拿返去啊
聪：哎，我包得咁辛苦。你一只都唔食啊！
C：食食食，听朝做早餐，将你包嘅全部食晒
聪：哼，算你啦。咁你想食咩啊？
C：我要食酸菜鱼。
聪：嗯。行啦。