广播专辑 弄堂茄山胡533 想起老早寄包裹

想起老早寄包裹
文/许德华


 前两日拨外地亲眷寄包裹，辣附近邮局一歇歇就办好了，一开心脱口而出：搿歇寄包裹太便当啦，想我以前要自己动手缝布袋钉木箱……帮我办事体个小青年听了以后，看我个眼神就像我辣讲啥个稀奇事体。


 其实辣我年纪小个辰光，上海生产个服装鞋帽等产品辣全国邪气有名，阿拉老家里个亲眷朋友侪欢喜买上海货，可惜一大家子里向只有我爷娘辣上海工作，所以阿拉屋里就成了外地亲眷买上海物事个代理。爷娘工作忙，外婆年龄大，采购工作就落辣我搿个中学生身浪向。


 埃歇辰光上海个大商店侪集中辣“三街一场”（南京路、淮海路、四川路和豫园商场），同样个衣裳价钿侪是一样个“定价”，款式样子也勿多，全靠做工精细料作好吸引顾客，所以挑选起来也勿难。每次收到老家寄来个购物单，我就拿亲眷提供个衣裳尺寸、鞋子尺码抄辣纸头浪，带到店里向，请营业员帮忙挑选。一来二去，次数一多，从市百一店、大不同皮鞋店，到妇女用品商店、儿童用品商店，交关营业员侪认得我了，每趟去侪熟门熟路。


 东西买好需要邮寄到外地，像服装类个要做一只包装袋。当年勿像现在，各种各样塑料袋多得勿得了，随便寻几只大塑料袋就可以了，埃歇辰光侪需要我自家踏缝纫机做布袋。拿衣裳装进布袋里，辣布袋浪写好收件人个地址姓名，再去邮局让工作人员检查。检查过以后，需要我用带去个针线拿袋口缝起来。最后邮局称重报金额，我付钞票贴邮票，拿好寄件收据才算结束。


 寄衣裳还算便当，寄鞋子就麻烦交关，因为衣裳是软个，只要布袋勿破，装辣里向个衣裳一般是勿会坏脱嗰，但是皮鞋勿一样，假使也用布袋打包，寄到目的地个辰光，大概率已经鞋帮塌脱，鞋头瘪脱，蛮好一双赤刮辣新个皮鞋结果变成“残次品”，亲眷肯定勿捂心，所以需要用木板钉个箱子装起来。有辰光邮局里呒没合适个硬板箱，我只好自家想办法。有一趟为住辣内蒙古个表姐寄结婚穿个新皮鞋。齐巧对门邻居个儿子跟人家学做家具，手里有点零散木头和三夹板，听我讲起需要钉一只邮寄用个木板箱，就主动帮我完成任务。


 事后，表姐邪气开心，来信讲要寄一箱内蒙古土豆让上海人尝尝。等我弄清爽“土豆”就是阿拉菜场里卖个“洋山芋”，写回信叫伊覅寄，土豆已经辣来上海个路浪了。


 埃歇辰光取包裹要到邮局里，不像现在侪是快递送上门，结果搿箱土豆到上海以后就存放辣当年个彭浦北郊站，我屋里住辣虹口区祥德路，路太远又怕自家力气小拎勿动，就有点勿大想要了，但是邮局几次三番发通知叫我去领。最后我叫了一男一女两个同学一道去，乘46路公交车十几站来回，终于“嗨呀”“嗨呀”拿搿点土豆搬回来。


 今朝阿拉已经用勿着为寄包裹操心了。现代物流拿老百姓需要个东西从产地直接寄到顾客屋里，我有趟网购浙江青蟹，第二天就收到了，蟹脚还辣动来动去。小区里还有智能收件柜，用手机扫一扫屏幕浪个二维码就可以收快递了，其中个变化真是让人感叹。