广西越南兜一圈（苏沪古典汉语）

广西越南兜一圈

2018年7月18号，上海，火车，出发。

7月19号到达广西桂林。叫著部黑车，个驾驶员倒也像模像样亇弄得像个导游恁领著我伲兜兜。上昼么独秀峰景区看著看。不过只棺材不大老实，要调枪花亇，乃横卖也卖畀佢啧。亏得我伲両个老法师也老江湖嘞还好撘佢俦缠缠。下昼日头辣辣较么又我一个子出去徒步侦察啧。横传说中亇漓江嘞象鼻山嘞全看着啧。桂林城市面貌蛮赞，小清新亇感觉。等五六点钟両个老法师出动著么我就前头开路开路，又到漓江浒上嘞象鼻山塰墪兜著兜。

7月20号，跟著个团嘞到少数民族村寨去看吊脚楼。路上个少数民族导游话笑讲，现在啊，少数民族么塱汉化，汉族么塱洋化。轧实想想是昰恁亇，佢反映著全球化过程中弱势方朝强势方一级一级靠拢，总亇趋势是大家变得越来越一样，方向是朝文化强势方，由文化强势方引领。导游话，之所以派佢出来做导游，是因为佢是佢垯村寨里普通话讲得最好亇。像我伲关心语言资源保护亇圈子里一直有人存在误区，认为通用语亇推广是一种罪恶，外地人来不入乡随俗讲我本地闲话是不可接受亇。但佷理性想想，通用语阿需要？需要亇呀！只要佷要用，坚决不肯放弃，等于用实际行动表明侺需要，嘴面上不承认也呒用亇。就像昰歇儿头儿佷跑著人家家乡，侺阿肯吃力啌啌去学著当地少数民族语言撘当地民族俦交流？也不肯亇呀，也望著人家撘佷俦全有共同亇一套闲话有能互相沟通，昰恁要省力脱交关著嘞！故嘞佷也覅怪国家拿北京音推广到全国，大家全有昰种跨区域交流沟通亇需求，並希望拿语言交流亇成本降到最低，故嘞国家教著大家掌握一套共同亇闲话是一拍一脗缝亇事体。毕竟佷也不想话著半日天人家一句也听不懂或者人家讲得半日佷一句也朆听懂。

下昼，去漓江漂流。塱杨堤登筏。昰垯户荡属于桂林下头亇阳朔县。乘著筏一埭里朝南行，漓江水青亨亨，四周围喀斯特峰林环抱，的确美不胜收。漂流结束，到著一个叫聚龙潭亇景区，大概是伲嘉定汇龙潭失散多年亇兄弟。里乡主要是只溶洞，乘只小船开进去，基本就是石柱、石笋、石钟乳，打著一眼景观灯。可惜地质学知识实在是欠缺，辨恁倒像一跤跌著白米囤里。景区出口（多读著一个“上”）上车塰墪，望得着一只山头，像只门洞恁，真是大自然亇鬼斧神工，大概喀斯特地区亇石灰岩比较好雕琢。

夜头住著阳朔县城。阳朔城一方面有点古色古香亇味道，一方面也不乏现代化亇气息。乃么四周围有両只山头拱卫，觉着有种远离外界侵扰亇神秘感。但是嗫，佢又熙熙攘攘，闹热非凡，夜头亇街市是真人巷巷尽尽，轧足输赢呃！特别是昰个益田西街，真亇是人头攒动，摩肩接踵！虽然有眼轧，但也非常高兴，全国东西南北到块全有繁荣亇景象，跑到何塱全有能享受着便利亇条件。

7月21号，高铁上欣赏著一路亇南国风光，到达省会南宁。正好巧，昰日我伲老爷、老大嘞排全著南宁，本来悫张好要一俦吃夜饭亇，结果话到著宾馆塰墪话边头一样呒啥啥，道路么又正好塱施工，外环境不大好，乃么両个老法师决定南宁不兜啧，直接到中越边境亇德天跨国瀑布景区。排老法师也大本事，大概离火车站也不远嘞到站头上又去叫著部车子，我伲看行李亇倒还正好垨著宾馆边头亇饭店里避过著一场大雨。差路！

现代化亇交通条件是便当，路蛮好跑。虽然还要开几个钟头，但不管哪恁晾饭时里动身，当夜可以到。难以想象，古代跑昰点路要几几许许辰光。齐夜快，进入著崇山峻岭亇中越边境，可以想象得出，若然打起仗来，昰个塱炮已经轰得着啧。突然，驾驶员点牢前头话，对过就是越南啧。我朝前望，像也呒啥特别亇界线，大概就是按照条山沟划亇，对过亇山就算越南。顺著边境线开著段，到著几爿饭店塰墪，拣著爿吃好，住好，乃么出来兜兜，原来对过就是景区门口。只景区门口大厅嘞停车场嘞全蛮大，不过夜头空荡荡亇，人也呒曼，但昰种感觉也蛮好——夏天亇夜晚，南国亇边陲。

7月22号，一早，进景区！边头亇山上还云雾缭绕、迷露荡生嘞！蛮赞蛮赞！车子大概是抄西北沿塘浒开亇。西面隔河就是越南，条河像傍浏河狭点，可能撘蕰草浜差不多阔，对河塘浒上稀零敞冷有両埭房子，有亇房子上还有越南国旗。到著瀑布快，下车步行，已经可以远望着瀑布啧，乃么打人行通道逐点逐点下坡接近。河滩边头一只只筏歇好著塰，结果发现有亇筏是对过越南开过来亇，両个越南人扑著垯路边头亇栏杆上，朝跑过亇游客推销小商品，好像佢垯也会用北京音表达亇。毕竟大家全掌握一套辐射力广亇闲话，交流起来全便当，生意自然也好做。卖脱眼物事，赚眼铜钱。实际上想想，人全是塱为生存奔忙。

到著瀑布脚跟，河道明显阔点。昰只瀑布分段、分级亇——当中有块地部隔开亇，上头还有界碑，西带边越南嗰面还分著几路水下来，东带边中国昰段么上下头还分著两三级。乘著筏开出去，日光照耀，西带边亇瀑布前头正好一条雩。

回到东岸，爬到高头上，可以统观瀑布全貌。朝西望越南界，可以看见山腰上像寺庙恁亇建筑，还有像亭子恁亇，可能是——瞭望哨。

日中离开德天瀑布，吃好饭，奔赴边境重镇凭祥。夜头兜兜，感觉蛮好，城镇面貌，大同小异。住著夜，23号一早直扑边界线上亇友谊关。记得像塱一个单位嗫还是停车场嗫啥个场许，大概老法师提前联系着亇啥个人，等好著塰，可以人民币兑越南盾。老实讲我觉着有眼吓丝丝，昰种人塱兑亇阿可靠啊？若是弄着假票子么乃么死！乃横両个老法师老江湖嘞，昰点把握总有亇嚷！乃么昰个人话，过边检亇辰光，要夹个张十块头小费著塰，辨介场时通不过亇。

终于到著大名鼎鼎亇友谊关。关口城墙上有三层城楼，顶上国旗、国徽，屋檐底下挂著両只饭瓜灯笼。出关之后记得先过我伲自家亇边检，过去之后隔过广场望着对过越南亇国门，像五角星上半部，顶上一只国徽，撘伲中国国徽也像得来，只是要少四颗星而已。路边头像大会堂恁亇场馆门口扯著越南国旗金星红旗，轧实相对于我伲五星红旗来讲就是独星红旗。旗杆底座一串越南文，我只猜得出“友谊”两字，旗杆背后亇建筑上是国徽，下头墙面上一串文字我也独认得“越南”两字。越南语受汉语影响相当深远，据悉词汇里大多数是汉语借词，语音方面声母韵母声调与古汉语对应相当规整。譬如越南国名Viet  Nam，佢拿“越”昰个字古汉语亇韵尾t，“南”昰个字古汉语亇韵尾m全完整保留著塰。特别是“南”读nam，基本保留著古汉语亇语音，就像“江南”两字韩国鸟叔唱gang nam一样，也是高度保留著古汉语语音。朝鲜、韩国、日本、越南全是历史上受汉文化影响相当深亇国家，语言方面保留著交关古汉语特色。

越南本来也用汉字记录，但后首来法国入侵后禁止汉文，推行拼音化文字。若然佢垯厡用汉字书写，嗰么昰排标牌嘞啥我伲看上去一目了然。但佢现在换成功著记音亇文字，乃么死，只好根据大概亇读音猜谜谜子。不过还好，毕竟还好认出一眼。譬如“友谊”亇“谊”，佢拼写出来是nghi，大概可能是ngi昰恁亇读音，撘古汉语语音蛮对应亇，就像我伲苏州、上海昰块发nyi一样，也是保留著古汉语亇鼻音声母。昰个佷若是看见汉字独晓得北京音读yi倒不一定看得出。

到著越南亇边检大厅，排著队好像是等待护照登记。负责亇是越南军官，若然朆忘记脱，看肩章好像是尉级军官。望上去也蛮严肃，蛮威武。我看看前头亇人，护照放到台上，尽管台沿上一圈高起来望不大清爽，但好像看不出人家有夹钞票、拿钞票亇动作。我幽哝哝撘両个老法师话著嘞，大家想想呒得必要塞铜钱，覅人家倒蛮正常，我伲倒弄得像煞伊个啥个，覅呒得事体弄点事体出来，跄等通不过再讲。乃么拿本来夹好亇一张分又抽脱啧。还好，顺利通过，呒啥刁难。估计即使本来有，后晚来也整治过啧。

过著边检，部像电动观光车恁亇车子拿伲驳到著车站，开进车站是边头一拦排车子前头一拦排驾驶员手麾得！驳伲亇部车子停著路对过买票塰墪亇。作兴佢垯有规定亇，両个驾驶员呒能跑到路昰面来拉客亇，倒也像有严明亇纪律。老孙叫我去谈生意，我哪恁敢啊？！行情不懂亇嘞，慢慢畀佢垯斩得血淋带渧嘞！乃么老总去，我边头跟好，协助。佢垯亇车子大概好乘9个，名分账一人50块。我伲撘佢垯讲好大概是共总250嗫300到首都河内，忘记脱是英语话亇嗫汉语话亇啧。乃么我伲上车，上车著就话发车，个越南人一头关车门一头像塱喊：“包车！包车！”

到河内大概150公里，路上両个老法师连连感叹：“昰记合算啧！”我是横不晓得行情亇嘞，合算不合算也呒不概念亇，畀人家卖脱也不晓得亇，横只管看风景。滑稽亇是，出关之后不多几时就可以经过同登、谅山亇，我大悫其张当著是蛮有规模亇城镇，但开著交关路之后我刚发现，阿会得错脱啧？不晓得佢亇城镇规模是不大嗫还是昰条交通要道並不直接穿过城区。不过看看地图，看看路牌，仔细品味越南语音撘汉语亇对应关系，还是蛮有劲亇。像同登，大概读Dong Dang；谅山，大概读Lang Son；朗庄，大概读Lang Trang……佢昰个“谅”撘“朗”看来韵母也一样亇，就像伲昰塱话着“laon衣裳”亇“laon”，轧实本字蛮可能就是“晾”，像“aon牛”亇“aon”，本字蛮可能就是“【鱼央】”一样，当然“一条鱼”加个“中央”亇“央”，古代韵书记载，本来就有ian、aon两读。乃么“河内”两个字，大概读Ha Noi。后头“内”昰个字亇读音看得还是蛮明显亇，头一个“河”，相对于古汉语gha昰恁亇读音，看佢亇拼写可能是清化亇，变成功清音h，但韵母看来厡旧保留古汉语亇读音。就像伲苏州、上海昰滩，“gha里”“gha塱”就是“人可——何”昰个字保留古汉语亇读音一样。

一埭里看下来，从自然方面来看，越南北部撘广西像也差不多；从人文方面来看，虽然已经去除汉字，但从字母拼写上还是可以看出大家共同亇文化渊源。还有一个似曾相识亇就是——高度类似亇国旗撘党旗，主要差别在于佢垯亇图案是居中布置，我伲亇是摆著一只角上亇。不过，从城镇面貌撘交通条件上来看，佢垯搭伲俦还有眼差距，稍些觉着有眼年代感。还有个引起我注意亇差异就是——佢垯亇集装箱卡车嘞啥大型货车是尖头亇，像电影里美国用亇伊种，但我伲亇是平头亇。

虽然路不阔，但也蛮好开，蛮通畅，也並不是盘山公路恁曲曲绕绕、上上下下亇，算是山间平地亇直路，並不像想象中亇险峻。到河内快，地势明显平荡，四周围也看不见山啧，应该就是红河三角洲啧。等开过一条像黄浦江恁亇大河，乃么晓得，过红河啧，前头就是河内城。远望河内，高层建筑並不多。当然，闹猛还是相当闹猛亇。我横总贯对牢地图，随时留心好前进方向撘所在位子，心里要有底。

乃么昰个辰光问题来啧，大概是讲着价钱著嘞驾驶员悻得骤得不肯。我坐著后排，边头也有个越南人，头先路上接亇，大概佢垯一俦亇，作兴成恐驾驶员一个子搞不定我伲昰恁多中国人嘞特程叫著亇帮手，年纪轻点，会眼英语，沟通起来阿像便当眼，我就称佢“翻译”㕹。乃么翻译头先问我“money，money。”看我呒得反应，乃么到前头去，大概佢要先下去亇，也要等著分铜钱亇。乃么我伲撘佢垯俦价钱讲不拢么驾驶员骤得开著车子塱河内兜圈子。后首来个翻译铜钱拿不着，大概也要先跑啧，塱只路口塰墪悻悻恁下去啧。乃么个驾驶员也发詪劲啧，“行——”开著直接抄东北又开过红河啧，像要开回边界一样。不过过著红河之后佢像朝东开啧，並不是回到谅山、同登亇方向。我地图、指南针一直对照著塰，随时随刻注意动向。老孙坐著副驾驶座上，要想撘驾驶员沟通，“hello，hello，”，驾驶员睬也不睬，也詪脾气。乃么再撘车站上一个会讲普通话亇人通话，打著几趟电话。驾驶员嗫，也停下来啧，大概塱河内东郊一垯铁路道口塰墪。难惇讲定当，应该支付几许越南盾，算算大约四百几，四五百，我横算术不好亇嘞也呒曼概念亇。阿末脚讲好横五百人民币么好啧。乃么终于又肯开到宾馆。宾馆好像塱著名景点还剑湖西面几个街区，大概叫ROYAL PALACE HOTEL，翻译过来阿是叫“豪丽大饭店”？里乡亇服务员看见著连忙跑出来帮伲拿行李嘞啥，蛮热情亇。驾驶员横拿着著五担分么也太平啧，毕竟蚀本生意总贯不肯亇。晚转来老总分析，实际上人家也不是有心要斩佷，照名分昰点铜钱是要亇，只是因为语言不通嘞造成亇误会。想想也是，好乘9个人亇车子一人50么是也要450亇，上著6个人就叫著发车么人家是当包车亇，阿末脚一定要收相当于四百几、冒五百亇越南盾是也朆大亇。

安顿下来，先休息休息。看看电视，觉着真似曾相识，特别是啥红领巾做好事亇公益宣传是真撘伲亇像透像透！就是可惜，虽然晓得里乡有相当多亇汉语成分，但硬碰硬现代各地语音分化之后是听不懂亇，就像广州闲话、厦门闲话、温州闲话嘞啥，虽然全是汉语，但呒得汉字字幕，外界要硬听是蛮难听懂亇。北京语音叫只是近几十年通过媒体、教育推广到全国嘞大家比较熟悉，像伲老代头里也蛮难听懂亇，毕竟本来就是一种外地闲话嘞！方言是语言亇存在形式，（多读著“佷讲一种闲话”）佷讲一种语言，实际讲出来亇总贯是其中亇一种具体亇方言。像越南电视里亇越南语，若是朆猜错脱，应该也是用亇首都河内亇语音，即使还有使用西贡语音亇，也不大可能大大小小、角角落落所有地点亇语音全用来做节目。有点注意着，电视里表示越南版图，塱西沙群岛撘南沙群岛亇位置，也用著相同颜色亇点标（多读著一个“志”）著出来，用意相当明显。

北京辰光大概六点多钟跑出去兜兜。外头亇街路全狭哝哝、轧挤挤亇，乃么行著开摩托车亇，开亇人么一人一只越式头盔，也蛮有劲亇。有点倒真覅话啥，両个越南小姑娘倒是出客亇！怪不得三不两时听见话啥讨越南娘子。外加昰个不是话啥三个两个，而是普遍性亇，大份，颜值相当可以！乃么一埭边朝还剑湖方向趤过去。总亇讲来，感觉撘国内某地差不多，若然招牌厡用汉字亇说话是愈加像亇啧。

到著还剑湖上，看看只湖嗫，大大不大透，风景也不算特出，但是塘浒上刻著汉字亇建筑引起著我亇注意。东岸有座塔式建筑，上头有 “报德门”嘞厛字样。北横头有只啥个景点，门口头全是汉字，“福”“禄”两字大透大透，还有门对“临水登山一路渐入佳境”“寻源访古此中无限风光”嘞啥，亲切得不得了，一看也是有故事亇场许，就像“还剑湖”昰只名称一样。还剑湖，越南语大概叫Ho Hoan Kiem，应该就是对应“湖”“还”“剑”昰三个字。昰三个字，一千多年前头亇中古汉语大概是发ghuo ghuan kiem，现代越南音前头两个字亇声母撘北京音一样也清化成h一类啧，但其他基本保留著古汉语亇发音。

还剑湖北面闹热非凡，虽然建筑高度不高，但厡旧不失为一座繁华亇都市。我伲一头兜一头觅食，笃笃定定享受属于昰塱亇一份生活情趣。战争已经结束交关年数，街路上也看不出啥战争亇痕迹，人们过著像我伲一样平凡、平静、平常亇生活。外国人蛮多亇，总贯看见金发碧眼亇，可以想见肯定还有交关像伲一样可以冒充越南人亇外国人潜伏著茫茫人海之中。

趤发趤发，也有点晏啧，但有劲亇是，北京辰光恁十点钟啧，路上摩托车话厡旧巷巷尽尽呃！“乎——乎——”浩浩荡荡，源源不断！像塱兜圈子、转突圞呃！我怀疑阿会得专门夜头出来吹风凉啊？佷问我马背上亇民族【阿曾】见识过我倒真朆见识过，但摩托车上亇民族倒是实实在在领教过啧！觉着倒也是越南一道可爱亇风景线，就是不晓得污染阿严重。

7月24号上昼，両个老法师要到爿大卖场去。只大卖场也要过红河亇，像撘上日驾驶员发詪劲开亇方位差不多，也塱郊外啧。去亇车子哪恁叫亇我忘记脱啧，横单程亇。出来乘车不便当，忘记脱啥道理啧。我跑到外头路边头公交站头侦察，正好有个小青年塱等车子，像个大学生。乃么我用英语问佢，佢撘我讲清爽，态度也蛮好亇。应该要肯定，各国学堂里推广世界普通话也是需要亇，跨国交流亇辰光的确带来著交关便利。像伲宾馆里碰着问题要解决，店里乡要完成交易，基本全要靠世界普通话亇——除非对方会讲中国普通话——毕竟我伲世界普通话亇水平还有限。回到大卖场门口，大概老法师叫着车子啧啥，横用不着乘公交车啧。乃么有劲啧呀，今朝不晓得啥个好日脚，交交关关越南军官聚集到昰塱，阿会得啥人家办事体吃喜酒？看肩章，军衔蛮高，记得校级军官也多个，将级阿有？乃有眼忘记脱啧，像划见歇。我伲塱门口头等车子，佢垯就著伲边头，互相寒暄。也有着便装亇，看排场像大官。不过不敢瞎拍，覅呒不事体弄点事体出来。

回到宾馆塰墪，吃罢饭，老法师又要休息避暑啧，我么自然闲不定，又要朝外侦察啧。昰趟目标比较明确亇，看见地图上有越南军事博物馆，心里痒得呒哪恁，总贯想去看看，乃么就朝伊只方向跑过去啧。我点越南盾像煞还朆用歇，但昰个辰光覅忒舍得摸出来噢！就是几许铜钱还是搞不清爽，乃么门口头负责亇女军官蛮友善亇替我讲清爽，买好票。站岗亇卫兵小伙子态度也蛮好亇，也好用英语交流亇。某种程度上也反映著越南对外开放亇国家姿态。当然，客气归客气，不等于呒得利益诉求，不等于不会采取暴力手段。人横全昰恁亇，呒曼利益冲突亇辰光全可以客客气气亇，要争夺利益著就本性毕露啧。军事手段就是利益矛盾不可调和亇极端措施，武器装备就是为利益争夺而创造亇杀人工具。场馆门口就是一部坦克一门炮，上来就行佷嗅着某种气息。踏进大厅是又有一部坦克像镇馆之宝恁炮口高昂，直对门口，像煞彰显著一个国家亇利益诉求撘强硬姿态。

横先场馆里乡看看，阴凉阴凉。里乡各式各样古往今来亇杀人工具，冷兵器里印象比较深亇是両把像【釒絜】子恁亇刀撘各式各样亇铁蒺藜。热兵器里，伊排像甏嘞竹筒嘞厛做亇像地雷嗫炸弹蛮有劲。当然昰歇儿头儿横不打仗嘞口轻绵绵讲讲，真打起来是想想劈著身上，戳著肉里，炸得烂肉粉身残酷得海万！乃呒办法，人之间利益冲突不可调和么只好上手，撘自然界両只动物为抢块地部，夺只雌亇，头顶，嘴咬，踢卵子，打得额角破碎、血淋带渧一样亇呀！人类社会亇交关问题，轧实想想自然界亇情况，並不难理解。

里乡有只影视放映厅，正好坐下来看看，好像放亇是奠边府战役。虽然听不来，但画面何其熟悉！撘伲一只套路亇。有意思亇是，看亇像煞秃是外国人，一张照片拍出去，连我著塰共总十三五个人，看看前头像全白人嘞！不晓得越南阿有白种民族？ 

里乡垨著歇儿，乃么出来参观外场。展厅对过有个三层高台，上头一座塔，塔顶一面金星红旗。昰个建筑好像叫旗台，上头还有“旗台”“迎旭”“向明”“回光”嘞厛汉字，看来有点历史亇。可惜个塔身上是也畀人家搨得花透花透，英文、汉文、越南文一应俱全，真作孽啊！看来昰种坏习惯作兴是全球通病——靠瞎搨来刷存在感。颇有讽刺意味亇是，为此著越南去脱著汉字，用著拉丁字母，一眼望上去还道著大份是欧美人行亇嘞！若然佢垯厡用汉字，嗰是望上去像大份中国人行亇。不过不管啥人搨亇，昰种行为实在是忒推扳啧。

旗台上望下去，是个露天装备展示区，飞机、导弹、坦克、大炮样样全有。有亇看上去像缴获亇敌军装备。有块区域像是航空炸弹，我仔细看著看，不同亇航弹只壳落子厚薄推扳蛮多著塰，乃么我拿著卷尺一只只量量看，结果头颚起来突然发现对过两楼上一个越军军官用警惕亇目光盯牢我看，终阿会得当我敌特分子？

展示区有座雕塑蛮有意思，一个士兵，看副样子像白人，管枪两手捏牢著横著胸脯头，右脚馒头跪著地下，颈骨、肚皮、大髈、向面上几只窟窿洞，透出一丝恐怖气息。用意蛮明显——警告潜在敌人：胆敢与我为敌，就是昰副下场！当然，侵略佢，是敌人；抵抗佢，同样也是敌人。各个国家全昰恁——自家么要攩牢人家亇侵略，自家侵略人家么也要拼命拿人家揿杀脱，总亇讲来就是为著争夺利益，蛮难讲啥正义不正义。从中原打到中南半岛是侵略，从中南半岛北部一埭里打到南部也是侵略，越南狭长亇国土形状就反映著从红河三角洲打到湄公河三角洲受制于长山山脉撘南海阻挡亇地理因素。德国侵略英法俄，但英法俄何里个不是大侵略者？日本侵略美国夏威夷，发源于大西洋岸亇美国不朝西侵略哪恁会碰头日本？侵略加拿大、墨西哥、西班牙、夏威夷全是美国亇杰作。大家全塱为自家亇利益集团拼命争夺。而各支强大族群扩张亇过程当中，又全会有得有失。塱总体赚着亇过程中也不可避免亇有所损失，擘脱眼蟹脚，或者著利益角度得不偿失亇情况下而主动放弃。若是纯清从土地亇角度来看，英法德全丧失著大量海外土地，俄国西部、南部各民族纷纷脱离，菲律宾撘古巴从美国占领下独立，外蒙古撘越南从中国分离……某种程度上来讲，作兴可以讲是某一强大族群核心区对周边亇辐射力撘控制力达到著极限，故嘞边缘部分也难免分分合合。

值得玩味亇是，越南虽然从中国独立出来，但语言照样有浓厚亇汉语特色，语音对应，词汇大量借用。虽然从法国统治下独立出来，但文字照样用法国人替佢垯制定亇方案。虽然塱其他大国亇支持下打跑脱著美国人，但照样广泛学习具有世界普通话地位亇美国人亇闲话——英语。虽然三十几年前头还塱撘中国俦“呯呯嘭嘭”打，但中国普通话照样还有一定亇市场，觉着像煞是仅次于英语亇外语。

说明啥，语言文字，作为人高度依赖亇表达工具，具有极强亇使用惯性撘现实性，蛮难凭某种情感就可以轻易颠覆亇。塱使用惯性撘现实需求面前，激烈亇某些主张是相当苍白亇。就像我伲，昰歇儿叫佷放弃阿拉伯数字阿肯？叫佷放弃拉丁字母制定亇拼音阿肯？叫佷放弃来自欧美、日本亇借词阿肯？

五点钟户荡离开越南军事博物馆。回到宾馆，大概六点半把撘両个老法师俦全体出动，一埭里抄西北趤过去，一直趤到竹帛湖嘞西湖塰墪。湖滩边头看看両个人着象棋，撘伲一样亇嘞！不得不话是蛮亲切。但国家之间亇关系相当复杂，不是话文化近嘞就一定要好。英德争霸、斯拉夫分家、中日恩怨，还有加拿大对美国侵略亇抵抗撘反击……交关问题不是一厢情愿想当然亇。

吃著眼嘞回转来跑，差不多日光搭火光，经过一只大广场，好像是叫巴亭广场，大透大透，的确气势恢宏！大路大草坪，当中金星红旗，两边建筑庄重，透露出一个国家亇气势撘威严。

7月25号上昼，叫著部车子嘞朝东直扑还一个著名景点——下龙湾。晾饭时里到亇，宾馆像塱十廿楼，朝外可以俯瞰整个城镇嘞海湾，称心！我横闲不住亇嘞，半下昼把头儿就要跑出来侦察亇。下龙湾有“海上桂林”亇美称，佢亇一只只喀斯特山头是戳著垯海里乡亇，老实讲傍桂林亇看上去越加宏大壮美。近亇塱，一只只捉鱼船氽好著塰，颇有一番意境。我沿海塘一埭边朝东欣赏，好好较享受海风亇吹拂。大概四五点钟回转去，七点半把引导両个老法师重走昰段道路，适意！夜头坐著窗盘塰墪笃笃定定欣赏下龙湾亇夜景，赞！

7月26号，码头登船，（屏幕跳出新闻窗口导致停顿）朝海湾深处前进！星星点点亇岛礁，枝杈纵横亇水路，像迷宫一样，沿途景观美不胜收！有両只岛上放著下来走走，其中有一只喀斯特溶洞，著海岛上亇倒也不大多见。回到船上，海水清澈，各式各样亇海洋动物塱边头游荡，有劲透有劲透！头先游船码头上碰着両个中国人，其中一个阿是话娘子越南人嘞会讲越南语亇，帮伲带来著交关便利。我一直留心好老总哪恁撘人家俦打交道。老总善于沟通，撘陌生人俦打交道大方、洒松得不得了，解决著交关沟通问题，昰个真亇大本事噢！但我总贯哪恁学不来？

六点多钟回到岸上。吃夜饭。老实讲，越南菜真亇蛮好吃亇！清爽！不油腻！点海货吃得称心得，煞念得！

7月27号，好像是请上日両个一俦亇中国游客帮亇忙嗫还是啥个，横両个老法师又弄着著部车子，可以开到中越边界亇芒街。一埭边沿海岸抄东北行进，沿途植被茂盛，环境优雅，有亇路段朝东可以望着北部湾，还可以看见传说中亇红树林。天上一大爿一大爿亇云，蛮阴凉，场时可以望着东天下海雨亇雨条。风景如画，好好较享受。车上一俦有个越南大姐姐，傍我小点，冒三十岁，蛮出朗，蛮响快，会北京音，大家沟通便当。不过我相心看风景嘞朆多响。両个老法师欢喜哬儿陈亇嘞一埭里谈得蛮好，到著芒街还一俦吃饭。人家倒也大大方方，面对六个刚刚认得亇大男客家一点也不吓，一看也老江湖。佷想，独个子要到广西、广东去做生意亇嘞！蛮泼辣亇。

芒街只城镇也有眼规模，总体景象撘国内也差不多。作兴著口岸上嘞，汉字招牌像也多点。有爿特产店，除脱著汉字“越南特产”，还有拉丁字母新文字，读出来大概是DAC SAN VIET NAM，语序应该是“特产越南”。语音看上去蛮清晰，撘汉语俦对得齐亇，古汉语里发音短促亇“特”，就像伲苏州、上海昰滩亇发音，越南音也蛮像。“产”昰个字，从佢亇拼写上看，可能是s昰恁亇读音，应该讲来保留著古汉语发音亇特征。像伲昰塱虽然“特产”“生产”嘞啥也只好发tsh声母，类似于北方闲话，但讲着动物“产籽”“产卵”嘞啥，厡旧保留著昰个字从古汉语传下来亇规则读音。“生产生产”，“生”撘“产”，塱古汉语里，本来就是一个声母亇。虽然汉语发源于黄河流域，但有排特征著发源地倒可能已经难觅踪迹，但本来偏远亇江南、岭南甚至越南倒还厡旧保留好著塰。

立著越南国门下头，对过就有能远远里望着中国国门啧，国徽下头“中华人民共和国”七个大字赫然在目。曾经同处一个国家，但各种复杂亇利益诉求导致著最后亇分离，又塱各种复杂亇利益纠葛中上演著一幕幕恩怨情仇。戴著箬帽，撑著伞，拖著行李往来于国门之间为生活奔忙亇人们，平静亇面庞下头是一颗颗复杂亇人心，有好处亇辰光大家客客气气，利益碰磕著么攋得血淋带渧。回想历史，不禁感慨万千。不晓得人类未来会走向何方？完美平衡各人利益亇大同世界是否存在？

跨过传说中亇北仑河，回到中国界。东兴，与芒街隔河相对。城镇面貌更加现代化眼，也更加闹猛。可以贯通古今南北语音亇汉字遍布大街小巷。宾馆里亇电视放出来亇是北京语音而不再是河内语音。不过，不得不吐槽，饭店里亇菜实在是忒油腻啧，真亇蛮怀念越南人伊种清清爽爽亇烧法！

住著夜，28号早儿头，叫著部车子直奔南宁火车站。秀美亇南国风光著车窗外头飞驰。回想昰十日天亇所见所闻所思所想，不禁感慨万千，唏嘘不已。

疁•浏河长江

2019年9月22号  礼拜日

嘉定建县801周年

标准汉语之一——苏沪古典汉语（两市全境汉语语音古今对应关系规整，局地古汉语平仄、舒促、清浊、尖团格局完整保留）

嘉定菊园老茶坊《嘉定闲话》栏目

嘉定古建与民俗文化研究会 • 陈夏青嘉定语言研究工作室   出品

汉藏语系•汉语言•吴方言•太湖片•苏沪嘉小片•

太仓方言大区•嘉定方言区•华亭方言点

（声韵调系统）

我亇母语，我亇乡音。

全球人民，弘扬乡音。