[申情申音]蚕宝宝

《蚕宝宝》

作者：开心权世界

改编：麦小姐

朗读：唐厂长

[上海话改编]

三月末个江南小村，岸边个杨柳树已经早早个换好“军装”，准备来一场青春飞扬个“军训”。河对过绿油油个麦田旁边，几个小囡正蘸了肥皂水辣辣吹泡泡，一面吹一面跑，肥皂泡连连串串，像是列队迎接搿场春个“演习”，拨了太阳一照，闪出珍珠一样个五彩光泽，随风飞上了天空，越飘越远。搿幅“自由追梦”个动态画面，辣金黄色油菜花个映衬之下，显得鲜亮而有趣，好比是帮白居易写个《忆江南》增加了现实版个注解。

我从小一直是住辣农村个。我伲农村烧土灶，往往是一个人立辣前头炒菜，另外一个人啊，蹲辣灶后头调节火头个大小。从分工来看，“掌勺朋友”是有“指挥大权”个。我想起有一趟放学回去，看到伲爷娘勒辣烧夜饭。老规矩，爸爸伏辣灶背后打下手，歇脱歇末朝灶肚里向添把干柴，一只手还捏牢张过期个报纸，有心有想个辣看上头个“旧闻”。姆妈喊了一声：“火再旺一点噢！”伲爷勿晓得是忒激动还是忒积极，顺手就拿埃张报纸塞进灶肚里去了。只听到一串“毕力百辣”个声音，搿只声音我熟悉个呀，乃末死！我晓得坏事了！张报纸里向有成百上千粒蚕宝宝个子，侪是小生命啊，搿记全部报销脱了！

我要紧冲上去，抢过伲爷手里另外半张报纸，还好还好，报纸反面还剩了“半支队伍”。搿点“革命个种子”赛过是星星之火啊，我有信心让伊拉再次发展壮大。讲做就做！我拿报纸扯开分成几份，到灶披间个橱里向寻来两盒自来火，拿洋火梗末倒出来，只要两只空盒头派用场；然后，我再去屋里个小仓库里扯了几团棉花，又掯着一支旧毛笔。物事准备停当，乃末，我重新培育蚕宝宝个工程也就可以正式启动了。我拿埃张有蚕宝宝子个报纸用棉花包起来，囥辣贴身个衬衫袋袋里；毛笔脱自来火盒头末，摆辣书包里备用；读书去个路浪向，我又去采了几片新鲜个桑叶，侪是拣嫩头扚个。搿点准备工作全部做好，挨下去就是等了。

养过蚕宝宝个朋友大家侪有数个，搿段等个过程是蛮难过个啦！又因为是随身带个，实话实讲，我上课也呒没啥心想听了，只等下课铃一响，马上用闪电般个速度拿出来看看，常怕错脱点啥一样。要勿是讲台高头埃双眼睛忒凶，我估计自家辣课堂浪向就屏勿牢了。就搿能等啊等，等了两日天也呒没啥个新花头，我有眼劲道勿足了，刚刚开始个兴奋感也有点茄脱了。不过啊，每天我仍旧会辣辣读书去个路浪向，采几片新鲜桑叶备用。

又过了两天，就辣我一本正经考虑是勿是因为自家棉花团包了勿够紧而影响蚕宝宝孵化进度个辰光，伊就搿能静悄悄个来了！我豪[忄叜]寻出旧毛笔，顺牢伊探出来个半截身体朝后头刷，紧张了气也勿敢透。十几秒钟以后，自来火盒头里向出现了一条小小个新生命，还像模像样个辣埃片叶子高头“做体操”。再过脱一歇，又伏出来了好几条，呒没两天功夫，我搭个两幢“独栋别墅”就开始有眼轧了，真是闹猛得来勿得了啊！

搿就是我小辰光养蚕宝宝个经历。埃歇也呒没啥其他白相干，几条蚕宝宝或者是一只小花狗就可以让我开心交关日脚，直到大了再回想起来，仍旧是老扎劲个。我觉着，虽然现在个小朋友生活水平是提高了，但像搿种“纯天然”个乐趣却流失了勿少，讲起来啦，也是一桩蛮遗憾个事体啦。