江南跑到新疆来（江南古典汉语）

标准汉语之一——江南古典汉语

嘉定菊园老茶坊《嘉定闲话》栏目

嘉定古建与民俗文化研究会 · 陈夏青嘉定语言研究工作室

汉藏语系·汉语言·吴方言·太湖片·苏沪嘉小片·

太仓方言大区·嘉定方言区·华亭方言点

（声韵调系统）

我亇母语，我亇乡音。

全球人民，弘扬乡音。

江南跑到新疆来

有人话，江南是个好地方。有人话，新疆是个好地方。看惯著江南风情，也的确蛮想去看看看国土还一头亇新疆是哪恁亇一番景象。

2019年7月14号，上海站19:41亇火车，踏上著梦寐以求亇新疆之旅。昰趟旅行火车乘称心——东西横跨国土，从江东、江淮、中原、关中一路西行，一埭里领略壮丽国土山川景观亇不同。第二日夜头通过传说中亇河西走廊，7月16号早儿头觉转来已经塱新疆界啧，窗盘里望出去秃是平荡（他浪切）、荒肃亇土地，大得野野豁豁，一眼望不着边。乃么正好齐巧出日头，头一趟看见荒漠日出，倒也别有一番风情。不过开开开开，有亇场许不晓得种亇啥，也一片绿样样；有亇户荡像也有一只只土墩墩嘞小山头，还有一块块大石头嗫大烂泥块，七高八沦顿亇，看上去有种诡异色彩。还有一滩望出去巷尽巷是亇风车呃！好像就是传说中亇达坂城。

大概11:15到达乌鲁木齐站，四千公里路，冒四十个钟头，中途停靠也算著塰，厡要差不多一百码亇速度，看看么绿皮车，也快得海万！接站亇导游兼驾驶员是个撘我俦同龄亇小伙子，姓马。上车，直接抄东北奔赴当夜亇住宿地，並不著乌鲁木齐停留。但一路观察乌鲁木齐，撘内地其他城市一样干净、整洁、漂亮。出城之后，朝东望过去，远远里有能望着一座雪山，真亇是直插云霄！从来朆看见歇昰恁高亇山！昰个就是天山主峰之一亇博格达峰，海拔5445米。

乃么有劲啧呀，不晓得啥人想出来亇，车子开到大名鼎鼎亇天山天池——门口头，拍著张合影，算来过著么好啧，轧实进去也朆进去亇，阿是话实际上呒啥大看头亇？乃人蛮有劲亇，不进去么想想阿会得错脱眼啥？真亇进去看看么作兴是也上不过如此。

天池门口出来，好像就就近何塱寻著爿饭店吃饭。环境蛮好，顶上只棚，边头么果树、葡萄藤环抱，西瓜嘞、大盘鸡嘞吃得开心得！本来还塱讨论阿有猪肉嘞，后晚来头介绍话，马导是回族人，噢，乃么大家不好意思点猪肉，横牛肉、羊肉、鸡肉嘞厛总贯有得吃亇。

吃好继续赶路，穿越北疆亇大沙漠——古尔班通古特沙漠，抵达当日亇落脚点——五彩湾。昰个场许蛮有劲，话叫五彩湾，但好像也不是五彩斑斓嘞也呒曼河浜嘞湖荡，就是茫茫荒原上亇一个小聚落，饭店、市场有亇，边头好像是只货运车辆亇停车场。我伲亇宾馆叫新洲城市大酒店，蛮赞亇，住宿条件蛮好亇，楼层也高，噢望出去真亇是大地苍茫，辽阔亇原野一眼望不着尽头！远亇塱有能望着有两爿作兴是发电厂。蓝天白云覆盖著上头，的确觉着壮阔无比！深切体会着，不到新疆，不晓得中国之大。

楼下头拣著爿饭店吃夜饭，马导成恐影响伲吃猪肉嘞自家单独去吃夜饭，让伲拣称心，可以吃汉餐。吃罢夜饭出来走走，到边头市场里买西瓜吃。新疆对于治安控制相当严格，到市场里也要检查身份证亇。就像前头一日列车警察提醒亇：身份证一定要保管好！塱新疆，呒得身份证寸步难行！昰恁也好，我伲良民横坦坦落落、大大方方总贯跑进跑出，坏人倒是真亇寸步难行。故嘞真亇就像伲维吾尔族师兄讲亇，现在新疆各块各处全蛮安全著塰。

大家全上去著我还闲不定，还要一个子著下头走走。宾馆大门对牢西面亇，正好看见落日头，著茫茫原野上亇日落！一看辰光，9:40分！9：40分落日头！侺【阿曾】听见歇？不过实际上也不奇怪，一是昰滩本来就塱西塰好多千里亇场许，但伲用亇还是北京辰光，有时差著塰，二是热天色北方日子还要长。当然，头一趟见识，还是蛮有新奇感亇。结果到著宾馆房间里话，为此著窗口朝东亇，正好望着地平线上出月亮！圆骨囵顿一轮明月，赞！日落、月出像接力，正好全看着，意外亇惊喜！完美！

7月17号一早，出发！目标：可可托海。车子一埭里朝北，继续穿越古尔班通古特沙漠。地方大得野野豁豁，公路就著茫茫旷野上朝地平线延伸。不过好像交通管控蛮严格亇，不是话要停就好停亇，外加车速还有限制，呒能开快亇。不过我蛮欢喜昰恁，正好坐著车上，脚也用不着走啧，笃笃定定欣赏沿途无限风光。逐点逐点，右前方，也就是东北方向，出现著一长埭山脉，昰个就是大名鼎鼎亇阿尔泰山脉。一排被认为具有同源关系亇语言，像维吾尔语、蒙古语、满语嘞厛间，就统称为阿尔泰语系。

山区越来越近——进山啧。可可托海景区著垯阿尔泰山里，属于阿勒泰地区·富蕴县。富蕴路，嘉定人应该蛮熟悉。嘉定因为地处上海西北部，故嘞路名蛮多用位于全国西北部亇地名来命名。故咾到著西北看看地名熟悉嘞个亲切。

可可托海当然並不是海，好像是当地少数民族语言音译过来亇。昰个塱位于额尔齐斯河亇源头区域。额尔齐斯河，我国唯一属于北冰洋水系亇河流，地理书上看得无趟数亇啧，今朝终于一睹真容！虽然昰滩山头上亇植被並不茂盛，但配合山间峡谷里亇树林、毡房撘牛羊，还有清澈（直列切）流淌亇额尔齐斯河，加上万里晴空，勾勒出一幅无比美妙亇画卷，令人心旷神怡！相比起来，里乡亇核心景点神钟山，塱昰幅宏大亇美妙画卷里倒也显得並不昰恁突出啧。

当夜住著景区外头一滩场许，又像只镇又不像，横也是滩聚落，有両爿宾馆嘞饭店，条件蛮好亇。我伲住著垯红景大酒店。吃好夜饭出来兜兜，10点钟刚日光搭火光嘞！建筑亇灯光全开起来啧，看上去金碧辉煌，透露出一派繁荣亇气象。加上外头散步亇、跳舞亇、吃烧烤亇各族人民，生动亇诠释著“安定祥和”四个字亇含义。但是，就塱边头远不多，有两部锈迹斑斑亇挖掘机，像啥介仔著塱无声亇诉说眼啥。昰个好像是个矿区嗫还是博物馆亇门口，天夜嘞照朆拍，但记得门口头介绍上亇大体意思是，可可托海亇矿产资源当年为国家偿还苏联债务立下著汗马功劳。阿是话为著昰塱亇矿产吃价嘞要相当于还著总债务亇恁半得嘞？！突然对昰垯曾经默默无闻亇场许肃然起敬！

讲着新疆，讲着北方领土，不得不涉及着来自北方亇强大势力——俄国。现在可可托海昰塱翻过阿尔泰山就是出国啧，因为外蒙古著垯俄国人亇支持下独立，昰恁有利于俄国亇国家利益。辨恁，昰滩离国界线还远宛一段嘞！想想当背心上雕出去亇外蒙古，一大蛮块肉！但当年国家衰弱，气力大不出。历史教训，值得世代铭记。

7月18号一早，朝布尔津进发。顺著额尔齐斯河一埭边抄西北，饭我记得塱北屯市吃亇。北屯也是一个相当漂亮亇城市，街道整洁，屋舍俨然。上厕所塱边头亇商场里，进商场也是要扫描身份证嘞照照面孔亇，行両个正心要做坏事亇短寿寸步难行。商场里有両个少数民族囡细塱一俦哬儿陈，不过，我听下来，全是著用北京语音讲张。看来也撘伲内地其他交关户荡一样，囡细已经完成著从本地语言到“人工北京闲话”亇转换。从语言生态亇理想角度来讲，既保持自家亇本真乡音，又掌握外来亇强势语便于跨区域交流，可能是比较好亇状态，但据悉双语状态全是过渡状态，民众逐点逐点会放弃原有语言。

像近代上海塘上亇外地移民，离开原籍地亇辰光可能是当地闲话单语，到上海之后自家或者下一代成为老家闲话、上海闲话双语，再过个两三代变成功上海闲话单语。近几十年“人工北京闲话”普及，又从老辈亇上海闲话单语，到年轻一辈“上海闲话”“北京闲话”双语，到囡细“北京闲话”单语，又完成著转化。

据悉早年到香港去亇上海移民也类似——从吴语单语，到吴语、粤语双语，到只会粤语。像美国昰恁亇移民国家好像也类似——第一代移民可能原民族语撘英语双语，几代之后可能就只会英语单语啧。同龄人亇语言环境相当重要，若然同一地域或者同一民族亇同龄人，自家俦里已经不用本真乡音或者本民族语啧，嗰么昰种闲话可能不可避免亇走向消亡。虽然我伲关心语言资源保护亇人对昰排问题比较敏感，但必须跳出自家亇喜好理性亇看待昰个世界，要看见，最广大亇人並不会真正关心讲亇闲话是本土亇还是外来亇，只要适合自家使用就可以。只要其中有一种足够自家使用，通常不会为著某种情怀刻意去保留还一种闲话。国家亇语言政策，只是起到一个加速或者延缓亇作用，核心机制在于最广大民众趋向于交流便捷並减少语码负担亇动力。

吃罢饭继续差路，车子著广袤亇天地间驰骋。其他场许全黄乎乎、光秃秃亇，但可以远望着额尔齐斯河塰墪全是一片郁郁葱葱亇植被，明显是河水滋养亇。终下昼两点半把抵达布尔津县城，也清爽、漂亮！我伲住著垯布尔津旅游宾馆。下昼日头辣辣较，両个老法师全垨著塰不出来，我横闲不定亇嘞一个子出去趤趤。边头远不多就是中俄老码头风情街，有眼俄式风味。穿过风情街就是额尔齐斯河。河滩边头草里乡蚱蜢嘞些儿虫倒蛮兴著塰，还有一个老浮桥遗址。著蓝天白云映照下头，颇有一种闲适笃定亇感觉。不过，今朝亇主要景点是——五彩滩。终七点钟介子，朝景区开拔。

昰个五彩滩，不同于我伲头一夜住亇五彩湾，真亇是色彩斑斓、娇艳妩媚，好像称为悬崖式雅丹地貌。佢是额尔齐斯河滩上亇高地，虽然光秃秃，但高低起伏，花丽斑斓，与近处亇河水、对岸亇丛林、远方亇旷野相映成趣，美不胜收。

7月19号，朝北开拔，越来越接近新疆硕硕北横头，大概240公里路程，抵达下一个景点——禾木。禾木村是图瓦人亇集中生活居住地，当然，只有能话是塱现在中国境内亇集中生活居住地，因为，本来属于中国亇面积达17万平方公里亇唐努乌梁海地区已经畀俄国吞併，成为其图瓦自治共和国，图瓦人已经成为主体分布于俄罗斯境内亇人群啧。当然，现在塱国内，禾木村，还可以成为一个了解昰支人群文化亇窗口。

禾木昰只位置相当赞，一埭边森林草原、青山绿水，村宅周围群山环抱，但又全有眼距离，並不觉着狭窄逼仄，厡旧一派天高地广亇宏大世界。我伲住亇宅头像是专门亇游客住宿场许，到核心景点亇当地人亇自然宅头还有一段路，可以乘景区内公交车过去亇。下昼正好去兜兜。昰塱亇房子全原木造亇，撘四周围亇环境俦显得相当亇协调，颇有眼自然、古老亇气息。禾木河也像额尔齐斯河一样青亨亨、绿漾漾，清澈见底，赞透赞透！真亇是山清水秀，世外桃源一般。爬到河对过亇高地观景台上，整个村宅尽收眼底——昰只自然宅比较狭长亇，四周围一绞圈全是树林，环境蛮优雅亇。昰个观景台著一大块山坡平地上，一埭里走过去，高山、草地、蓝天、白云，风景如画。

回到下头宅上，吃著眼冷饮，吃著顿夜饭，慢荡荡趤归去。不过，我是横闲不定亇，又独个子出来兜啧。我伲住宿亇宅头有条路通到西北角亇一块草原上，我跑上去望著望，草兴嘞个深，有两只马著吃草。乃么有种啥个虫“居居居”此起彼伏亇叫。循声【目沙】过去，原来是一种蚱蜢，壮倒蛮壮，我塱嘉定从小捉蚱蜢，像也朆看见歇昰只品种亇。想想不熟悉，不敢瞎闯，立著路口头准备回转，正好有両个人话也从宅上跑著出来，一埭边话话笑笑朝草原里钻啧话。哈哈，嗰正好，也跟著后头朝里跟进去，横人多胆大。有位短小精干亇中年男子，一看就是导游。一头介绍当地情况，一头指导大家拍照，我也跟著边头学着不少。草丛里有野草莓，导游推荐大家嗒嗒味道，我是也有眼加二加三嘞独怕不清爽吃著肚里斥嘞不敢瞎吃。佢垯横不关，吃呃！一歇儿一滩，一歇儿一滩。还有一种圆骨囵顿、白敷敷像蘑菇恁亇物事，导游话叫马勃，可以做中药亇。

一头白话一头朝前，不知不觉又到著禾木村核心景区——原来头先下昼我伲是打下头亇路上过去亇，昰歇儿轧实就是塱路边头亇高地上穿过草原过去亇。所在位置正好大概是禾木村亇东北高地上，也是一个俯瞰全村亇绝好角度。差不多8:50介仔，日头正好从西面亇山头上下去。交关人坐著高地上欣赏，下头宅角上亇平地上几只热气球氽著空中，蛮有劲。乃么又跟著大家下去到宅上兜著歇回转。走亇路倒蛮长。

回到住宿区，正好我伲両个老法师也出来活动啧，又跟佢垯到东面亇山坡上趤著趤。草兴嘞个深，路不大好走亇，看看有両个人哪恁已经从山脊上下来啧，还塱想佢垯哪恁上去亇嘞！乃横天夜下来啧，算啧，拍著両张滑稽照嘞回转啧。覅话夜头啧，就算日里也尽可能覅到边头亇自然环境里，马导专门关照过，就算当地人也不大敢亇，碰着熊么乃么死蟹一只！

7月20号，朝西到贾登峪，换乘区间车朝神秘莫测亇喀纳斯湖进发。相对于前头両日碰碰就几百公里亇长途奔袭来讲，昰段路倒真不长。顺著喀纳斯河流沿塘浒一埭边朝里，到块全是青山绿水。到著喀纳斯湖泊边头，再换车子直接朝制高点观鱼台前进，可以一直开到半山腰，昰个山坡上亇草原是赞透赞透！到块开满野花，令人流连忘返，恨不得跳下去捎来滚去。到著停车场，挨下来亇路要靠“11路电车”啧。吃力啌啌亇爬到顶上，终于可以一览喀纳斯湖亇全貌啧！昰只湖相当于夹著山谷里亇，长遥遥，狭哝哝，形状有眼像只胃。观鱼台大概位于只湖亇西南角。抄东北朝喀纳斯湖北横头望，可以望着远亇塱群山巍峨，层峦叠嶂，不晓得中蒙俄三夹界里亇友谊峰【阿曾】落眼亇。自从俄国人侵占著西北几十万领土，策划著外蒙古独立，昰滩朝北翻过阿尔泰山就变成功国外啧。

山顶上冷亇噢，山脚下还热得来嘞，到著山顶上是一歇儿歇儿衣裳就要着起来亇，辨恁看不笃定亇。对过有亇山顶上还有雪嘞！

离开喀纳斯湖泊，一埭边朝外，昰个喀纳斯河流里一只只湾荡也蛮有看头著塰！好像还有卧龙湾、月亮湾、神仙湾嘞排雅名嘞！

从喀纳斯景区出来，回到贾登峪亇宾馆。宾馆区域对过就是当地民众亇一只只毡房，跑过去参观参观，一家哈萨克人家正著垯做面包嗫还是某种饼。看见陌生人来一点也不像有种警觉亇样子，看见伲是笑得开怀得！老倪要撘个哈萨克老太俦拍照，个老太太像煞嫌衣裳不好看咾“豁喇”势嚷件罩衫一脱就撘老倪立著一俦合影，大大方方！

7月21号，朝南扑向著名亇石油城克拉玛依。昰日又是长程奔袭，路程长达530公里，大约要七个半钟头。也就是讲，我伲本来从准噶尔盆地东部一埭边反时针兜到盆地西部啧。进入克拉玛依地界，塱乌尔禾区，有滩魔鬼城景区，不过両个老法师觉着横外头么也热得娘死脱，外加一埭里路上也看得见昰个景观亇嘞用不着特特回回再到里乡去参观啧。乃么大家又全门口头拍著拍照嘞好啧，像天山天池一样处理。我门口头自拍著张，大约4:30把。

继续朝前，看见有一大爿向日葵，赞透赞透！下去拍照呃！

等到著克拉玛依城里终7点钟户荡。克拉玛依城也同样亇清爽、漂亮。不过，城市好像全千篇一律，也呒啥多话头，在此一笔略过。

7月22号，又是430公里长距离奔袭，目标是西南方向亇赛里木湖。终2点钟介仔到亇。昰滩位于新疆西北角，属于博尔塔拉蒙古自治州·博乐市，嘉定城里有博乐路，大家阿是蛮熟悉？赛里木湖，圆骨囵顿，大哝哝，面积458平方公里，正好撘整个嘉定区俦差不多。游览方式就是乘著景区里亇车子环湖一圈，就相当于绕著嘉定区界开一圈昰恁，当然，有両只站头好下来走走看看亇。湖光山色，空旷辽远。风景实在赞，但语言实在贫乏，不晓得哪恁形容啧。可能交关人觉着赛里木湖真亇是大透大透，但轧实，撘1800平方公里亇斋桑泊、2650平方公里亇阿拉湖、6300平方公里亇伊塞克湖、18000平方公里亇巴尔喀什湖俦比起来是全可小弟弟！但昰排大湖，著塱俄国亇侵略下，全部全从中国齾出去啧！辨恁全是新疆亇风景名胜区呃！当然，世界政治格局已经稳定，各个国家全会有得有失，若然全想恢复到历史上最大亇版图，整个世界要乱腻脱亇，並不有利于已经稳定下来亇生活撘秩序。

终5点钟快，离开赛里木湖，继续抄西南行进。远不多，就是宏伟壮观亇工程奇迹——果子沟大桥，今朝终于亲临实地一睹真容啧！昰滩已经属于霍城县地界啧。霍城路，嘉定亇亲阿熟悉？终6:30介仔，抵达霍城亇还一个景点——薰衣草公园。不过稍些有眼失望亇是，期待中新疆亇薰衣草公园应该是大得野野豁豁，恨不得一望无际亇！结果，讴~~好像显得有眼“精致”。当然，景区布局肯定有其各种条件限制，我伲也呒能奢求。横有眼意思，意思意思么好啧。

终七八点钟，我伲到著住宿点——清水河镇亇京基大酒店。楼层蛮高，有能俯瞰城镇。昰滩朝西远不多，就是连通哈萨克斯坦亇霍尔果斯口岸。但可惜行程朆安排么也就朆去亇。横想想头话亇：“错脱亇物事多嘞！”也无所谓啧。

7月23号，朝东奔袭380公里到那拉提，上山，看那拉提草原。老实讲，著山下头亇那拉提镇，真从来朆想着歇，著边头亇大山深处，竟然隐藏著一大片世外天地！原来啊，翻上山坡，开到山里，里乡有相当广阔亇山间平地，形成著一大爿亇草原。再远望过去，可以看见远方亇群山，高峰上乡还有皑皑白雪终年不烊嘞！有垯游客中心，还有骑马、羊拉车嘞啥娱乐活动，蛮有劲亇。终9点钟介仔回到景区门口，天还朆夜嘞！回到宾馆塰墪吃好夜饭再出来到那拉提街上趤趤，也只嫌闹猛著嘞！我么欢喜兜兜石头店亇，买么不买，饱饱眼福，我比较相信镊来亇，毕竟买来亇就不敢保证啧。不过印象里路上别相亇囡细，互相俦里也全用北京音啧，撘伲塱両个囡细一样亇。实际上想想也正常，随著全球化亇深入，一个国家内部亇语言会逐点趋同，美国是英语，中国是汉语，对于汉语区内部来讲，则是各地全趋同于“人工北京闲话”。同时，世界通用语亇影响也越来越大，生活场景里到块全是英文字母嘞英语单词，单纯亇汉语环境也已经不大有啧。到未来全球交流频繁到一定程度，整个人类作兴真亇会语言一致。虽然理论上完全可以同时保持两三种语言能力亇，但从实际情况看，开启双语模式后，人们普遍会逐眼逐眼用更加通用亇伊种闲话来永久替换自家原来亇伊种弱势语亇。

7月24号，上昼路程不长，东南方向亇巴音布鲁克草原，终80公里。相比那拉提草原来讲，像煞巴音布鲁克平荡亇区域多，故嘞看上去见得还要大。查资料好像实际面积是也巴音布鲁克草原要大脱娘些儿，要23835平方公里著嘞！相当于苏州、上海、南通三个市加起来昰恁大！昰滩属于巴音郭楞蒙古自治州·和静县。和静路，嘉定人应该也晓得亇，特别是安亭角里亇。大草原，要形容，倒也蛮难亇，也可能撘我文学素养不高俦有关，只好用大白话讲：横大透大透，全是亇草。不过单有草轧实也有眼单调，关键是有巷巷尽尽红亇、紫亇、白亇花点缀其中，实在是赞！昰滩顶有看头亇是伊条开都河亇九曲十八弯，著浩瀚无边亇草原上蜿蜒流淌，辽阔壮美！据说若然落日头快天气条件合适，可以同时看见九只日头亇倒影！但我伲早晨头去亇嘞看不着。不过，倒是着着实实体验着著传说中“早穿棉袄午穿纱”亇感觉，一早真亇是着滑雪衫上去亇噢！是亇，侺朆听错脱亇——大伏里着著滑雪衫上去亇！不过到著日中厢里自然热得就要脱下来亇。

终一两点钟离开巴音布鲁克草原，挨下来迎接我伲亇，是艰险亇独库公路。独库公路——从独山子到库车亇公路，纵贯天山南北，全长561公里。我伲跑亇是从巴音布鲁克朝北到独山子亇昰段，也就是翻越天山亇路段。雄伟险峻亇天山山脉，层峦叠嶂，草绿颜色亇山坡上，一棵棵高大挺拔亇乔木像一把把深绿颜色亇宝剑一样直指苍穹！昰支场许是真像天上亇仙人住亇一样！当然，话么是昰恁话，轧实昰个塱条件是相当严酷亇，每年只有6月份到10月头上么有能通行。当年为著筑通昰条路，缩短南北疆亇交通距离，几万官兵用著十年，168名烈士长眠于此。我伲今朝有能省省力力、笃笃定定、称称心心坐著车里一埭边欣赏西北大山深处亇仙境，全是塱享受无数前辈亇奉献撘牺牲带来亇利好，若然一头享受还一头拒不承认甚至恶意抹杀昰点，真全良心斥干净！人亇生存离不开社会，社会运行需要国家管理。从广袤国土亇东部沿海万里迢迢深入西北内陆畅游，受益于国家塱语言、交通、治安、卫生、商贸嘞排各方各面亇保障，是从官方到民间无数个体所形成亇群体合力亇成果。长年排华亇美国尚且克服偏见肯定著大量华工对美国东西铁路修建作出亇突出贡献，而国内有排人一头号称要学习国外先进方面，一头对自家国土上亿万社会成员凝心聚力创造亇伟大成就嗤之以鼻，实在是虚伪至极，或者也可能就是别有用心。

道路继续蜿蜒爬升，毡房、牛羊、高山、流水，西北内陆同样有万里海疆亇壮美！山头上亇植被越来越少，积雪越来越多，说明海拔越来越高。毕竟，昰条路要穿越海拔3700米亇铁里买提达坂，还有海拔3390公尺中国最高亇哈希勒根达坂隧道。不过，坐著车里不动嘞倒还不觉着，等到著最高点到山坡上去弄雪是，是乃觉着有眼啌亇，要慢荡荡走亇。是亇，大伏里弄雪。饶佷大热天色么啧，照样也是海拔越高温度越低，高到一定程度么自然冷得雪也烊不脱啧。不过下车倒也不像早儿头巴音布鲁克草原昰恁冷，故咾着件袈衫有啧，用不着请出滑雪衫啧。

足足邋邋七个钟头，终于翻越著整座天山，开到著独库公路亇起点——独山子，昰个是属于克拉玛依市亇一个区，不过离开克拉玛依城是远稀遐钊（钊，表远义，章母滞古或见母均合）呃！终150公里路著嘞！不过，当中还有顿饭亇辰光。塱山里吃饭亇小饭店，还碰着著当年上海援疆亇老知青，厡还撘伲俦一口上海闲话交流，不过边头像佢亇两个丫头儿就只会北方闲话啧，要靠佢翻译啧。的确，当语言环境发生变化，人们通常並不真亇会执着亇一定要保留原来亇伊套闲话，只要使用亇语言可以符合自家当前生活需要就可以。就像我碰着歇亇几名华裔美国人，好像第二代就已经不讲中国语言啧。问问其他族裔亇美国人，好像也不讲佢垯原民族语言啧。当然，迁移亇第一代，可能对于自家家乡亇闲话还有比较深亇感情，或者习惯使然，会坚持一生，但几代之后蛮难不替换亇。

从天山深处一路走来，看著车子从崎撬迸捩亇山区里逐点逐点开到平地上，不禁感慨万千。想想昰段漫长艰难亇路程，轧实是充满危险亇。亏得日子长，天也好，还可以平安落地。若假天气恶劣，或者乌星墨夜暗，简直难以想象哪恁开过来！若然车子著山里抛锚么乃么死！立著独库公路起点纪念碑留影纪念。昰歇儿头儿北京辰光八点三刻介仔，天还朆夜。继续朝北，好像本来要住著奎屯市里亇，但到著只宾馆嘞有啥问题嘞话呒能住，乃么马导开伲朝西几十公里住著乌苏市。终夜头11点钟到亇乌苏，终于到宾馆安顿下来啧！住著沂疆大酒店。头先吃好饭到乃也长远啧，大家也已经饿呴落落、疲脱滥瘥啧。不过还是最最服帖马导，连续行车好多个钟头，外加还有交关山路，了不起！咳！全是同龄人，差距哪恁就昰恁大嗫？乃么豪髞出去觅食。昰垯户荡，叫么叫乌苏，轧实一眼也不污髿亇，只嫌清爽著嘞！寻著爿饭店豪髞吃。不过我横吃不快亇，待両个老法师先回转么啧，我一个子搭势码架、笃定码势开吃。吃吃吃吃话，听见后头有人喊我“阿哥”。㧙转来一看，一个哈萨克族小伙子搭讪我，问伲阿是来新疆旅游亇，对新疆亇印象哪话。佢还主动提起话，新疆老早有排情况畀内地感觉不好，希望我伲见证著新疆亇良好发展，有能多替身边亇人宣传宣传。眼神真诚，言辞恳切。

告别著佢，回到宾馆，好好恁睏一寣。

7月25号，朝东260公里，目标直指新疆首府乌鲁木齐。不过前头一日蛮衰瘏，我是横路上基本全著睏觉，错脱交关风景。宾馆著城市北横头新疆体育中心附近天津路上亇乌鲁木齐阳光酒店。行李摆脱，出来寻饭店吃饭。吃罢，我一个子出去兜别相啧。城市旅游，我蛮喜欢乘公交车观光亇，横省省力力，看看风景。不过城市是全差不多，乌鲁木齐城市面貌，轧实撘郑州、南京、上海昰排全差不多，只是路名嘞站牌名头嘞啥除脱著汉字，还有维吾尔文，记得好像公交车上嘞路口塰墪还有维吾尔语报站嘞交通文明提示嘞啥。不过乌鲁木齐亇安全措施还是更加严格亇，每只公交站头好像全有一个安全员亇。毕竟，塱某些问题彻底根除前头，安保亇加强还是保障我伲最广大民众安全亇必要措施。

城市里乡，各种博物馆对我蛮有吸引力。对牢地图上有博物馆亇场许钻，摸发摸发倒畀我摸着著新疆地质矿产博物馆。里乡各式各样亇奇珍异宝是行我眼界开足呃！我对奇石蛮感兴趣亇，不管实际价值哪恁，横我觉着蛮灵就镊归来，当然也呒能忒大，辨恁背不动亇，压杀脱嘞！当然，博物馆里亇石头，饶赞，也只有能饱饱眼福啧。

地质博物馆出来，豪髞就近跑到新疆博物馆去参观，结果吃着碗闭门羹。呒办法，佷要前头一只博物馆里看称心么只好牺牲后头一只啧。横想想头话亇：“错脱亇物事多嘞！”

想想还有何塱？嗐，对啧，乌鲁木齐红山一直名气大得砰砰响，一定要去看一看，乃么又是公交加上“11路”，几经曲折摸到红山。红山就塱城市中心，从顶上俯瞰，平地拔起一座宏伟亇现代化城市，相当了不起！可以想见要经过几几许许人一眼一眼建设起来。上头还有林则徐像，实在值得我伲所有中国人铭记。各族人民轻松愉悦亇著红山公园里散步、观景，享受夏日夜快亇美好时光。横日子蛮长嘞一直好别相到八点多钟。

离开红山公园，乘地铁回转。地铁蛮新，好像也刚开通不长远。标牌全是英文、汉文、维吾尔文。回到宾馆，睏。

7月26号，出发朝东，目标吐鲁番。先看坎儿井，再看葡萄沟，阿末脚去火焰山。火焰山，从景区外头远远里也好看亇，轧实就是光秃秃一座山。但人总贯有眼“狗添螺蛳壳，不舔掉不落”，我一个子买著门票进去，一定要跑到山脚跟嘞摸一摸，臩一臩。结果话真像老法人话念：“望山一尺，跑得眼白！”看看就塱眼门前，跑是跑畅跑畅！乃辰光有限，头打电话来催啧。算啧算啧，错脱亇物事多嘞！回转回转！佷话阿喥头喥脑，神经病棺材？！大热天色，耀日长光，日头辣辣较，光场滑地，攩荫也呒曼，“蹦送蹦送”拱来拱去，阿全可空拱芋艿荷？！

火焰山出来终七八点钟啧。开到城镇里吃夜饭，好像是维吾尔特色饭店，独记得一大蛮块羊肉噢吃得适意得！吃罢到外头湖滩边头散散步，像只公园一样亇，进去也要身份证嘞安检亇。里乡人蛮多亇，也全笃笃定定，适适意意，一派安宁祥和亇氛围。

10点多钟，饭店出发，好像是到吐鲁番站乘火车。横只站头是远透远透！车子著暗夜里亇茫茫原野上奔驰。到站头快啧，有只检查站，军警叫伲下车到站头里验身份证通过。结果里乡检查身份证亇荷枪实弹亇军警一看伲上海亇，开心嘞个激动，话自家著上海当过几年消防兵，嘉定嘞还有好像闵行嗫何塱全墫过，我问当年阿是著嘉定环城路上亇消防队，佢激动得话是亇呀！还用不大熟练亇上海闲话撘伲俦白话著両句。真是一种他乡遇故知亇感觉！上车临跑，佢特特回回从层层防护亇检查站里冲出来，用上海闲话撘我伲俦挥手告别！

想想昰排军警真不容易，从东到西，一歇儿保障著繁华都市亇消防安全，一歇儿戍守著西北旷野，随时准备应对高度复杂亇安全挑战。著暗夜亇荒原上，时刻要手握钢枪，严阵以待，神经紧绷，突然来著几个“老相识”，哪恁有能不激动嗫？

凌晨一点多钟亇火车，已经是7月27号啧。塱吐鲁番亇一日全是著高昌区活动亇。嘉定电视台边头亇高昌路，大家应该有眼晓得亇。上火车，下一站——新疆西横头亇喀什。昰段路不得了呃！1300多公里著嘞！终相当于上海到北京、西安、广州昰排城市亇距离。横先睏。待觉转，大天白亮，外头还是茫茫原野，有荒漠，也有绿地。但爿天话腻透腻透，灰礴落拓亇。终下昼五六点钟到亇喀什，整个城市像笼罩著塳尘、浮灰里亇，第一印象稍些有眼遗憾。不过也完全可以理解，西北内陆缺水，一大爿一大爿亇荒漠化土地，若然风一吹是地面亇沙尘难免氽到天上笼罩大地，呒能奢求。听说讲有个（只有一个写“个”，连调读错）拿青藏高原亇水引到新疆亇工程计划，若假真亇落实是可以想见未来亇新疆可能遍地绿洲，植被茂盛，昰排问题应该可以迎刃而解。

来接站亇是一位大阿姊，姓王，部车子像明显大，乃坐得宽舒啧。宾馆是银瑞林国际大酒店，只大厅是大得吓煞人！大开眼界呃！安顿好终7点钟介仔。吃夜饭，休息。

7月28号，抄西南进发，行啥？上帕米尔！目的地是塔什库尔干塔吉克自治县，简称塔县。塔县位于帕米尔高原东部，引用旅游资料上亇介绍——境内群山环抱，峻岭连绵，冰峰耸立，沟壑纵横，丘陵起伏，平均海拔塱4000公尺朝上。昆仑山、喀喇昆仑山、兴都库什山撘天山四大山脉在此汇合，形成“世界屋脊”。帕米尔高原，古称“葱岭”，从历史版图来看，西汉、西晋、唐朝、清朝全控制过葱岭全部，但近代我伲国力衰弱，英国、俄国全侵略至此，三个大国在此角力，中国落败，帕米尔西部沦落他国。虽然英俄两国力量衰退，退出著帕米尔，但东移亇中国西极边界线厡旧时时刻刻警示著我伲每个来到此地亇国人。还好帕米尔东部还著我伲自家手里，守护著我伲国家亇西大门。若然昰只山势巉峻亇戳角缺脱，朝东几千里从广阔亇塔里木盆地到战略咽喉河西走廊将无险可守，对于我伲亇国防安全是相当不利亇。

不过，上帕米尔亇路蛮直，蛮好开，缓缓著爬升亇，倒也不像嗰日翻越天山亇独库公路伊恁盘肠曲节嘞险峻异常。一埭里穿过克孜勒苏柯尔克孜自治州·阿克陶县地界进入塔县地界。昆仑山最高亇三座山峰——公格尔山、公格尔九别峰撘慕士塔格峰就位于阿克陶县境内，海拔全要7500公尺朝上著嘞！其中慕士塔格峰正好著垯两县夹界头里。就是可惜，昰日爿天是实在腻打打，三座大山一座也看不见，不过路边头亇卡拉库里湖撘白沙湖倒也披上著一层神秘亇面纱。

右手边边，也就是西面亇山岭，应该就是国界山——萨雷阔勒岭，公路就是沿山脉，也就是顺著国界线朝南亇。正好还看见卡拉苏口岸，庄严坐落于荒凉亇西部边陲。昰个塱海拔高，气压低，一条咖啡著上海瘪耷耷亇，到著帕米尔是胀得胮透胮透嘞！再不吃脱是终要爆脱亇啧——当然昰个是有眼夸张啧。

终下昼5点多钟，到达塔县县城北面眼亇景点——石头城遗址。旅游资料上介绍话昰个是汉朝辰光西域三十六国之一亇蒲犁国亇王城。阿是话“塔什库尔干”本来就是“石头城”亇意思？昰座石头城，虽然已经是遗迹，但厡旧高大雄伟，有能俯瞰四周围整个广阔亇山间盆地。下头亇绿洲，远方亇群山，与之交相辉映，可以想象得出千百年前头昰垯里亇中心地位。引起我注意亇是，遗迹上还有佛龛，反映出佛教也曾经塱昰滩兴盛过。阿是话本来佛教塱西域也是广泛传播亇？后晚来伊斯兰教东进，广泛传播于中国西北部。像现在昰个塱亇塔吉克族嘞、柯尔克孜族嘞、维吾尔族嘞、回族嘞啥个全普遍信仰伊斯兰教亇。

景区出来，到城里亇宾馆安顿好，到路对过吃好夜饭出来街上兜兜。昰塱海拔高，氧气少，走路全要笃笃定定、慢慆慆，辨介要啌亇。头么稍些有点浑淘淘。不过长年生活著昰滩亇塔吉克族终应该不大有昰排感觉啧嚷？经典亇一幕出现啧——几个当地年轻人正好骑著（deh）马著（leh）路上跑过，著（lah）城镇背后高山亇映衬下，别有一番风情。9点钟宽点，塱当地标志性亇雕塑——帕米尔雄鹰下拍好照，再一埭边趤归来。睏觉。窗关脱，辨径冷亇。

7月29号早儿头起来，天像明显好啧，宾馆门口头望出去，远方亇山色彩、层次分明。上车，差路！回转喀什。今朝耀日长光，能见度蛮好，一埭边风光无限，有荒坡，有绿洲，朵朵白云天上飘。正著笃笃恁欣赏嘞，不晓得啥辰光，天上乡话有一大蛮块白颜色亇物事映入眼帘。大概因为朝北开亇咾，我坐著右后角是朝东亇，日光正好东天照过来，头起先还朆大看清爽，道著云嘞，等定睛一看——噢，斥短寿，昰个是座雪山喂！昰座山峰是真亇高得热热昏昏，直接戳到天上亇嘞！整个只山头全白搨搨亇嘞！可想而知要高出雪线几几许许著嘞！山顶倒也正好一熢云搭著塱，是云是雪倒是也一时头上难以分辨。根据地图判断，昰个就是享有盛名亇冰山之父——慕士塔格山！巍巍昆仑第三高峰！

听我一激动么，両个老法师也头爿㧙转来朝外头望，第一反应也是：“云！”再仔细一看么，不对，是山！也忍不牢啧啧称奇。我是横也粗人一个嘞独会得“棺材”“斥短寿”“棺材”“斥短寿”感叹！両个老法师全替我数好著塰嘞！呒办法，慕士塔格峰实在是雄伟得摄人心魄，震撼人心！海拔要7500公尺朝上，即使考虑着我伲所处位置大约也要海拔3000公尺户荡，矗立著我伲眼门前亇厡是一个高达四千几百公尺亇存在！就像佷看420公尺亇金茂大厦撘468公尺亇东方明珠觉着蛮雄伟，想象一记：拿佢垯亇高度乘以10，就是慕士塔格畀佷亇感觉。怪不得人们一直会对高山产生崇拜之情，著佢面前，人实在是忒渺小，忒渺小啧！

拣著块绿洲下来拍照，拍好继续前进。上日看不见亇风光，今朝看见啧；上日看见亇风光，今朝看得愈加清爽啧。虽然昰塱亇山区总体看上去植被稀疏，荒凉贫瘠，但却长年默默亇扮演著中华守护神亇角色，牢牢坐镇著垯中国西大门。廿年前头，1999年，初一初二亇辰光，夜头一直听收音机里亇《中国民歌》节目，头一趟听着《祖国万岁》昰首，开头就是“从那昆仑山颠到那扬子江尾”，一句闲话展示著我伲国土东西里亇广度，但听著廿年，唱著廿年，从来朆像今朝昰恁深切体会着昰句歌词亇精到。我来自东横头亇扬子江尾，从小看惯江海一体亇壮阔。今朝走上西横头亇帕米尔，仰视高耸入云亇昆仑山颠。两条巨龙最壮观亇部分，正好位于国土主体部分亇东西两个横头。就是稍为有眼可惜，等到著公格尔山撘公格尔九别峰下头，山峰畀云雾笼罩，未能饱览全貌，但顺著巉峻亇山坡朝云雾深处仰望，厡旧有能感受着佢垯磅礴亇气势！

帕米尔下来，回到喀什。下昼参观香妃墓后回到银瑞林国际大酒店。

7月30号，游览喀什古城。只开城仪式蛮有劲，但我觉着顶顶有看头亇是前奏、热场亇辰光，一位维吾尔老先生一个子著众多游客面前翩翩起舞。慈祥亇笑容，优美亇舞姿，由内而外散发出一股热情撘开放亇姿态，吸引著大家亇目光。有两位游客明显也是受到著感染，也情不自禁亇走出来跟著一俦翩翩起舞。新疆歌舞远近闻名，但当真正近距离接触刚发现，佢亇魅力超出著佷亇想象，即使著一位古稀之年亇老者身上也显得如此迷人。不过颇有意思亇是，后头一群红衣美女——礼仪小姐倒立著塱一动不动，像是陪衬，倒也蛮有劲。

仪式结束，城里兜著亇突圞。喀什古城相对于江南古镇，建筑式样当然不大一样。各种店铺么，我专门相心看石头店，欣赏奇石。不过看得最最呆亇是啥？両只葫芦！棺材，大透大透嘞！昰个品种像撘伲昰塱不一样亇。

穿过古城是艾提尕尔清真寺，也进去参观参观，印象比较深亇是硕硕里乡亇大殿要脱脱著鞋子嘞进去亇，乃么伊个夯土墙要一公尺厚著嘞！

吃好饭，上火车，回乌鲁木齐。著伽师县界，望出去点山也像五彩滩一样色彩缤纷，花丽斑斓，赞透赞透，可能也是类似亇成因。塱疏勒县、巴楚县境内，看见地下一大爿白搨搨亇，像雪，但呆想想不可能，作兴是传说中亇盐碱地。车厢里有位来自重庆扎根于新疆亇专门搞奇石、玉器亇老法师，夜里一头啀馕，一头津津有味亇听佢介绍相关知识，眼界开足！

7月31号上昼，抵达乌鲁木齐站。行李寄著垯火车站，大家自由活动。我是已经目标明确——新疆博物馆，一个子乘车子去啧。博物馆里信息量相当亇大呃！武器、乐器、农具嘞啥一应俱全，最最有劲亇是唐代西域女子发髻图例，还有唐代女子画眉样式亇演变，両张图嘲得来！新疆博物馆还有一个特色，就是干尸蛮多，看上去吓恅恅亇。大概撘西北旱干亇气候环境俦有关。

博物馆出来，到国际大巴扎去兜著圈。引用网上亇介绍是：“世界规模最大亇大巴扎，集伊斯兰文化、建筑、民族商贸、娱乐、餐饮于一体，是新疆旅游业产品亇汇集地撘展示中心。”对于我来讲，虽然购物亇欲望不高，但体验体验风情还是相当需要亇。还有，就是，弄両只馕，火车上啀啀。

拦著部差头回火车站，到行包寄存处终4:20介仔，等両个老法师回转。汇合，候车。夜头亇火车，逐点逐点朝东开出去啧。到著深黄昏，人家全睏啧，我还埋著窗盘上，夜景一直看到新疆亇东大门哈密。

第二日觉转来，火车已经穿越河西走廊，著垯兰州市·永登县界啧。继续一埭欣赏锦绣河山，感慨万千。复杂亇地形地貌、丰富亇矿产资源、多样亇民族文化……构成著我伲昰个伟大亇国家。我伲赖以生存亇各种资源来自于昰个家园，作为受益于昰片土地亇每个个体来讲，应该要有大局意识，始终注意团结同处一个国度亇各支人群，理性亇维护领土完整，昰个涉及着我伲每个人亇切身利益。从江南不远万里来到新疆，畅享无数前辈艰苦奋斗创造出来亇良好条件，亲眼乌珠见证日趋均衡亇稳定发展，为生活注入著新亇动力！相信我伲亇国家必将更加繁荣富强！

疁·浏河长江

2020年2月3号  礼拜一

庚子年  正月初十

嘉定建县802周年