南音《客途秋恨》白駒榮 附曲詞

清●嘉慶學者纓艮 原創，清●道光葉瑞伯 重編

【南音】

涼風有信，

秋月無邊；

虧我思嬌情緒好比度日如年。

小生繆姓乃係蓮仙字；

為憶多情歌女叫做麥氏秋娟。

見佢聲色與共性情人讚羨；

佢更兼才貌的確兩相全。

今日天隔一方難見面；

是以孤舟沉寂，

晚景涼天。

你睇斜陽照住嗰對雙飛燕；

虧我獨倚蓬窗我就思悄然。

耳畔聽得秋聲桐葉落；

又只見平橋衰柳鎖住寒煙。

第一觸景係更添情懊惱；

睇我懷人愁對月華圓。

正係舊約難逾潮有信；

新愁深似海無邊。

睇我情緒悲秋同宋玉；

況且客途抱恨，你話對乜誰言。

記得青樓邂逅，嗰晚中秋夜；

我共你並肩攜手，拜月嬋娟。

我亦記不盡許多情與義；

纏綿相愛，又復相憐。

共你肝膽情投，將有兩個月；

唔想同群催趲係要整歸鞭。

共你幾回眷戀，總係難分舍；

怎料緣慳嗰兩個字，拆散了離鸞。

正係淚灑西風紅豆樹；

情牽古道白榆天。

共我杯酒臨歧，同我餞別；

在嗰處望江樓上，設下離筵。

你仲牽衣至囑，嗰段衷情話；

叫我要存終始，總要兩心堅。

今日言猶在耳，總係成虛負；

屈指如今又隔了一年。

近日聽得羽書馳牒報；

仲話干戈撩亂擾亂個江村。

嗰啲崑山玉石也遭焚毀；

好似避秦男女入桃源。

你係幽蘭不肯受污泥染；

又怕賊星來犯月中仙。

你話嬌花若被狂風損咯；

一定玉容無主，

倩乜誰憐。

嗰陣輾轉馬前遭血濺；

日落魂歸玉化煙。

你話若然艷質遭兇暴；

我寧願同埋白骨去伴姐妝前。

或者死後得成連理樹；

好過生時常在呢個奈何天。

但望慈航法力總要行方便；

就把楊枝甘露救出火坑蓮。

等你劫難逢凶俱化吉；

嗰的災星魔障兩不相牽。

虧我心似轆轤千百轉；

空綣戀咯，

嬌呀但得你平安願啊，

我就任得你天邊明月

都照向別人圓。

(轉【乙反南音】)

聞擊柝咯，

鼓嘅三更啊；

只見江楓啊漁火照住我愁人。

幾度啊徘徊思往事啊；

我勸嬌唔好咁癡心啊。

風塵不少憐香客；

羅綺還多惜玉人。

試話煙花誰不貪豪富咯；

做乜你偏把多情向住小生。

況且我窮途作客囊如洗；

擲錦纏頭愧未能。

記得填詞偶寫嗰段胭脂井；

你含情相伴你對著盞銀燈。

你細問我嘅曲中何故事咯；

我把陳後主嗰段風流講過你聞。

講到兵困景陽家國破；

歌殘玉樹後庭春。

攜住二妃，(拋舟腔) 攜住二妃藏井底；

死生難捨、難捨、難捨佢嘅意中人、人啊人。

聞聽此言你多嘆息；

仲話風流天子更重係情真。

(轉正線)

但係唔該享盡奢華福；

就把錦繡江山委路塵。

你係女流也曉興亡恨；

不枉梅花為骨雪為心。

仲話我珠璣滿腹者實在原無價；

我知你憐才情更不嫌貧。

想到此情欲把嫦娥問；

無奈楓林見得月色昏。

遠望樓台人影近；

人影近咯，

都莫非相逢呢一位月下魂。