广播专辑 弄堂茄山胡529 想起“家庭妇男”陈爷叔

想起“家庭妇男”陈爷叔


 今年疫情禁足辣屋里向，线上逛街蛮扎劲。偶然看到两个像父子样个辣网上叫卖爆炒米花，铁炉子边浪堆满爆好个珍珠米、年糕片、蚕豆花……搿幅景象让我想起一个老邻居。


 老早屋里附近个陈爷叔会爆炒米花，伊有个外号叫“家庭妇男”，是别人嘲笑伊没有工作，辣屋里带小人做家务。


 伊其实是勤快人，我就是从伊搿搭看到吃到炒米花嗰。搿天陈爷叔带仔爆炒米花个家生辣院子前头个空地浪摆摊头，我看伊点火烧煤，拿一块灰乎乎个金属炼成转锅个盖头。后来我才晓得搿是金属铅。


 第一炉珍珠米是伊自己带来嗰，摇啊摇，10分钟过脱，陈爷叔立起来，翘起铁炉子一角插进麻袋个洞洞眼里，铁钳扳住炉角，高喊一声：炒米花响啦！勿等阿拉搿点看闹猛个小人捂牢耳朵，一声巨响一团气，珍珠米个香味扑鼻而来。伊从布袋里拿出一眼珍珠米分拨阿拉尝味道，噢哟真好吃啊！搿辰光已经有大人小人舀屋里向个大米、蚕豆来爆炒米花。


 陈爷叔做周围邻居个生意，收5分钱，加糖精片就再添1分钱。逢年过节生意好个辰光，伊儿子也会来帮忙。陈爷叔负责摇炉子拉风箱，伊儿子负责往炉膛里添煤和拉麻袋。等“炒米花响了”，伊儿子就捉牢装炒米花个麻袋，不让气浪冲脱炒米花。然后拎起麻袋，拿炒米花倒进人家带来个钢精锅里。我有趟拿装糖果个大罐头去装年糕片，陈爷叔一边朝罐头里装，一边夸我聪明，用罐头装炒米花勿容易受潮。


 老底子大家手里侪勿宽裕，糖果饼干价钿贵，只有走亲访友个辰光才会买一点当礼品，价钿便宜个炒米花就是邪气受屋里小人欢喜个零食。再后来国家改革开放了，大家个生活条件越来越好，开始讲究食品安全和食品卫生，听说吃爆炒米花容易铅中毒，大家侪勿到街面浪去买炒米花了。时至今日，爆炒米花个行当已经消失很多年了。呒没想到，又辣网络浪看到了，而且使用个是电动机器和不锈钢器具，勿必担心重金属污染。想象着儿时个转炉烟火和香甜滋味，我果断下单了童年味道个爆米花！