广播专辑 弄堂茄山胡692 饭桌浪向讲“沪谚”

饭桌浪向讲“沪谚”


文/吉日月


 有一趟陈勤建先生领仔几个专家学者来召稼楼古镇考察。中浪大家一道吃顿便饭，周曙明先生搭张石明先生作陪。陈勤建先生长期从事民俗文化保护、古镇保护开发及非物质文化遗产研究，周曙明先生搭张石明先生则是非遗保护项目“沪谚”个传承人，大家坐辣一道，话题就转到了“沪谚沪语”。


 周先生伸出右手，指指刚端上桌个“清炒螺蛳”，讲：“葛末就从迭只菜讲起好了。头一句就叫“闸蚌炒螺蛳”。陈勤建先生主动当“翻译”，讲：“就是指声音交关嘈杂。”周先生又讲：“蚂蝗叮住螺蛳脚”。“就是叮牢仔勿放，勿达目的勿罢休”。“螺蛳屁股袅头大。”“螺蛳壳浪有螺纹，螺蛳屁股只有一个点，越靠近螺口螺纹越大。意思是指有个事情看起来很小，碰着缠夹不清个人，会越搞越大，搞得邪气复杂”。


 周先生又拨大家猜谜谜子：“小小瓶，小小盖，小小瓶里好小菜。”大家一时想勿出谜底。周先生拿起一只螺蛳拨大家看，讲：“‘小小瓶’就是螺蛳壳，‘小小盖’就是螺蛳口浪向个盖头，‘好小菜’就是里向个螺蛳肉。”大家听了恍然大悟，又一道问：“还有口伐?”张先生讲：“有！搿搭还有一句沪谚，叫‘螺蛳壳里做道场’。”陈勤建先生讲：“‘做道场’讲究排场要大，螺蛳壳场地又忒小，肯定施展勿开手脚。”


搿辰光，服务员又端上来一道菜。张先生指指菜盆，讲：“大家看看，迭只菜叫啥？”大家一看，脱口而出：“三鲜汤。”“可是辣老早辰光，搿只小菜勿是啥‘阿猫阿狗’屋里向侪吃得着嗰，有句沪谚‘叫花子吃三鲜汤——要样呒样’”。陈先生解释：


“意思是穷人家想要吃三鲜汤也吃勿到，因为原料食材要什么没什么。”


接下来，周先生又讲：“辣搿搭还有句谚语‘跟仔阿妈吃喜酒’。譬如陈先生是阿拉请来个客人，来吃喜酒，伊送仔一份礼。其他人侪是跟仔陈先生一道来吃酒嗰，只管吃勿送礼。”张先生接口：“葛咾有种讲法，‘女亲眷来吃酒，邀五十，来一百’。意思是邀请女性亲眷来吃酒，往往会带一个小囡。迭个小囡就叫‘掮轧车’”。大家一听，哈哈大笑。郑土有先生讲：“噢哟，陈先生今朝是做‘阿妈’，阿拉大家侪跟仔阿妈来吃喜酒哉。”陈先生讲：“意思勿错，只勿过‘掮轧车’只有一个小囡。今朝阿拉来了介许多人，外加侪勿是小囡，个个能吃能喝，请客个主人家要吓煞哉！”


听仔饭桌浪个“沪谚沪语”交流，大家侪讲蛮有味道，“沪语”真是一种邪气有趣个语言。