广播专辑 弄堂茄山胡695 覅让孝心变尴尬

覅让孝心变尴尬


钱红春


 同事老杨退休以后一家头过日脚，儿子三日两头来看伊，每趟侪要问伊需要买点啥，伊勿是摇摇头讲“用勿着”；就是摆摆手讲“旧个还好用”。有一趟，儿子兜商场看见商家打折促销，就为伊买仔一件款式蛮时髦个羽绒衣，当满心欢喜送拨伊个辰光，伊还是嫌鄙儿子“乱花钞票”“一眼勿会过日脚”，板起面孔拿儿子讲脱一顿。儿子拨伊弄得邪气尴尬。


 老杨个老伴过世早，伊是“既当爷又当娘”拿儿子养大，现在虽然苦出头了，吃穿勿愁，但勤俭节约个习惯一眼呒没变。伊心疼儿子，晓得儿子赚点钞票勿容易，勿想拨儿子增加负担，觉着自家有羽绒衣，虽然穿仔交关年数，佝七佝八还有点褪色，领口袖口也是油光光，但认为还是可以着着嗰，儿子拨伊买新个，觉着太浪费。再讲自家年纪大了，用勿着介讲究。儿子呢，认为伊吃辛吃苦，好勿容易拿自家养大，现在自家赚钞票了，总想报答伊个养育之恩。再讲伊一家头过日脚，身边呒没人照顾，自家多关心点也是应该嗰。本来觉着搿是自家个一片孝心，呒没想着老是遭到拒绝，有辰光还要被骂脱一顿，觉着伊实在是拎勿清，想想蛮殟塞。


 老杨只顾自家个感觉，呒没想着儿子个感受，乃末伊拉两家头心里侪勿开心了。


 我觉着老杨搿能做，一是苦了自家。勤俭节约呒没错，但也要“到啥个山捉啥个柴”，老早一眼老观念，旧习惯也要改变改变，与时俱进，呒没必要再苛刻自家。再讲儿子已经成家立业了，能够自食其力了，自家也可以享受享受了，只要条件允许，吃得好点，穿得好点，提高点生活质量也是应该嗰。勿管三七廿一批评儿子，苦仔自家勿讲，也会让儿子觉着尴尬。


 二是苦了儿子。儿子为自家爷尽孝，是天经地义个事体，老是被回头脱，辰光一长，就会觉着多余，就可能习以为常，到后来干脆勿管勿问，做爷个面孔浪也勿会有啥光彩，儿子讲勿定也会背上“勿孝”个恶名，被人家背后头指指点点，弄得勿好爷两家头侪会受伤。


 三是影响亲情。尽孝本来是小辈对长辈个感恩，也是连接亲情个纽带，只要一头勿着落，孝道就会脱头落襻勿能够完成。老杨拿儿子个孝心勿当桩事体，甚至觉着儿子勿会过日脚，虽然伊是为儿子着想，但儿子心里会哪能想呢？双方虽然侪是为对方好，但一时头浪又侪勿能够被对方理解搭接受，就容易发生误会，亲情就会受到影响。所以讲，对于儿女个孝心，作为老人勿要随随便便回头脱。


 经过老同事老朋友个劝导，老杨想通了。有年过年，伊勿但开开心心接受同儿子一家旅游个邀请，还特特惠惠穿仔儿子买个羽绒衣。后来伊拿仔旅游辰光拍个照片，逢人就指牢伊着个新羽绒衣讲：“搿件衣裳是阿拉儿子拨我买嗰。”开心得勿得了。