乡音到底何去何从？（江南古典汉语）

标准汉语之一——江南古典汉语

嘉定菊园老茶坊《嘉定闲话》栏目

嘉定古建与民俗文化研究会 · 陈夏青嘉定语言研究工作室

汉藏语系·汉语言·吴方言·太湖片·苏沪嘉小片·

太仓方言大区·嘉定方言区·华亭方言点

（声韵调系统）

我亇母语，我亇乡音。

全球人民，弘扬乡音。

乡音到底何去何从？

今年是2020年，从我开始关注乡音生存、语言资源保护问题，已经足足喇喇20年啧。20年亇奋斗历程，对于昰个问题是可谓感慨颇多。嗰么，乡音到底何去何从？简单亇讲，佢已经不可避免亇离我伲远去。为啥？因为最大多数人就是铿锵有力亇趋附于强势语而倾向于放弃自家原有亇弱势语，我伲期待亇天下所有人留存、守护、弘扬乡音亇理想世界从根本性上並不具备广泛亇社会基础、民众基础，只有我伲少数对乡音还有情怀亇个体可以拿佢守护到自家生命结束而已。

为啥奋斗著廿年阿末脚得出昰恁一个结论？通过我亇回顾一眼一眼展开来。

（小标题为朗读结束后添加，仅为便于检索）

一、回顾

1. 意识萌发

2000年到2001年，也就是我初三到高一亇辰光，不晓得哪恁算头，自然而然亇萌发出著强烈亇乡土意识撘乡音意识——当时脑子里一直想着亇就是：“原来从小大人一直话亇‘乡下头’‘乡下头’是我亇老家。我是嘉定区华亭镇亇人，我要努力学好我伲嘉定华亭亇本土闲话。”从此，开始高度关注老一辈亇乡音使用，有意识亇去留心，甚至记录。之前，一直呒得昰种意识，乡音使用处于一种无意识状态，外加局限著家族内部——因为同龄人亇语言环境，从我80年代末嘉定城里亇红卫幼儿园到实验小学到实验中学，基本全是缺失亇，同龄人俦全是使用北京语音表达亇。甚至当年住著嘉定城里李园一村里乡楼里両个傍我大五六年亇大阿哥也是习惯用北京音表达亇，只是场时还著感叹亇辰光脱句把本地闲话出来。也就是讲从记事起亇幼儿园一直到初中，满濌喇十多年全是丧失同学俦里亇乡音环境亇。唯一例外亇是，一年级第二学期，我回到自家乡下头，塱华亭中心校读著恁个学期，华亭中心校亇师生普遍还是使用乡音来表达亇。著当时，我倒是成著一个撘昰个环境俦格格不入亇另类，因为我还继续保持著使用北京语音撘同学俦讲闲话亇习惯，而昰种表现，被认为是著城镇里亇特征，称我为“街上囡”。甚至受我影响，我华亭中心校亇老师还撘其他学生子讲嘞：“啥人还来撘我俦讲土话，我睬也不睬！”但当时我完全呒啥意识，横从记事开始，同学俦里全是用北京音交流亇，电视里动画片嘞啥也全是“人工北京闲话”，横从小著昰恁亇语言环境里也蛮开心，也有一个快乐亇童年。佷可以想象，若假现在硬劲叫両个家长、囡细一定要再重新拾起本地汉语，对佢垯到底有几许吸引力？

到初中后期，乡音意识萌发后，撘有亇同学俦开始使用乡音交流。有亇同学好像也著差不多亇时期开始比较有意向使用本地汉语表达啧，故嘞也不晓得啥辰光开始，撘有亇同学俦不知不觉就完成著语言转换——初一进去用北京音白话，初三出来用本地音哬儿陈。记得后首来看见研究资料显示，随著年龄亇增长，差不多是著昰个年纪，使用本地汉语亇意向会增强。当然，有能撘同学俦自然而然转换成用本地汉语交流，应该讲来有个前提条件是，家族里还有本地汉语亇环境，我伲只是拿还保有亇一定亇使用能力迁移到著同龄俦伴身上。但是，我伲还是已经脱空脱著十来年同龄人俦亇本地汉语语境。即使现在有同学开始互相使用啧，也只是少数，甚至个别。

2. 高中

2001年开始到南翔读高中。全嘉定亇学生子汇聚到嘉定二中。昰个是我同龄人乡音语境亇极其重要亇阶段。当时观察下来，讲嘉定本地闲话撘“人工北京闲话”亇大概差不多各占一半——両个嘉定城里读书亇好像普遍用“人工北京闲话”，一直乡下头读书亇普遍用嘉定本地汉语亇。虽然嘉定城里有校车接送亇，但我也撘両个一直乡下头读书亇同学俦著学堂里住著三年，嘉定本地汉语亇语境蛮稳定。昰个阶段对我亇影响有：

一是观察着著嘉定各地亇语言异同。当时印象里像伲华亭、唐行嘞啥撘曹王嘞、娄塘北片嘞、朱桥嘞昰排场许基本一样亇，撘南横头吴淞江一线亇安亭、黄渡、封浜、江桥一线差别较大。吴淞江一线亇闲话听感上撘上海城区闲话俦有眼接近，其中江桥、真新新村街道亇声气像来得个特别，撘嘉定大份区域俦像煞差别最大。当时同班有亇嘉西、方泰、外冈、望新嘞厛中西部亇同学，哪恁印象里朆觉着有啥特别亇，横全蛮好通话亇，嗰么也就是讲总体上撘伲俦差别不算大透，像中西部有排区域中古汉语寒韵字“干看寒安”嘞啥发oe（前），麻韵字“渣叉茶沙”嘞啥发o亇特点，是我2012年毕业回到嘉定之后刚发现亇。而所在地南翔，觉着像分化有眼大，有亇人讲亇像上海城区闲话，有亇人讲亇像撘伲中北部其他区域也差不过，应该反映亇是比较本土亇南翔闲话。总亇讲来，当时观察亇结果，觉着嘉定中北部总体共同性比较大，南横头吴淞江一线差别较大，其中东南角封浜、江桥、真新伊块，特别是江桥、真新，像差别加二大点亇。故所以几年之后看见上海地区方言分片亇论文赞叹不已——学界调查亇结果就是——嘉定中北部为嘉定方言区，西南角安亭、黄渡伊块属于松江方言大区·松江方言区，东南角封浜、江桥、真新伊块属于松江方言大区·上海方言区，撘我高中时期亇大致印象相当吻合。

二是见识著嘉定各地亇语言矛盾撘语言趋同。为此著存在差异，乡镇之间存在互相看不得亇情况，希望对方改变具有特色亇成分。比较典型亇有第二人称亇问题。像伲嘉定北片以“佷”一类为主，嘉定南片以“侬”一类为主。南片经济更加发达，可能也有上海中心城区使用“侬”亇强大辐射力，总体上呈现南片嘲笑北片並试图要求北片废弃“佷”亇态势。像伲有亇同学讲得就相当不客气，有亇么话：“阿好覅讲‘佷’？难听！”有亇么话：“我伲伊塱斥涴就是‘佷佷佷’亇。”乃么北片亇学生子嗫，是也常常觉着自家处于弱势地位，逐点逐点会永久性替换为“侬”。我当时就来得个在乎其他北片同学还有几许有能保持“佷”。当时有个信念就是：我要行我亇乡音塱昰个复杂亇环境里生存下来。同时我也发现还一个现象：真新街道亇同学也会受中北部影响，逐点朝主体部分靠拢，毕竟，佢垯伊只角里，相对于嘉定大多数区域，属于少数。我亇情感倾向，无疑也是鼓励佢垯有能尽量保持自家当地亇闲话，覅受嘉定主体影响而消亡，就像佢垯著大量上海城区移民迁入亇情况下，厡有能保持自家本乡闲话一样。但当时像煞也有眼意识着，人们对于乡音好像並呒得昰恁执着，横撘人家俦讲讲可以听懂么好啧，听不懂么觉着改变改变又有啥事？就像有亇同学话亇：“欢喜！听得懂么就可以啧！”当时觉着哪恁可以用昰恁亇态度对待乡音母语？但现在回想，实际上佢就是用一种看似油腔滑调、玩世不恭亇态度表达著广大民众亇一般想法。就像嗰歇儿头儿印象里有排老师乡镇特色並不明显，只是横大家听得懂么就昰恁讲啧。有亇老师还喜欢嘲笑人家亇乡镇特色，譬如笑伲华亭嘞厛北头人，有趟还一个老师也实在忍不牢，话阿啥老师蛮坏亇，也总贯笑佢封浜闲话。总亇讲来，嘉定各乡镇存在矛盾，牵引语言趋同，方向自然总体是少数朝多数靠拢，弱势朝强势靠拢。我亇基本诉求就是——自家要行我伲华亭亇乡音生存下来，同时也希望其他各乡镇亇师生有能保持自家亇本真乡音。但大家常常並不按照我亇理想世界来行事。我有能做亇，只是自家按照自家亇心愿来。

三是见识著上海城区闲话对嘉定本土闲话亇影响。记得当时师生嘞食堂员工当中嘞好像全有讲上海城区闲话亇人，有亇的确本来就是出身上海城区亇，有亇出身並不清爽，有亇是出身嘉定本地但是喜欢讲上海城区闲话亇。记得大人一般对我伲讲嘉定本地汉语亇人全蛮尊重亇，无非就是大家各讲各亇，横有能交流就可以。但是同学俦里有亇人就不大客气啧，有亇对于我伲讲本真乡音亇常庄誏里誏声，即使对于自家乡镇坚持乡音亇同学也用“乡下人”不屑亇称呼，想说明人家讲亇本真乡音倒不准。更加夸张亇是，有两个讲上海城区闲话亇小姑娘可以当著嘉定本地老师亇面隔著几埭位子“哗啦哗啦”讲我伲亇闲话发音难听嘞啥，用乡音母语撘佢垯俦讲张是还恨不得不睬佷嘞！其中有个晓得是嘉定本地人，佢话自家讲上海城区闲话是因为自家亇朋友阿啥、阿啥嘞啥是上海城区人，轧实昰个只是客观理由，内因在于对强势区域、强势语亇趋附。著昰塱，像上海城区闲话昰恁亇强势语，既有交流沟通性上亇优势，又有身份展示亇优势。因为客观上上海中心都市亇辐射力使得上海城区闲话的确可以超出城区覆盖广大区域被听懂，还一方面，用佢作为身份语，可以时时刻刻彰显自家上海都市亇身份，相对处于边缘地位某某乡镇亇本真乡音也就並不昰恁受到青睐啧，特别对于时尚女青年来讲，昰种倾向好像偏重一眼。从我亇理想世界来讲，各种闲话坚守著自家亇原有人群可能比较好，但事实是，必然有个体倾向于放弃自家本真乡音而永久替换成外来亇强势语。要注意，昰个不是根据交流对象不同亇临时切换，而是作为身份语亇永久替换，也就是讲，即使对于听得懂嘉定闲话亇嘉定同乡，也不讲嘉定闲话啧，而是稳定亇使用上海城区闲话。印象里从伲爷娘一辈到我昰代，全有一部分个体倾向于放弃嘉定故土亇本真乡音而用上海城区闲话永久替换为身份语。现在包括上海城乡著塰全国各地全有亇用人工北京闲话永久替换自家乡音，轧实就是昰种现象亇放大版。

四是见证著北京语音对于上海语音亇影响。昰塱亇上海语音包括整个上海城郊，因为同学俦里讲上海城区闲话撘嘉定本土闲话亇全有，受到北京语音亇影响是共同亇。典型亇就像“光荣”“容易”昰排字，别人一般已经全读“光lon”“lon易”啧。像“弱项”，有趟有个同学就直接话成功“落乡”，我替佢指正，佢还话：“欢喜！佷昰恁读啥人听得懂嘞？！”乡音情怀重亇人可能非常不认同，但佢讲亇也反映著交关人亇想法：“横听得懂么好啧。哪恁听得懂？横一般接近普通话（也就是北京语音）亇发音么就可以听懂啧。佷一定要加二考究得话昰个字本地闲话本来应该哪恁读是人家倒要听不懂啧。”就像有个黄渡同学总贯反问我：“我问侬普通话哪恁讲亇？！（仿黄渡语音）”也就是讲，非常明确，对于本地汉语某个字音吃不准，佢就是参照北京语音读亇，以外地语音为准。更加夸张亇是，有个同学拿“风蛮大亇”话成功“fen蛮大亇”，“俄罗斯”话成功“e（仿北京发音）罗斯”，我实在忍不牢问佢：“佷本地闲话到底阿会亇啊？！”还有一趟大概我是话着“祝贺”，佢话：“heh么heh，啥ghu、ghu、ghu？！”我塱想：“哈哈，祝heh！”我问佢：“佷垯伊塱河浜哪恁话？”佢一听，倒也有眼尴尬，结果贼脱乎嘻嘻话：“我伲话hgheh浜亇。”当时辰光我只是本著紧跟老一辈亇思路，晓得本地闲话有本地闲话亇标准，呒能跟普通话瞎跑。嗰歇儿也不晓得普通话使用亇是北京语音，也不晓得用古汉语语音著现在各地亇分合状况不同来解释。

还有对于龚姓亇读音争论也蛮大。我遵循老一辈传下来亇，读cion，其他同学全笑我，佢垯读kon，明显也是根据北京音倒推过来亇。问龚姓同学，佢倒也无所谓，话全可以亇。当时我不懂古汉语语音，不晓得用古汉语语音来解释，横只是遵照老一辈传下来亇读。

总亇讲来，嘉二中亇岁月，对我亇语言生涯具有基础性亇作用。

3. 本科

2004年，高中毕业进入华东师大。头一趟领略着，上海城区同学之间使用乡音交流亇意愿相当强烈，三不两时会碰着有人表达出“全是上海人讲上海闲话”亇意思，甚至有少数不讲亇是还有眼畀其他同学排斥亇。相比起来，一直著嘉定城里亇嘉定人，互相俦里使用嘉定闲话亇意愿好像实在低。不过，虽然上海城区同学使用乡音亇意愿相当高，但是好像已经蛮难觅着完整使用上海语音表达亇个体啧，像煞基本不夹北京语音就不会完整表达啧，连当常用字组成亇像“课程”“暗夜精灵”嘞昰排也不会用本地汉语表达啧，越加覅话用上海语音完整朗读文本啧。我当时因为复习功课、背物事嘞啥全用本地汉语亇，有外地同学问両个上海城区同学：“佷垯哪恁不用上海闲话背？”佢垯话我强呀！也就是讲，昰个辰光，撘我同龄亇上海城区同学，实际上人工北京闲话已经是佢垯顶顶流利亇表达工具啧，对于上海闲话可能只是满足于日常白话还可以用用，但並不追求完整表达。虽然班里大份全是上海同学，甚至绝对多数，但直到毕业也呒得外地同学会用上海闲话来完整表达——因为佢垯面对亇上海人，撘佢垯自家一样，全体掌握双方共通亇人工北京闲话，外加听说读写唱想赖以完整表达亇工具已经转化成北京闲话、北方闲话啧，语言交流亇隔阂已经丧失，根本丧失系统学习並使用亇动力，即使是宜兴、江阴、松阳、宁波昰排同属于吴方言区亇同学，撘嘞从吴语分出来亇闽语区亇同学，也就是老底上海塘上並不鲜见亇福建亇同学，还有上海滩非常多见亇苏北亇同学，也全不讲上海闲话，毕竟用北京语音大家全蛮便当，为啥还要学上海闲话？甚至同为无锡地区亇宜兴撘江阴亇同学俦也朆听见用乡音交流亇，同为浙江吴语区亇丽水松阳撘宁波亇同学俦也是用北京音交流亇，便当呀！有著更加便捷亇交流工具，几个人会吃力啌啌用自家亇乡音去硬劲行人家适应？只有要么我，用嘉定本地汉语尝试，但上海城区同学一接触，发现听不懂，或者听起来吃力，就【情愿】可撘我俦用北京语音交流，毕竟高效。我最先亇突破口是松江同学，发现可以用乡音交流，就一直讲讲讲讲，寝室里有嘉定闲话语境著么其他同学多少也有眼了解，逐点逐点撘两个上海城区同学俦也可以用嘉定闲话沟通。乃么校园里碰着两个崇明亇校友也还可以用我本真乡音沟通。但现在回顾本科时代亇语言使用策略，必须承认，著垯掌握外界更加通用亇强势语亇前提下，优先使用本真乡音，的确沟通效率不高，只是基于自家对乡音母语亇狂热撘邻近地区亇相似性，以及少数同学对我亇迁就，乃么可以对几个同学用乡音交流，但四年本科读下来，也就打通著少数几个同学，大多数人啥人来睬佷嘞？！毕竟像伲昰恁对乡音有强烈情怀亇人是少数，甚至极少数，故咾无怪乎大多数人跨区域交流自然更加青睐大家已经共同掌握亇北京语音，即使宜兴对江阴，无锡对上海，丽水对宁波也是昰恁，不像近代嗰恁大家呒得共通语咾只好用自家乡音互相碰撞嘞适应。

但作为一个个体，自家对语言有兴趣横总贯可以去钻研，开始朝专业化道路靠拢。记得大一亇辰光有门教师口语课程，伊本教材就叫《教师口语》，昰本书有眼像我亇启蒙读物，从昰本书上，我头一趟晓得，包括我伲苏南、上海、浙江昰块亇人类语言，称为吴语，撘北方闲话嘞粤语嘞啥一样，是汉语亇几大分支之一，当时像煞对昰只名称非常喜欢，像有一种集体荣誉感一样。大概著差不多亇辰光，我伲爷拿归来一本《嘉定县志》，里乡有《方言卷》，也头一趟晓得原来已经有人对于嘉定本土亇人类语言有过专业性亇研究。

乃么记得2006年，大概是上半年，也就是我大二第二学期，大概网上搜吴语相关知识亇辰光，哪恁搜着两只论坛，一只是清籁吴语论坛，一只是吴语协会论坛，随便看看，发现里乡信息交交关关呃！大开眼界！外加一上趟发现原来有昰恁多人也欢喜昰个方面，相当亇有俦！有排会员讲闲话也谑头谑脑蛮有劲亇，乃么也常庄泡论坛。里乡有排会员相当亇有水平呃！讲着著交关我闻所未闻亇知识，相当有学问！逐点逐点我晓得著语言学昰块领域，开始想阿要考语言学研究生，但当时还主张摆不定，朆想好到底考本专业研究生嗫还是中文系研究生，毕竟自家一直读亇是教育管理·公共事业管理，但老实讲兴趣仅局限著听听课；而自家高度感兴趣亇是语言方面，但毕竟朆著专业环境里熏陶过。后来亇人生证明，兴趣还是最好亇老师，真正有能做出成绩亇还是自家亇兴趣所在，因为佷会从内心迸发出无穷亇动力朝昰条路上去钻研。我对在读专业呒得浓厚兴趣，也可以想象得出，著语言学专业里，也有交关人兴趣並不浓厚。佷有浓厚亇兴趣去钻研，做得不会傍佢垯推扳亇。

2006年9月份，大三上来，去听著一只关于普通话亇讲座。结束之后撘主讲人蒋老师俦交流著我亇想法。蒋老师介绍话，著昰个领域，上海地区实力最强亇是复旦大学撘上师大，並且替我推荐著几本语言学专业书。从此，我正式确立著挨下来亇人生目标——考研！复旦大学中文系！

蒋老师亇推荐书帮助我正式开始接触语言学，特别是方言学昰块亇系统理论，对于我亇认识有极大亇提升。2006年底到2007年上半年开始，一直到2008年本科毕业前头，著师姐嘞排同仁亇引领下，频繁到复旦听课。与此同时，也屡次到上海大学和上海师大听钱老师撘潘老师亇课。当时相心踏脚踏车，几只学堂南征北战忙得不亦乐乎！但奋斗亇年代真亇是精神振奋，斗志昂扬，像不觉着衰瘏亇话！当时脑子里亇信念就是：我要考中文系研究生！我要研究吴语！

为此著考研还要考政治、英语嘞厛公共课，2007年暑假我读著海文亇考研班，听両个老师讲讲也蛮有劲亇，有亇老师是也真亇谑头谑脑惊惊会话亇！就是可惜，2008年1月份，复旦考研，公共课全呒不问题，两门专业课，纯清语言学亇伊张卷子也过线啧，就是死著垯伊张好像叫文学语言综合卷上。文学，嘿嘿嘿，我实在忒推扳啧，从小不欢喜看文学书亇棺材，还碰着呒曼参考书亇考试么，自然死蟹一只！外加到上海大学、上海师大、华东师大三只学堂去调剂也全不着。但是，人处于一种狂热状态中斗志不减，继续到块听课，下定决心暂不工作，出空身体再考！但是，学堂目标改变，指向上海师大·语言研究所。因为根据头一趟考研晓得，我基本呒得可能通过复旦亇文学卷，但考上师大，两门专业课全是纯清亇语言学内容，嗰就有戏啧。

4. 考研成功

2008年6月份毕业回转，7月份垨到华亭乡下头外婆垯闭关备考。当然，同时也日逐拾闲话，记录语料。记录语料亇习惯我也持续著几年。中学时代刚开始记录亇辰光，已经有眼隐隐约约亇感觉可以用英语课上接触着亇国际音标来记录乡音亇语音，但对于“软”亇声母撘韵母，当时不晓得用啥符号记，自家创造著两只符号，横自写自识么好啧。到2008年毕业回乡，已经基本学会著用国际音标记录本地汉语语音。

半年闭关苦战，2009年1月份，上海师大考研，终于实现著从游击队到正规军亇梦想！外婆垯宅上人家也不禁感叹：“我伲叉麻将歇，佢还朆睏嘞！”

5. 读研生涯

2009年9月份，梦寐以求亇读研生活正式开始。活大到乃从来朆像昰恁望过歇开学！晓得本科阶段脱空脱交关中文系专业课，每日天如饥似渴亇到块听课，真亇是恶补！当然，一开头对于发展方向还有眼迷茫，潘老师撘我话：“拿《方言调查字表》搞懂就可以。”当时看看昰本薄哝哝亇绿封面物事，还有眼疑惑不解，几年下来真亇是不得不惊叹导师亇高屋建瓴——我后来亇核心竞争力真亇就是来自于昰本绿宝书！捏得要烊勚脱快亇啧！昰本物事轧实就是拿我伲现代各地汉语语音亇共同来源——中古汉语语音，用表格亇形式呈现出来，掌握著昰只框架，等于捏牢著整个汉语亇总根，乃至是整个东亚语言亇核心。记昰只框架，导师教伲，用不着死记硬背亇，可以用自家掌握亇现代汉语语音去倒推，包括大家共同掌握亇北京语音，撘自家当地亇汉语语音。昰个辰光，啥人亇乡音母语有能区分亇音类多，啥人就合算啧——当然，还有一个前提就是，侺看见各个汉字有能用自家当地亇汉语语音咬准。昰个方面我亇优势一上趟凸显出来啧——一是嘉定语音有能区分亇音类还是蛮多亇，特别是相对于同一时代亇音系已经相对简化亇上海城区闲话来讲，二是为此著一直留心好老人亇发音，还专门一个字一个字问，长期亇积累，使得我比其他同龄人更加熟悉自家亇乡音母语，字眼咬得（teh）准，昰恁对于掌握古汉语语音格局要轻松脱娘些儿，交关音类我直接好通过自家亇活语言分辨出来。譬如“枪羌腔”三个字，北京音已经全部併成功一只读音qiang，上海城区同龄人可能也普遍併和脱啧，但我跟牢自家屋里大人厡全分得煞喇打清著塰，是三只读音。而昰三个字嗫，著古汉语里本来就是三只读音亇——“枪”“羌”声母不同，“羌”“腔”韵母不同，我母语读出来，一步到位厡可以反映出古汉语昰只格局，用不着死记亇。本来只是一种简单不过亇想法：“我是嘉定华亭人，我要讲好自家亇乡音母语。”结果朆限着话，用自家亇乡音对照古汉语语音框架话发现昰恁亇齐整！越来越觉着母语亇伟大！头先只是简单亇要行自家亇乡音生存下来，从此开始逐步逐步上升到传承整个汉语语音框架亇境界。

从初开学，到大概12月份，大约三个号头亇辰光，有空就搿牢定绿宝书推导，基本拿古汉语语音框架记牢，並与现代汉语，不管是嘉定语音、上海城区语音还是北京语音亇关系摸清爽啧，再加上每只礼拜日潘老师亇汉语历史音韵学课程，基本奠定著我后首来亇核心能力。

时光一日日愉快充实亇过去，但逐点逐点我也碰着著瓶颈——读研究生，要搞语言田野调查，还要写论文。但是，我並不喜欢做昰两桩事体，开始意识着，我並不是真亇适合搞正正式式亇语言学学术研究，而是相心自由自在亇拾知识，用来增强自家使用乡音母语亇能力，特别是解决完整朗读撘书写亇能力。昰个问题，著2010年11月份，也就是研二第一学期，塱温州头一趟参加吴语会议亇辰光已经有所意识。特别是2011年暑假，当我为毕业论文回到乡里寻发音人做好调查录好音之后，越加确认著自家亇意愿——我並不欢喜去钻研复杂亇录音设备嘞软件嘞跑东跑西去拖牢定发音人像上刑一样逼牢定佢一只只音发出来著还要伊样讲究昰样规定亇写篇论文出来，准备毕业论文写脱之后再也不做昰桩事体啧，有种金盆洗手、从此不上亇感觉。与此同时，对于农村景象、农村生活亇远去，对于人们乡音传承亇断层，还有对于读研生活亇行将结束，全有一种遗憾、怀念、不舍亇心理，情绪处于一个低落时期。甚至著昰个辰光，停止著持续多年亇语料记录，不想昰恁疲于奔命啧，横著语境当中自然亇掌握几许词汇就几许。就像大人老早话过亇：“闲话多嘞！学也学不光亇。”

昰种心理状态持续辰光蛮长亇，一直要到2012年毕业前后。可能是带有一种过度怀旧亇病态。后首来有人提醒我：“侺既然怀念农村，嗰么侺自家阿肯回转去种田？既然侺自家也不肯回转去种田，为啥要望著别人家么全墫著乡下头种田来满足佷对于农村撘乡音亇怀念嗫？侺阿觉着昰恁想蛮自私亇？”我一听恍然大悟！想想是亇，交关变化就是由包括我伲自家著塰最广大民众共同参与所造成亇，只是人常常看不见自家对于昰种变化亇推动而只看见人家亇作用，还怨天怨地怨社会，像煞全世界全待亏自家一样。

6. 读研之后

虽然2012年下半年开始，对于农村亇远去，乡音亇衰亡看开眼啧，但作为乡音亇热爱者，作为一个个体，厡著传承乡音、弘扬乡音亇阵地上坚守。毕竟，我呒能决定人家，但我可以决定自家。我厡要依赖乡音听说读写唱想完整表达亇，並可以创造作品畀阿末一坒还会乡音亇家乡民众欣赏，同时也可以行乡音利用网络全球共享並留档，避免消失得无影无踪。最重要亇做法还是著网上尽可能多亇发布乡音作品，特别是自家本地汉语原创作品是重中之重——文本语句组织就是用本地汉语写亇，朗读起来字字对应，形成文本、音频严密对应亇作品，真正做到“我手写我口”。

网络发布乡音作品，我最早是2008年4月份开始亇，著土豆网上，用自家本乡汉语读一眼作品，有古文，也有现代文。最初亇动力就是，为啥“人工北京闲话”嘞上海城区闲话全有大量亇作品传播，但我伲嘉定本土闲话缺少昰恁亇作品？当然，嗰歇儿头儿还是称为普通话亇，只是为著行大家晓得普通话北京语音、北方方言亇本质，现在全用打引号亇“北京闲话”或者人工北京闲话来称呼，防止大家神化佢嘞妨碍自家亇语保信心。

当然，整个考研、读研期间，作品不算多，基本开著亇头，一直到硕士毕业回转之后一年，2013年，乃么开始著连续几年亇大生产，特别是利用暑假亇黄金时期，产量可以相当高，再利用QQ嘞、微博嘞、百度贴吧嘞、嘉定都市网嘞啥发布。

可能为此著稀缺，影响力就容易体现亇。2013年嘉定档案馆寻我拿30只嘉定乡音故事听写文本记录下来。嘉定语委著我土豆网页面上留言，取得联系，收集我亇作品发到市里，並积极送我到市里培训，相关能力进一步拓展。特别是经典诵读亇培训，让我“乡音保护与中华诗词文化传承相结合”亇理念进一步完善。

2016年，是一个特别重要亇年份。上半年开始，嘉定电视台叫我做“漫话嘉”节目，每只礼拜提供一段嘉定本地汉语亇文本音频，塱全嘉定亇影响进一步扩大。7月份，上海电视台联系我做网络直播节目《掌上观文》，当月做著《吴侬软语来品诗》撘《吴侬软语唱起来》两期，拿我长期积累亇语言学知识撘乡音实践成果进行著集中讲解。9月份，嘉定亇新兴文化阵地——菊园老茶坊开张，专门开设著“嘉定闲话”版块，我作为版块成员著开张仪式上进行表演，不单引起著著名滑稽演员王老师亇注意，也引起著嘉定一个文化团体朱老师亇注意，因为对语言方面有一定亇研究，建议我加入组织。加入之后发现，里乡集中著嘉定地面上涉及建筑、民俗、竹刻、书法嘞厛各种文化方面亇大家，从此有机会跟著昰排老法师学习，知识进一步拓展，词汇进一步丰富，眼界进一步开阔。同年12月份，嘉定博物馆请我作著《现代汉语·嘉定闲话》专题讲座，作为庆祝嘉定建县八百周年系列活动之一。

二、思考

1. 交关文人照样不赞赏弱势语

自从加入文化团体之后引发著我进一步亇思考。该团体由几十位关心嘉定本土文化亇相关领域亇专业人士组成，总体年龄蛮大。语言，作为人最重要亇特征，著地方文化中自然占有举足轻重亇地位。闲话，人人会讲，但语言学，特别是对本地语言亇深入研究，呆呆调是个冷门行当，昰个也是我昰恁一个后生家可以有幸轧进昰只圈子亇资本。看著各位老法师对于相关本土文化逐点消亡亇急切，我也觉着觅着著知音，心想嘉定本土语言文化亇传承可以获得更加牢固亇基础。但后晚来发现，並呒得昰恁理想。对于大家来讲，我实际上是一个矛盾亇存在，为啥嗫？一方面，我具备语言学专业亇系统知识，特别是涉猎过汉语历史音韵学撘方言学，完整解决著嘉定本地汉语“听说读写唱想标”七位一体亇语言能力，特别是掌握汉语古今传承规律，晓得冷门字哪恁通过韵书确定现代读音，可以完整朗读各种古文、现代文；晓得哪恁考证本字或者通过古代韵书、字典选择合适亇字形成完整亇文本，像北方白话文撘广东白话文一样用自家嘉定本地汉语做到我手写我口；明确了解自家本地汉语语音亇声母、韵母、声调並用国际音标或者拼音方案标出来。全嘉定，全上海，乃至更加大亇范围，对自家乡音具备如此完整使用能力亇个体可能全只是极少数人，因而具有稀缺性。但还一方面，因为我出身于嘉定县华亭乡，昰个是嘉定硕硕角落头里亇穷乡僻壤，故嘞就有不少人不适意著塰。尽管华亭也具有横跨嘉定、宝山亇整个嘉定方言区亇普遍特征，甚至声韵调系统与包括曹王、徐行部分区域、唐行、娄塘北部、朱桥、马陆部分区域、戬浜嘞厛，还有宝山境内一部分区域基本一致，但因为不同于嘉定县城，是乡下闲话，故咾交关人就是不赞赏，有亇也爽性子，直截了当指出；有亇誏里誏声，念念有词，或么就撘佷俦搞。

我伲可以通过相关亇言论来分析：

几个话，要以嘉定城里闲话为准。言下之意，嘉定乡下闲话是不准亇。嗰么朝上看，上海市亇闲话要以上海城里闲话为准，嗰么全嘉定亇闲话也全是不准亇。再朝上看，全中国亇闲话要以北京皇城闲话为准，嗰么全上海亇闲话也全是不准亇。再朝上看，全世界亇闲话要以英国伦敦闲话为准，全中国亇闲话也全是不准亇。昰个实际上又回到著推广通用语亇思路上去啧，又与语言资源保护相对而行啧。

语言资源保护，本来就是为此著人们掌握著外界更加强大亇通用语之后逐点放弃著自家原来伊种弱势亇语言，故嘞需要呼吁保护，尽可能留存一眼语言文化资源。方言是语言亇存在形式。语言标准精确到点。以汉语为例，汉语是一个抽象亇统称，精确到一个个具体亇地点么有能抽出一套明确亇声母、韵母、声调系统，及其配套亇词汇、语法系统。无论昰个地点是城镇还是乡村，全是昰恁亇。若然认为乡下闲话叫不准亇，需要压制，嗰么认为郊区闲话不准，需要压制，撘认为地方闲话不准，需要压制，逻辑上全是一致亇，根本性上还是朆跳出片面推广通语亇思路，还是拿其他区域民众亇母语看成功是呒得价值、不上台面亇语言糟粕，无非只是有亇人以国家为单位昰恁做，有亇人以市为单位昰恁做，有亇人以县为单位昰恁做。

但是，最最理想亇语言资源保护状态，应该是全世界所有地域、所有人群亇本真乡音母语全有能保留撘展示，像我恁出身华亭，祖祖辈辈、亲亲眷眷全是昰垯塱亇人，我亇乡音母语就是著昰只语言习得核心圈里浸出来亇，我通过作品展示自家自然亇表达工具及身份标志本真乡音，以身作则鼓励天下所有人尽量留存撘弘扬乡音，但还是有不少人並未领悟昰种理念。或者若假对我伲乡下人弘扬乡音有意见，或者成恐嘉定本土语言亇风头畀乡下人抢去，嗰么佷按照自家亇喜好，用自家主张亇汉语语音，譬如嘉定镇语音或者安亭语音或者南翔语音来大力生产作品宣传、弘扬，嗰倒又是桩事体，也是我所期待亇语言资源大繁荣。但问题在于自家並不愿意昰恁做，又有眼看不得人家昰恁做，嗰昰个心态就有眼不对啧。

有亇人话，一棵树上总贯有一朵花嗫还是一只果实开著最大，言下之意佷垯华亭穷乡昰种闲话著嘉定不算最大亇，言下之意就是呒能代表嘉定来呼吁、号召亇。实际上撘上头话着亇逻辑是一样亇。嗰么佷按照自家欢喜亇最大亇花或者果实来做嗫？也不着力，嗰佷就怪不出人家相关媒体组织者选用我亇音频並直接冠以“嘉定”亇名头啧，因为我嘉定本土亇汉语“听说读写唱想标”七位一体亇全方位能力全具备啧，並且本地汉语原创文本加严密对应亇音频也要十廿万字作品啧，其他朗读作品加上去数量还要浩大，佷话人家想着嘉定本土汉语亇创作者会想着啥人？昰个需要自家不断实践努力来争取亇。就像意大利共同语並不是以罗马方言为基础亇，而是用亇多斯岗方言，为啥？因为但丁、薄伽丘、彼特拉克昰排大文豪亇作品就是用多斯岗方言写亇。我亇目的是通过自家以身作则弘扬乡音来唤起更多亇人一俦来做，行各地乡音像百花齐放恁呈现出来，但若是大家不跟上，嗰么华亭就会一枝独秀，成为嘉定全县文本、音频配套语料最丰富亇区域，从外界看来也是最容易获得亇嘉定本土亇现代汉语语料。

不过可惜亇是，覅话对嘉定内部各地亇语言资源还有尊城鄙乡亇眼光，甚至对于使用嘉定本土汉语来做节目亇提议也还有会员不赞成，竟然话是“对阿富根亇攻击”。嗰么按照昰个思路推上去，呼吁用上海闲话来报站、广播、做节目岂不是对中央人民广播电台亇攻击？昰个等于自家动摇著用上海闲话做节目亇逻辑基础。再朝上推，岂不是还可以讲使用中国语言做节目是对英国广播公司亇攻击？说明根本性上来讲基于语言通用性来压制弱势语亇思维是根深蒂固亇。从通用性上来讲，“伦敦闲话”全球通用，“北京闲话”全国通用，上海城区闲话塱全市乃至更大亇范围里全有一定亇通用性，但是著嘉定地面上，使用嘉定本土亇汉语语音来做节目，话著嘉定人还听不懂？的确，嘉定境内也是一个面，以数量有限、明确亇语音系统为标准，嘉定界有几支具体亇汉语标准，但嘉定境内大份地区撘宝山北部全是语言学上划分出来亇嘉定方言区，内部一致性相当高，即使是西南角上划分为松江方言区亇安亭、黄渡一块，撘东南角上划分为上海方言区亇封浜、江桥一块，著同处一个县亇交流互动中，稍些疏通疏通就可以顺畅交流啧，我伲当时嘉二中里全县各乡镇亇同学不就是用自家乡音交流亇？我一口华亭闲话撘全县老一辈交流起来也蛮通畅呀！共同性远远大于差异性。更何况，嘉定电视台还有一档非常好亇节目，一直请全县各地嘉宾用乡音访谈亇，说明大家非常清爽，本地民众可以非常容易听懂嘉宾亇乡音，昰个本来就是该节目可以存在亇基础。还一档节目也相当受人欢迎，主持人就是用自家当地亇乡音来主持亇。也就说明，以其他乡镇听不懂，甚至称为“攻击阿富根”，来压制嘉定本地汉语做节目亇倡议，只是一只推头，本质上只是更加崇尚通用范围更加大亇语言。昰个本来就是语言资源走向消亡亇心理根源。即使上海城区闲话，曾经如此强大亇一支汉语，现在竟然也会支离破碎，也是因为人们更加依赖通用度更加大亇“人工北京闲话”。

…………

凡此种种，不一一列举。一个共总就几十个人亇团体，表达过类似意思亇，印象里大概就要有十来位。响亇人只是想亇人亇冰山一角，可以想见昰恁想亇人要有几几许许？更加悲哀亇是，讲嘉定镇闲话亇两支人群还互相不认同嘞！嘉定镇昰恁小一个地点，起码货有两套标准亇本地汉语，分别记录于《嘉定方言研究》撘《嘉定县志》。前者分“知痴池诗”“猪枢（规则音）除书”，分“金琴欣寅”“军群熏云”，后者撘伲嘉定其他交关地区一样不分；前者发“端湍团栾干看寒安”（前oe），后者发“端湍团栾干看寒安”（后oe）。按照文化保护亇理念，昰排全是珍贵亇语言资源呀！全应该充分展现出来畀大家认识，可以深入研究两套闲话亇来源撘地理分布，作兴可以牵出一长拖有关嘉定城镇人文历史亇宝贵信息。但大家一日到夜想亇是何里套对何里套不对，应该以何里套为准亇问题！佷话阿要急杀人？！大家想亇根本就不是哪恁去守护珍贵亇语言资源，就是想亇哪恁去统一语言！拆穿著讲，像伲恁真亇是吃饱著人参去劝也劝不转亇！

2. 整个社会环境就是不倾向于保留弱势语亇

一个高度关心乡土文化亇群体尚且如此，最广大亇民众越加覅话啧，也就是讲，由最大多数人组成亇社会大环境，根本就不是有利于维持弱势语生存亇，而是铿锵有力亇朝强势语靠拢亇。决定佢亇並不是党派、地域、人群，而是包括佷我著塰所有人追求语言交流便捷亇本质需求，故嘞会著不同党派，不同地域，不同人群身上全表现出趋向于语言统一亇共同倾向。我伲可以拿语保同仁纠结亇交关问题拿出来一样样盘点、分析：

有人纠结：为啥老早外地人来著会讲本地闲话，哪怕山东、苏北、福建、广东也会讲，现在来著为啥全不讲？因为当年大家普遍只会自家亇乡音，互相碰头只好用自家亇乡音碰撞，碰撞结果就是最终转用为某一支人群亇闲话，本地闲话具有社会先占优势，容易胜出，外地人一来就坞著垯强大亇本地闲话语境里，为交流便捷可以滚雪球恁增加本地闲话人口。近代上海是个典型，开埠以来外地移民源源不断大规模亇轧进来，1950年统计下来，85%是外来人口，外加50年代还有交关外地移民涌进来，但即使昰恁，上海闲话厡旧持续发展壮大。生活硬需求呀！

美国也非常典型，建国初期英国裔占主导亇人口格局老早打破，即使不考虑英格兰、苏格兰、威尔士、爱尔兰四个区域亇语言差异撘英格兰内部亇方言分歧，四地族裔加起来据悉也只有美国人口亇25%，英格兰裔可能10%也不到，但各国移民厡旧源源不断亇行英语滚雪球增长。即使像伲语言差别极其巨大亇东亚人也非常清爽，要移民美国，适应佢亇社会环境，就要学好英语。若然整个美国社会普遍使用佷本来会亇闲话，佷是否还有迫切需要学会佢伊塱亇特色闲话？

昰个也就是当代外地移民来著为啥不讲“本地闲话”亇原因——因为，大家现在普遍掌握共通亇“人工北京闲话”，大家全已经是双语人群，甚至交关年轻人已经成为“北京闲话”单语人口，大家一碰头，只要用互相共通亇北京语音就可以，交流起来快速便捷，一拍一脗缝亇事体，佷也用不着适应佢亇乡音，佢也自然再也不需要吃力啌啌学会著佷亇乡音么有处塱本地生存啧。

看不见自家成为“北京闲话”“本地闲话”双语人口，甚至“北京闲话”更加内，空谈“入乡随俗”是极其苍白亇。现在本地人亇“俗”是啥？就是更加会讲“北京闲话”亇“俗”，人家来著也是著用佷垯最最流利亇表达工具呀！佷想，我八十年末幼儿园开始一直到初中十来年也基本呒曼同学俦里亇本地汉语语境，面对昰恁一种状态，几个人有迫切需要来学佷昰塱只有老一辈还会熟练使用亇语言？故嘞佷看，像伲单位昰种本地老师、本地学生占多数甚至绝对多数亇单位，【阿曾】拿少数外地师生浸成功本地闲话人口？外地教师里占大头亇江浙教师也普遍不讲本地闲话，撘我大学同学里亇情况一样。

故咾，大家千万覅迷信“入乡随俗”。入乡随俗归根到底看亇是势力，昰个是由人性决定亇。当大家觉着自家会亇某种闲话可以著还一个区域普遍适用，侺是否有动力板要学会当地亇闲话？覅话跨省区之间流动啧，同一地区内部也是昰恁亇。譬如以上海为例，上海城区人到郊区是否会“入乡随俗”转用郊区闲话？普遍不会，因为上海城区闲话郊区人可以听懂，嗰为啥要改？同样，以嘉定为例，嘉定乡下人大量搬到城里是否会“入乡随俗”转用县城里亇闲话？也不会，因为整个嘉定方言区高度相似亇，乡下闲话街上人也听得懂亇。同样，现在城区扩大，老城居民也有买房子住到原来乡下区域亇，阿会得“入乡随俗”讲此地原来乡民亇闲话？呆想想也想得出啧。

故所以，当佷愤世嫉俗亇指责人家不入乡随俗亇辰光，【阿曾】扪心自问，自家阿曾入乡随俗？也就是讲，所谓入乡随俗，常常是不得已亇结果，譬如移民德国，人家听不懂佷中文，佷要生存只好适应佢德语。移民美国也是昰恁，只好硬著头皮适应英语。但现在也已经有人开始嬽啧呀，话加利福尼亚有排场许中国移民多咾佷不会英语也好生存亇。昰个表明啥？就是人亇共性：自家本来亇语言可以适应需要就呒得动力板要学会当地语言。合转来想想看自家：侺现在会几种闲话？侺明明已经会著“人工北京闲话”，甚至更加擅长、更加流畅，还有啥资本指责人家不学侺亇本地闲话？人家也非常清爽呀，用北京音，侺不单听得懂，外加自家也表达流畅，为啥板要学会佷亇乡音？

有人纠结：哪恁现在近边亇人也不肯撘我俦用乡音交谈啧？！老早大家全是用乡音交流亇呀！因为，人们对于语言交流亇需求是尽可能百分之百听懂。当年，大家普遍只会自家乡音，只会单语，乡音就是佢垯最最流利亇表达工具，到乃还可以看见我伲亇老人就是昰恁亇，嗰么撘邻近地区亇人临时接触，本来就是可以利用乡音相似性来互相沟通亇最优方案。假定可以量化，嗰么两地乡音相似度有80%、90%全是可以大体交流亇，翻转来讲，当年大家只会乡音，也只好昰恁交流。但人对于交流是追求100%听懂亇，並不想花费额外亇能量去适应听不懂亇10%——20%。故所以，当大家全掌握著北京语音，互相可以100%听懂，再用百分之八九十相近亇乡音互相适应就见得低效啧，对于大多数人来讲自然就不再倾向于用双方乡音交流啧。

也就是讲，人们趋向于使用同一套声韵调系统及其配套词汇亇同一个地点方言交流，或者话，当各地亇人长期同处，频繁交流亇结果，是趋向于形成一套语音系统一致亇一个地点方言。就像近代上海也是，话么话苏州嘞宁波嘞啥撘上海俦闲话相近，可以互通，但最终结果是大家全转用上海闲话啧，使用同一套音系，说明大家觉着昰恁交流更加便当，故嘞也可以理解，为啥不是大家各讲各亇状态持续到乃，也是因为交流並不昰恁便捷。同样，塱现在全国交流更加频繁亇状态下，全国全趋向于统一于“人工北京闲话”昰个单一亇特殊亇地点方言，只是各地亇趋同速度还有差异。就像已经熟悉著北京官话亇我伲，要听懂四川、重庆等地亇西南官话，河南、安徽亇中原官话，难度並不高，但大学里碰着亇相关区域同学，我请佢垯撘我俦讲也不肯，还是觉着全用北京音最最顺，即使刚来亇四川同学开头还高兴撘我俦讲讲西南官话，不消几许辰光还是改用著北京官话。也就是讲，哪怕可以听懂95%，人们还是会追求用100%亇方案，毕竟硬碰硬100分要傍95分高呀！

实际上也可以理解，我伲养出来亇辰光就存在亇各个地点方言，也是著昰个区域里人们长期互相交流所形成亇，其规模可能受制于当时人们亇活动范围。想当年我伲老一辈到趟把嘉定县城也像煞加二难得亇大事体，现在是交关年轻人上海常庄兜，全国到块跑，三不两时还要出国开眼界，嗰么语言格局自然会随著出行需求、交流范围亇变化而打破。

有人纠结：为啥现在本地人自家俦里也不讲本地闲话？！因为大家有著更加强大亇交流工具之后，原来亇工具就会逐点逐点丢弃。就像，有著车，老底両只扯篷船不晓得到何塱去啧；有著电瓶车之后脚踏车逐点废弃不用啧；买著新汽车，旧汽车就卖脱啧；有著新法衣裳，汉服、唐装嘞啥老衣裳全厾脱啧；造著小洋房，老房子就拆脱啧；记著西方历法，本土历法就算不来啧……大家非常清爽“人工北京闲话”具备更加广阔亇使用天地，而自家也想著更加广阔亇天地间驰骋，自然而然就会拿重心转移到昰种更加适合自家需要亇交流工具上，不大会花费额外亇精力刻意去维护或者保留原来伊套只有自家当地小范围适合亇交流工具。故嘞佷会看见，几个本地人，特别是小青年一俦也开开心心用北京音；中年人也要三不两时用北京音讲両句；我工作中对接亇交关本地中年人也常庄撘我俦用北京闲话来解释；我墫过一个十三五六个嘉定本地人组成亇大办公室，我年纪最小，竟然是唯一一个全方位连口著口用本地汉语表达亇人，有亇老教师竟然抗不牢我语文课本知识嘞些儿全用本地汉语表达，听见《悲惨世界》不用北京音读还要笑嘞！甚至嘉定文化界一趟十七八个本地人组成亇会议，主持人也讲著全本乡本土用不着北京音亇，结果除脱著两三名朆发言亇，所有发言人里还是有五名用北京语音来发言亇。越加覅话撘囡细俦啧，2019年校园开放日，所有到我教室来活动亇家庭，朆听见任何一位爷娘撘囡细俦用本地汉语交流亇，全部全用北京音。为啥？大家非常清爽何里种闲话适应范围更加大，自然更加趋附于大亇伊种闲话。就像大学里碰着个巴基斯坦人就话，佢垯爷就更加希望佢讲英语而不是本民族语。也像我伲昰塱有排老一辈並不主张囡细讲嘉定母语，而是更加希望佢垯讲上海城区闲话。我伲八零后昰代，撘我伲爷娘一辈——五零六零后，还可以看见一排个体讲闲话更加趋近上海城区闲话，甚至身份语彻底替换为上海城区闲话，本质上也是趋同于外界强势语，只是著当时亇活动范围撘预期交流区域还不大透，上海城区闲话亇辐射力已经够事。乃么到著现在，人们亇活动范围撘预期交流区域已经普遍扩大到全国各地乃至国外，语言交流方面自然就会趋附于适应范围更加大亇工具。故咾可以看见有亇中年人，对子女或者大亇囡细还用乡音，但对孙辈或者小亇囡细就用北京音啧，昰种情况，著西域、中原、江东全看见歇，佢无关乎民族、地域，或者语言亲属关系远近，而是最广大民众全倾向于语言交流无限便捷亇共同趋势。昰个就是弱势语不断朝强势语靠拢、语言资源逐点消亡亇内在原因。交关人並未看见昰点，看不见同乡对乡音铿锵有力亇放弃，专门迁怒于外地人撘社会管理者，只是反映出自家克服不脱人性里排异排外撘碰着事体怪别人亇阴暗狭隘面，或者就是蓄意挑动地域矛盾或者官民矛盾来达到自家不可告人亇目的。实际上昰个要检验起来非常便当，佷看昰排专门煽动矛盾亇人，自家是否做到著“听说读写唱想标”七位一体亇乡音使用能力？特别是，佢垯著网上笔谈亇辰光，使用亇是啥个文本？是佢垯亇乡音文本嗫还是佢垯号称痛恨亇外地文本？只要朆做到，说明自家根本就呒得昰个心，同样还是掩著全国通用亇人工北京闲话亇庇护下来寻呴势，因为即使著呒得外地人、呒不官方干涉亇情况下，佢垯照样也不会鼎力使用自家亇本地汉语来实践，活脱脱一副丑态。看见昰种一碰怪外地，两碰怪政府，一日到夜戾气十足影响社会和谐，危害生活安定亇人，可以直接反问佢垯自家七位一体亇乡音能力【阿曾】建立起来？特别是佷每日天大量亇思考、阅读、默读塱用啥个闲话进行亇？侺打字、写文章著用啥个闲话写亇？朆做到，说明自家就呒曼意愿，觉着有外界通用亇闲话蛮好蛮适意呀！嗰么先自家修炼，具备著昰种能力再讲。

尽管我主张尽量尊重大家亇语言使用策略，自愿为主，但是对于一排看不见自家牵动乡音消亡但一日到夜煽动矛盾怪别人亇人，嗰也要施加一眼压力——要么心态平和亇看待问题，要么先努力建立起七位一体亇乡音能力。我建立起著七位一体全方位亇乡音能力尚且不去怪外地人撘社会管理者，为啥？因为我晓得，虽然我乡音能力完整啧，但厡著牵动乡音消亡——因为，我不肯放弃人工北京闲话。我必须承认，我人工北京闲话亇能力也是“听说读写唱想标”七位一体亇，撘我亇乡音能力是一样亇。我依赖佢，我不会放弃佢，因为我亇活动范围撘预期交流范围同样是全国，我也望著走遍全国大家全可以顺畅亇沟通，覅吃力啌啌亇佷适应我亇乡音嘞我适应佷亇乡音，必须要看见我伲每个人对于外界强势语亇强烈需求。但同时，昰个也意味著：一，本地出身亇囡细根本呒不必要适应我亇嘉定本地汉语，因为佢清爽我可以讲佢更加听得来亇人工北京闲话，我也不会佢是本地人养亇咾硬劲逼牢定佢板要听懂嘉定本地汉语，若是听不懂，也会自然亇用佢最熟悉亇北京语音让佢听懂，以求沟通效率。二，对于外地移民来讲也一样，佢呒没必要板要听懂我亇乡音，因为我会大家全懂亇北京音。

3. 通语不弃乡音不保，社会开放自家造成

故所以，我伲全呒能抛开人工北京闲话亇客观存在来考虑问题。交关人著讲着“人工北京闲话就是用来沟通外地人”亇辰光就应该意识着，昰个也就意味著，佷放弃著“逼”佢讲会甚至听懂本地汉语亇机会，因为大家全会北京音呀，有啥必要再互相适应乡音嗫？乃么有亇人又要像长不大亇囡细恁发忹劲啧：“嗰覅来呀！外地人咋嘞要来咾？！”合转来问问看自家，自家阿朝外？阿问问看人家阿欢迎佷去？不也照样朝外旅游、炒房，还移民嘞！就算佷话：“我就是横迸、猛㦖得只许我出去！不许人家进来！”嗰么佷亇实际行动【阿曾】做到？不管佷移民出去，还是人家移民进来，全需要移居地亇人提供四大条件——语言交流、居住场所、经济来源、交换条件。侺既然讨厌人家进来，嗰么侺【阿曾】做到以下四点：

一、坚决不睬不讲本地闲话亇人。

二、房子不借、不卖！坚决不提供任何居住场所！

三、坚决不到外地人亇店里乡消费，不接受外地人亇快递，不使用外地人参与建造亇基础设施，从经济来源上断绝支持！

四、我自家坚决不朝外！乡下人不聚集到县城，市区人不扩散到郊区，所有人不得移民海外！我伲不出去，佷垯也全覅进来！条件交换！

侺【阿曾】做到？【阿曾】做到？【阿曾】做到？做不到，说明侺就是塱通过自家亇实际行动著推动社会亇开放、人群亇流动。但交关人看不见昰点，一头开开心心享用外地人建造亇基础设施、提供亇服务行业，一头誏里誏声怪外地人自说自话跑来，或者怪社会管理者“放外地人进来”。实际上侺自家就著引人家进来，著用实际行动证明“我需要佷”。就像交关人会话亇：“既然佷垯外地人要来，就说明我伲昰塱好，覅不承认！”同样，对于本地人来讲也是亇呀，既然侺要收佢亇房钱，用佢带来亇服务行业，就说明佷需要佢呀！覅不承认！人性全有共同点，大家全朆高尚著何塱。对于语言资源保护来讲，幻想回到封闭、静止、不流动亇状态来做昰桩事体，是不成熟亇，甚至不客气亇讲就是幼稚亇，因为我伲每个人全著用实际行动推动社会开放、人口流动。