南音《男燒衣》白駒榮 附曲詞

【南音】

聞得妹你話死咯，我實在見悲傷；

妹呀你為因何事呀，攪到自縊懸樑。

人話死咯，尚屬思疑，我唔信佢講；

今日你果然係死咗咯，叫我怎不悲傷。

唉，妹唔望係與嬌彈共唱；

唔望燈前月下呢，共你結呢段鸞凰。

呢回任得天上係跌一個落嚟，唔慌我仲想；

唉！愁有萬丈呀，

不若把隻小舟將水陸放呀，

等你早登仙界啫，咁就直上到慈航。

忙解纜，出到江濱；

只見江楓呢漁火照住我愁人。

各物擺齊兼共果品呀；

唉！我願妹呀你前來鑑領我誠心。

(轉【乙反南音】)

唉，燒頁紙錢珠淚惡忍；

三杯薄酒啫，我奠妹孤魂。

燒到童男童女，等你相親近；

吩咐眾人使喚要聽佢嘅酌斟。

嗱大褦咯鎖匙交過你收緊；

你切莫呀頑皮，激著主人。

燒到胭脂和水粉；

刨花兼軟抆，

鑑妝一個呢，照妹孤魂。

(轉【正線南音】)

燒到芽蘭帶，與共繡花鞋；

可恨當初唔好，早日帶妹你埋街。

免使呀你在青樓多苦挨；

咁好沉香當作爛柴。

呢條芽蘭帶咯，乃係小生親手買；

可惜呢對花鞋繡得咁佳呢。

記得八月呀中秋同把月拜；

仲話二人衾枕啫都永結和諧。

點想別離你心事古怪；

誰知錯意把妹命來嘥。

唉我越思越想呢心痛壞；

珠淚流唔嗮咯，

妹呀你便夢中魂魄，共我講幾句情懷。

燒到被鋪蚊帳，係出在杭州；

仲有香珠一串十八子掛在妹襟頭。

燒到煙槍煙托呢與及雷州鬥；

我又來燒到呢個煙屎勾。

局砂呢一盞光明透咯；

但凡燈暗妹呀你自己添油。

呢盒公煙呢如果係舊；

馨香翳膩咯都解得下煩憂。

你無事拈來燂佢幾口；

(轉【乙反南音】)

唉不妨陰府呢你自己綢繆。

(轉【正線南音】)

咁多物件燒來交過你手；

至緊關防門戶咯莫俾怕人偷。

妹呀你生時所用呀般般都有喇；

今日把火焚燒在水面浮。

我再酌酒，

都奠妹妝台；

願妹呀你前來鑑領我一杯。

等你飲過此杯呢離了苦海呀；

咁就早登仙界咯係直上到蓬萊。

又到艇嫂上前同佢抹淚；

叫聲呀大相呀你切莫咁悲哀。

捨得多情愁冇多情配；

奴奴情願共你為媒。

你既有呀真心呢寧守耐；

等我找尋一個仲靚過花魁。

唉，人話男子心腸多變改啫；

但係我見君呢情義真正少人陪。

嗱！蠟燭替君流血淚；

半天仙鶴呢渡郎追。

你不如就忍淚啦係埋街去；

咁免令今夜咯你自己癡呆。

我忙呀轉呀艇喇，就快如雲；

嚟喇雙槳齊搖水面奔。

海闊呀風狂你須要坐穩咯；

等我行埋共你講幾句時聞。

我哋隔離呀有個叫做馮人引；

真正好品呀，

腳又細時滿手黹針。

年方二八知書禮；

詩詞歌賦樣樣皆能。

舊時有位少爺話同佢上岸呀；

佢要揀個多情人仔至兩相登。

我問聲呀大相可否心情允；

唉真正妙甚，真妙甚咯，

等我把鵲橋係高架起咯，等你直上到浮雲。