[申情申音]上门女婿

《上门女婿》

作者：马尚龙

改编、朗读：麦小姐

[上海话改编]

上海汇聚了最多个资产阶级、最多个知识分子、最多个大亨老板，当伊拉个囡儿谈婚论嫁个辰光，要末是强强联姻，要末就是“小姐情定后花园”个现代版。辣上海，因为有勿少小姑娘从小接受个是西方式教育，再加上爷娘也比较开明，所以伊拉对谈朋友搿桩事体，自我意识是蛮强个。万一伊拉自家拣中了一个爷娘勿大满意个男朋友，就算大人再放软档低姿态个来劝，小姑娘也是听大勿进个，脾气犟起来，恨勿得就真个非君勿嫁了。外加伊拉还会列出交关亲眷朋友个经典案例，乌龟翻身咾、乘龙快婿咾，莫欺少年穷咾……言话是伊拉会讲呀！就搿能，囡儿反过来说服了爷娘。所谓“做得好勿如嫁得好”，看对了一个男人，也是嫁得好个前提之一嘛。

有个男人辣发迹前头因为名字里有一个“强”字，所以大家侪叫伊“阿强”，以至于后来上去了，立升大了，亲眷朋友脱出窠兄弟道，仍旧是“阿强阿强”个搿能喊伊。

阿强读书个辰光，屋里住辣老偏个地段，是真正“下只角里个下只角”，再加上伊个“苏北”口音，常庄拨人家看勿起。不过，阿强书读了邪气好。伊个老婆就是伊个高中同学，勿但家境优越，房子挺刮，书也读交关好。后来阿强有大出息了，老婆满足了，有辰光会问伊：“为点啥后头来侬个成绩会越来越好，还超过我了呢？”

就像所有个大户爷娘侪勿赞成自家囡儿跟穷小鬼谈朋友一样，阿强埃歇辰光也碰着了搿只现实个问题。亏了伊个老丈人想法开通，相信囡儿个眼光脱选择，搿对有情人终于走到了一道。当然咾，新房间肯定勿会做辣虹镇老街个男方屋里，而是摆辣女方个公寓大楼里。乃末，阿强就成了上门女婿。

上门女婿辣上海其实并勿算少，此地阿拉要先来说明一下，搿搭个“上门女婿”脱“招女婿”或者“倒插门”是勿一样个，上门女婿仅仅是指拿婚房摆辣女家个结婚形式，辣其他方面男家并呒没吃啥亏，至于今后小人跟啥人姓，搿点，还是按约定俗成个来。不过，上门女婿个精神地位肯定是勿大高个，比方阿强，埃歇辰光自家呒没房子也勿赅啥钞票，就连讲言话也带了苏北口音，可想而知，伊辣辣结婚以后个一段日脚里，是蛮难抬头挺胸个。基本浪向，上门女婿要比别个做女婿个男人承担更加多个家务劳动，搿里向有点生活，可能是其他男人家一辈子也做勿来个。外加，勿但要做了多，还要卖力，道理末，大家侪懂个。

直到结了婚，阿强再第一趟有机会辣浴缸里向汏浴。老早搿两家头还辣谈朋友个辰光，碰着闹矛盾，阿强会嘲叽叽个脱小姑娘讲：“侬回去[口伐]，㑚爷娘已经放好了一浴缸个牛奶，等侬回去汏牛奶浴唻！”回过头来想想，伊自家也笑了，侬看呀，两热水瓶开水倒辣浴缸里只有搿能一沰沰，哪能可能有一浴缸个牛奶拨侬汏浴呢！丈人屋里是公寓楼房，有独用个“大小卫生”----“大卫生”指个是浴缸，“小卫生”指个是抽水马桶，条件辣当时是老好个了。不过用了也有点年数了，看起来末，也已经显得老旧了。阿强觉着浴缸个底浪向有眼黑黜黜个，就寻了块砂皮想拿伊磨脱，再开自来水冲清爽。真是好心办坏事啊，啥人晓得，搿沰黑印子拨伊越弄越大，本来只有一眼眼，结果变成了一大摊。当天夜里，阿强迓迓叫查了查词典，再晓得了原来伊磨脱个勿是龌龊，而是搪瓷，勿可能修复如初了。

阿强作为上门女婿个“首秀”，就搿能留下了勿可磨灭个印记。大概也因为出了搿桩洋相，更加刺激了伊彻底摆脱“乡下人”身份个决心。后来，伊拉夫妻两家头终于有了自家个房子。当老丈人屋里预备重新装修个辰光，阿强邪气坚持个要脱伊拉买一只浴缸。

上门女婿辣辣住房紧张个上世纪七八十年代，算得上是上海个一种蛮普遍个民风现象了。做上门女婿个男人，或许辣生活浪向样样啥侪勿缺，但心里向总归像少脱了点啥一样。人辣屋檐下，勿得勿低头。只怕低头搿只动作做了辰光一长，背脊骨也就弯了，毕竟也勿是人人侪可以像上门女婿阿强搿能[身建]个呀。