广播专辑 弄堂茄山胡528 想念看电影个欢乐

想念看电影个欢乐

赵妃蓉

 因为疫情，老长一段辰光呒没到电影院看电影了。特别想念可以自由进出电影院，勿用戴口罩看电影个日脚，也特别怀念小辰光看电影个欢乐时光。

 记得小辰光看电影是每年六一儿童节个固定节目，到了搿天，阿拉就手拉手走进大光明电影院，长大以后才晓得原来搿家电影院搭仔旁边个国际饭店侪是建筑大师邬达克设计嗰。当年每趟走进大光明电影院，总感觉特别敞亮，埃歇辰光上海居民居住条件比较逼仄，所以搿种宽阔个内部空间辣我心里留下深刻印象。

 现在电影正片放映前一般侪会先放几段广告，老早是呒没广告搿种物事嗰，但正片放映前总会有一段《祖国新貌》纪录片，大概十分钟左右，是由中央新闻纪录电影制片厂拍嗰，最常见个内容就是阿拉国家各个地方热火朝天搞建设个场景。因为当时阿拉国家是农业大国，所以每趟侪能看到收割机辣麦田里向驰骋，麦浪滚滚个画面，扑面而来个侪是金灿灿个感觉，搿种丰收个喜悦感受就算隔仔电影幕布还是可以感染到观众。现在回想起来，还是会感觉激动。

 小辰光看过个电影，现在往往记勿得完整情节了，一般侪是记牢某个场景、某段旋律、某些只言片语，但是迭种记忆个意义实际浪向是塑造了人个心灵底色，伊拉就好像辣我幼小个心灵里种下了一颗颗种子，关于友情、关于爱、关于离别，也关于死亡……

像《戴手铐的旅客》主题曲《驼铃》响起个辰光，戴着手铐个男主角立辣飞机舷梯浪向转过身，深沉个旋律响起，打动人心。《泉水叮咚》讲个故事要单纯得多，是讲退休教师陶奶奶办幼儿园，为双职工排忧解难个事体。埃歇辰光，双职工家庭里个小囡侪会辣头颈浪挂一把屋里个大门钥匙，俗称“挂钥匙个小人”。电影内容虽然简单，但老贴近实际生活，现在叫“接地气”，搿种现实主义题材个电影当时是老多个。《八仙过海》是记忆里向最闹猛个电影，不仅因为里向个神仙侪有奇奇怪怪个神通，顶顶重要个是我最羡慕里向所有人侪会腾云驾雾，飞来飞去，实在是太自由啦。越剧电影《五女拜寿》里向茅威涛扮演个邹士龙唱出“请姑娘放心喝下这暖肚汤”时，尹派唱腔中音色圆润、气韵悠长个特点展现得淋漓尽致，让我对尹派唱腔产生了浓厚兴趣。《烛光里的妈妈》放映个辰光我刚刚读初中，被电影里母子情深个情节感动得一塌糊涂，看过以后就参加了影评比赛，后来我还因为要去领奖第一趟向老师请假，觉得特别光荣。《古今大战秦俑情》个主题歌是“焚心以火”，广东话歌词当时呒没完全听懂，但是看到巩俐演个冬儿吻别蒙天放，拿生个希望留拨伊，自己转身冲到火海，迭种不顾一切个感情让我邪气感动，尽管埃歇辰光还勿懂得究竟啥是“爱”……

小辰光还曾经有一部呒没看成功个电影，是隔壁班个男生辣暑假里偷偷送来一封信，约我到电影院看电影，我勿记得具体是啥电影了，只记得收到信个辰光心跳个感觉。结果当然是呒没去，但是一直记到现在。小辰光看个电影里向呒没炫目个特效，但有浓浓个情意，和电影有关个记忆中有情窦初开个悸动，有和亲人一道看个亲情和温馨，也有我对搿个世界个懵懂认知……