[申情申音]嘉定年味（三）

《嘉定年味（三）》

作者：嘉定一叟

改编、朗读：麦小姐

[上海话改编]

年三十是一夜连双岁、五更分两天个，除脱老人脱小囡，大人们侪要守岁。十二点钟一过，炮仗百响“坪令朋冷”放起来，屋里条件勿好，买勿起个人家，也会来一道轧轧闹猛。不过近几年上海外环里向侪禁止了，虽然嘉定大多数个区域还可以放，但放个人是越来越少，所以搿只闹猛，也轧大勿着了。

大年初一，因为前头一夜睏了晏，可以辣床浪向多赖脱一歇，就算侬老早醒了，也覅极了爬起来。有搿能一种讲法，年初一起得晏个人家，说明日脚过了适意，既有铜钿又有闲，勿愁吃欱，勿担心事，否则就自认是“劳碌命”，还是“做煞勿发财”个埃种。新年个第一顿早饭，本地人蛮多是蒸点糕，配一碗酒酿圆子，吃了浑身暖热烔烔。酒酿是自家屋里辣年前就做好个，就等了年初一开缸拆封；圆子呐，大个像桂圆大小，小个像黄豆大小，不过，侪是实心个，全凭各人欢喜了。

吃罢早饭，大家换了新衣裳新鞋子，按辈分排好，挨一挨二向长辈们拜年，拜过年，就有得压岁钿好收了。不过啊，老早大人拨个压岁钿侪蛮少个，普通人家一只红包里也就是几角，顶多一块。尽管搿能，辣当时也已经是老勿容易个了，口多手少嘛。小朋友收到个压岁钿，基本浪向侪要上交爷娘，自家拿个呐，也勿会烂吃烂用。

年初一个规矩是勿跑亲眷个，也勿可以随便讲粗口，打人是更加勿来三个了。新年新始，大家侪要和颜悦色，碰着隔壁邻舍，客客气气个打声招呼，还要加一句吉祥言话，讲了最多个，要算是“恭喜发财，四季如春”了。年初两开始走亲访友，东家拜拜年，西家吃吃饭，闹猛了勿得了。小人跟了大人后头最扎紧，又有得孛相，还有得吃。

年初三是出嫁囡儿回娘家个日脚，也叫“归宁”。搿天女婿是板要陪了一道来个，手里拎个大包小包越多，丈人丈母娘就越有面子。我老早小个辰光，看到过囡儿回娘家，老公挑担子个“盛况”。箩筐里装满了孝敬丈人老头个礼物，有原只头个猪腿；像小囡一样长个乌青鱼；像磨盘大小个红糖糕、白糖糕；还有鸡鸭年货，红烛棒香咾啥，重墩墩个两大筐，拿根扁担也揢弯脱了。外加每样物事高头侪贴了张红纸头，配合了红红火火个年景，看起来交关喜气。

年初五是接财神个大日脚，特别是做生意个人家，对搿桩生活是格外上心个。初四夜里就勿睏了，高升百响当然是少勿脱个，还迭为要到船浪人埃搭去拣一条活蹦乱跳个大鲤鱼，再到乡下去弄一只山羊头。活个鲤鱼放辣大碗里，两头高翘，当中贴张红纸头，赛过一只金元宝；生个山羊头摆辣盘子里，也像一只银元宝。等到十二点钟快，供辣财神老爷个塑像前头，点香烛，放炮仗，百响震天，用搿套仪式来迎接财神，望了开年生意兴隆，财源广进。仪式结束以后，东家会拿鲤鱼放生，拿羊肉分拨过路人。

但不过，初五搿日天也勿是人人侪介称心个，埃些店铺个伙计，尤其是刚刚来学生意个朋友，就有眼思想负担了。搿天老板接财神，喊侬去相帮，假使拿到帖子个，说明开年继续留用，有口东家饭吃吃，否则，就是回头侬生意，第二日，自觉点卷好铺盖准备跑路[口伐]。

元宵节是正月十五，本地人也叫“正月半”或者“上元节”，“闹元宵”是年节里最后个一出重头戏，用现在个言话来讲，赛过是去看新年音乐会了。除脱吃汤圆，还有勿少娱乐活动，当中最隆重个当属元宵灯会了。家家人家侪会挂灯，有街浪卖个彩灯，也有考究眼个宫灯，当然，最多个肯定是兔子灯。竹条扎出兔子个架子，里向点蜡烛，外头糊纸头，底盘浪装四只轮盘，可以接根绳子拖了跑，小朋友最欢喜了。

老早辰光呒没啥个路灯，一到夜里就墨墨黑了，但正月十五搿天，是家家亮、街街亮个，跑到阿里，侪是灯火通明。灯会又可以细分成功“文灯”脱“武灯”。“文灯”出会以妇女为主，除脱各种灯饰，还有丝竹鼓乐引路，接辣后头个是抬脚，有关公、张飞、周瑜等等个人物画像。“武灯”是由清一色个男人组成个舞龙队，前有夜明珠开路，栩栩如生个金龙、青龙、乌龙紧随其后。一般一条龙侪有十几节长，要十几个人一道发力再甩得起来，上下翻腾，活龙活现。街路高头轧满了看舞龙表演个人，大家一道拿春节里个闹猛气氛推到了顶点。埃歇还呒没啥个公费活动，交关舞龙师傅侪是自发组队个，做龙灯个费用呐，也是靠商会当中个一部分本地人热心赞助个。所以啊，从灯会个规模脱闹猛程度，可以看得出当年年势个好坏。

“走三桥”、“摸门钉”搿两只习俗，实际浪向是本地人个一种祈福仪式。“三桥”，指个是“太平桥”、“吉利桥”脱“长庆桥”。据说正月十五辣鼓乐声里依次走过搿三座桥，就能够得到老天爷个保佑。所以辣民间，有“走过太平桥，一年四季身体好；走过吉利桥，生意兴隆步步高；走过长庆桥，青春常驻永勿老” 搿能个讲法。而“摸门钉”个“门钉”，是指孔庙大门上头个铆钉，老早点科举考试还呒没取消个辰光，平常女人家是勿好进孔庙个，只有辣正月十五搿天，已经出嫁个妇女再可以进庙摸一摸大门浪向凸出来个铆钉。相传，摸过以后，能够早生贵子。搿只习俗，也从侧面反映了当时社会妇女地位个低下。

年夜接近尾声，“和年羹”可以烧起来了。关于“和年羹”个出处，民间有勿少传说。其实，顾名思义，“和年羹”迭种吃食，讲穿仔就是拿新年里吃剩下来个菜并辣一道，加点米烧成功个粥。不过，假使屋里呒没介许多剩菜，到了搿天，也可以买眼老菱、地梨、红枣、油条子、豆腐干咾啥，再搓眼糯米小圆子，脱青菜、粳米一道爊一镬子粥，爊了越烂越是香。吃过“和年羹”，赛过是提前预告了年节个结束。

正月十五吃过中饭，要准备“接灶神”了。先去“扎纸店”里请好一张“灶敬公公”个画像，辣吃夜饭前头拿伊贴到灶壁浪向，乃末就算是拿腊月廿三送上天个灶神老爷，重新请了回来。

等到正月十五一过，搿个年也就正式结束了。店铺开门，学堂开学，机关上班，农民下田，一切作息回到正轨，还呒没过煞瘾个朋友，也只好等到开年了。

写到此地，我勿由感慨，老早过年实在是蛮有劲个，虽然生活条件一般，但人与人之间个关系侪老热忱老真挚个。而搿样子传统个本地年俗，有交关，现在已经拨淡化甚至遗忘了，“年味”也变得有眼像糖精冲出来个糖开水，魂灵头落脱了，走勿到心里去，只好用来骗骗味蕾。无奈归无奈，年总归要过个，“麦唐作”提前预祝大家心想事成，吉祥如意。最后，非常感谢“嘉定一叟”老先生写了搿篇介有意义个文章！有些故事，现在再勿写下来，记得个人就越来越少了，再下去，可能真个连晓得个人也呒没了。