广播专辑 弄堂茄山胡694 丰水梨两吃

丰水梨两吃  
  
沈一珠  


　　蛮有意思嗰，现在到小菜场去买菜，常常可以看到青菜、萝卜旁边，还有苹果、生梨堆辣海。或许就是因为蔬果是一家门，怪勿得水果店里也有一盒盒荷兰黄瓜摆好仔，当伊水果。


　　搿天，辣辣常去个摊位买好南瓜、青菜、黄瓜、胡萝卜之后，老板娘又热心热肠推荐：再买点生梨去吃吃，老甜老嫩嗰。


　　老板娘热情，当然是为了生意，不过，伊推荐个物事也侪是好吃嗰。前两天伊推荐嗰是马陆葡萄：看到就买点吃吃哦，马上要落市了。结果买回去一尝，还真是蜜蜜甜，味道老好。


　　搿次推荐个生梨是新上市个丰水梨，买了几只回去，汏干净，坐定削一只尝尝，水漉漉，甜味味，口感还勿错。正好准备烧小菜，就索性多削两只。


　　一只生梨拌黄瓜。一根黄瓜汏清爽后切丝，生梨汏清爽去皮切丝，一道放辣盆里，加蜂蜜和盐，拌匀后放辣密封罐里腌20分钟左右，装盆，就可以了。


　　搿天冰箱里正好还有春天里囥到现在个盐渍樱花，泡两朵出来，摆辣盆里，色香味侪有了，真是要馋煞人啊！


　　还有一只生梨炒肉丁。生梨去核切丁，正好还买了胡萝卜，焯熟切丁；瘦肉稍许，切丁，用料酒生粉盐浆一歇，开油镬炒到八分熟；再拿生梨胡萝卜丁一道摆下去翻炒片刻就好盛出来吃了。


　　【沪语解释】


　　囥：藏。


　　阿要：可要。