第116集：场景--误会（8） 演绎：麦麦+momo

场景—误会（8）演绎：麦麦+momo
导演、编剧、剪辑、后期制作：麦麦
麦麦扮演：琪琪、豪仔、麦麦、伟妈
Mo 扮演：阿伟
星期日下午4:40分，豪仔同琪琪啱啱玩完“密室逃脱”出嚟，一齐坐地铁返琪琪屋企
琪琪：喂，你好犀利啊，海盗密码啯关咁难，你都解得开
豪仔：好简单姐。其实就系解三元二次方程式，用配方消元法，进行三元配方，令其中两个未知数为参数，对剩低嘅一个进行好似一元二次方程一样嘅配方，跟住合并同类项，并化系数为一，咁就可以解到啦
琪琪：哎，唔好讲啦，听到我头晕。嘿，你觉得好唔好玩啊？
豪仔：我觉得一般啦。逻辑思维唔够缜密，破案线索好容易搵到，唔够刺激。
琪琪：哎，我唔想同你D学霸讲嘢，好似显得我智障咁。嘿，你家姐琴晚几点返啊？你打畀我啯时都差唔多11点啦。
豪仔：家姐琴晚成晚无返嚟啊。
琪琪：无返！又去咗闺蜜屋企训啊？咁都讲声啊，我见我哥成晚坐立不安，行嚟行去。
豪仔：我知你哥哥担心，佢打畀家姐无听电话，先打畀我嘅。今早我出门前，家姐返嚟啦，佢畀人灌酒，搞到酒精过敏又头赤赤，琴晚应该好早就训咗啦
琪琪：阿，咁啊。佢唔可以饮酒就坚决唔饮啊，麦麦姐性格就系唔识拒绝人。
豪仔：嗯嗯
阿伟打电话畀琪琪
伟：喂，你而家喺边啊？
琪：喂，大佬。地铁囖。豪仔送紧我返去
伟：你同埋豪仔一齐返嚟啊。我而家同麦麦啱喺超市买完餸，准备返去。
琪：你同麦麦姐返去边啊？过嚟我哋屋企呀？
伟：系啊。买咗你钟意食嘅爬虾同芥兰。
琪：好耶，咁我剥两只孝敬你啦。
伟：（笑）你同豪仔到边个站阿，使唔使去地铁站接你哋？
琪：唔使啦。下个站到啦，我哋自己行返去
伟：好。小心D。拜拜
琪：知啦。拜拜
……………………
时间5:20分，阿伟屋企
伟：妈咪，我哋返嚟啦
伟妈：嘿，返嚟啦。
麦：阿姨好，又上嚟滚搅你了
伟妈：唔好咁客气，子晴你随时嚟都得。哇，你哋买咗咁多餸啊。
麦：阿姨，上次辛苦你了，今次等我哋嚟整啊。
伟：妈咪，你唞下，睇下电视啦，我哋好快搞掂
伟妈：（笑）好好好。同琪琪讲声，叫佢同豪仔一齐返嚟呀
伟：叫咗啦。佢哋返紧嚟
（开门）
琪：我哋返嚟啦。麦麦姐嚟咗啊
麦：（笑）琪琪
豪：阿姨好，哥哥，家姐
伟妈：豪仔乖
伟：嘿，豪仔，你随便坐，我哋入去整嘢先
豪：哥哥，有咩要帮手嘅叫我哋啊
伟妈：琪琪，你学下豪仔啦，又有礼貌又乖仔
琪：你叫豪仔学下我啦，又可爱又活泼
伟妈：哈，你呀…豪仔，你同琪琪去洗手，我整D水果畀你哋食
豪：哦，唔该阿姨
伟妈：豪仔，啯晚睇咗你做晚会主持，做得好好喔。激情澎湃，大方得体。
豪：多谢阿姨夸奖，我都系照稿读嘅
琪：妈咪，你哋慢慢倾。我入去睇下大佬佢哋搞咩先
琪：麦麦姐，听豪仔讲你头痛又过敏，好D没啊
麦：（笑）无事啦。多谢琪琪关心。
琪：喂，大佬，D爬虾等妈咪整啦，你唔识咪乱搞，费事变成黑色料理，嗮晒D嘢啊
伟：（笑）你净系挂住D爬虾。边个话我唔识，等阵你试下你大佬我嘅手势啦，保证你食到耳仔郁呀。唔信你问下麦麦。
麦：（笑）系啊，你哥哥整嘢好好食，我都好意外
琪：哈，系咪真架！等阵试下先。嘿，你哋几时玩过煮饭仔呀？
伟：多事啦你。头先你同豪仔去咗边度玩啊
琪：头先咪玩咗“密室逃脱”囖。哎，痴线架，佢嘅脑都唔知系咪人脑嚟架，几乎唔使惗就知道答案。其他唔识嘅人跟住我哋两个闯关，赢咗一堆礼物。啯个密室老板话，如果多几个好似佢咁嘅人去玩，佢哋店铺肯定执笠啊
伟：哈哈，豪仔咁犀利啊。好啦，你出去啦，咪阻住我哋整嘢。
琪：哼，大佬，你不如直接讲唔好阻住你哋两个谈情说爱玩煮饭仔啦
伟：哈，你只衰妹阿！
伟妈：琪琪，出嚟陪下豪仔倾计啦
琪：哦。嚟啦
伟：嘿，顺便拿埋呢碟嘢出去啦。
琪：哦