[申情申音]地铁里向阿好吃物事？

《地铁里向阿好吃物事？》

作者：唐位位

朗读：唐厂长

文字编辑：麦小姐

[上海话朗读]

    今朝心想蛮好，买了两客小笼馒头到单位里向。

    看到同事正好做辣海，我讲：“菲菲，小笼吃[口伐]？”“覅吃，我肚皮里一包气还呒没消化脱来！”菲菲半爿面孔血血红，一眼胃口也呒没。“侬看我面孔喏！”

    原来，菲菲乘地铁碰着一个乘客吃小笼馒头，一包卤飙到面孔浪，推扳一眼烫出泡来，还来得个横对，讲啥个上班早，吃早饭辰光也呒没，大家要体谅。其他乘客本来还相帮讲脱两句，看到伊介凶，侪勿响了。

    葛末，地铁里向阿好吃物事啊？我持否定意见。公共场所各有各个功能，进食寻饭店，排泄寻厕所，明明是基本个常识，现在偏偏争得面红耳赤。有排朋友嘲叽叽个讲，地铁浪向小便也蛮正常，吃物事末更加毛毛雨唻，又呒没制度约束。还有朋友讲，我也晓得勿对，但是饿伤脱哪能办呢？顶顶气人个就是菲菲碰到个，伤了人还强词夺理。

    看看伊拉，除了地铁浪向吃小笼还吃啥？桂林米粉、臭豆腐干、韭菜饼！相比之下，有一个吃烘山芋个小姑娘引起普遍同情，理由是：“吃烘山芋总归比吃臭豆腐干、韭菜饼识相好[口伐]？”实在是又好气又好笑。

    其实，上海地铁每一站间隔辰光勿长，假使有啥紧急需要，稍为屏一屏，一个健康个人绝对勿会屏伤脱个呀。听一个朋友讲，地铁浪向吃物事，容易引（起）老虫。老虫对地铁个运行有破坏作用，听起来蛮危险个噢，我也勿晓得真个假个，提出来供大家探讨。

    社会辣进步，现代人硬件教育上去了，文明程度也有待提高。我希望大家从地铁浪向勿吃物事做起，遵守公德，也希望有关部门能够出台具体个约束措施，帮忙维护城市秩序，让城市越来越美好。