第119集：场景--同居（1）演绎：麦麦+MOMO

场景---同居（1）演绎：麦麦+momo
导演、编剧、剪辑、后期制作：麦麦
麦麦扮演：麦麦、王梦、CC
Mo 扮演：阿伟、陈杰
………………
星期一早上8点，阿伟开车到麦麦屋企楼下。一见到麦麦就忍唔住揽住佢。
麦：（笑）早晨。
伟：（笑）早晨。哎，我琴晚失眠啊
麦：阿，点解嘅？
伟：成晚惗住你囖
麦：你琴晚做咩啊？你送我哋返屋企之后去咗边啊？
伟：无啊。撞到个朋友，去咗佢屋企坐咗一阵
麦：哦。怪唔之你打电话畀我嘅时候，听到车声啦。
伟：嗯。我哋上车先讲。
（车辆行驶中）
伟：麦麦，你有无挂住我呀？
麦：（笑）你琴晚究竟受咗咩刺激啊？我觉得你从琴晚嘅电话到而家好似有D心事？
伟：无嘢啊。我就系好想日日见到你，揽住你啰。
麦：（笑）傻瓜
伟：麦麦，你中意我D咩啊？
麦：呃，我觉得你阳光乐观，你会成日鼓励我，帮我建立自信，而且好有安全感。有你喺我身边，我会觉得好放松同安心（笑）
等交通灯时，阿伟锡咗麦麦一啖，喺佢耳边讲：我觉得你好傻，好可爱（笑）。我哋以后无论遇到咩事都相信对方。你喺我面前唔需要有任何顾虑同避忌，有咩惗法都同我讲，好无？
麦：嗯，我知道啦。
伟：我哋返到公司附近先食早餐囉。你想食D咩啊？
麦：（笑）你唔记得我哋琴日喺超市买咗片包、午餐肉、鸡蛋同奶酪咩？我今朝整咗三文治啊。你睇，我装咗落饭盒度，我哋可以返公司食。
伟：（笑）老婆勤力干净，又知悭识俭。好幸运畀我遇到你！
麦：（笑）你几时学得咁口甜舌滑架！
伟：我讲真架。如果畀我娶到你，真系有福啦。
麦：（笑）你小心开车啦，唔好挂住同我讲嘢啦
伟：嗯
....................................
星期一早上时间9:52分，陈杰办公室
（敲门）
王梦：陈杰，好忙啊？
陈杰：嗯嗯。你搵我有事？
王梦：无啊。一定要有事先可以搵你咩？
陈杰：唔系。呃...咁你自便啦，我做嘢。
王梦：等阵中午一齐食饭囖
陈杰：呃，等埋肥强翻嚟先啦
王梦：咦，我就系唔中意佢喺度。趁佢去咗东莞出差，我哋两个去啊
陈杰：呃，我等阵要搵黄工倾D嘢，唔知倾到几点。
王梦：咁都要食饭呀
陈杰：有时倾开嘢都唔记得食饭时间，你自己食啦，唔好等我啦
王梦：陈杰，点解我想同你食餐饭都咁难架！你惊我食咗你啊！
陈杰：唔系。咁做嘢紧要嘛，食饭几时都得啦，系咪。
王梦：我唔理啊。等阵中午我嚟搵你。
陈杰：我今日真系有嘢做啊
王梦：好啊，咁一于听日中午。唔准再推阿！你做嘢先啦
陈杰：喂......
星期一下午5:12分，25楼办公室
（敲门）
CC：麦麦，呢两晚落班有咩搞啊？
麦：呃，暂时无，点呀？
CC：借用你阿伟一下，得唔得啊？
麦：（笑）你要做咩啊？
CC：无啊，我租啯度就快到期啦。准备搬屋。想借阿伟部车兜两转
麦：哦。唔知佢使唔使加班喔呢。你而家执好晒嘢没啊？
CC：差唔多啦。家私又唔使搬，其实都无咩嘢执，就几袋嘢嗻。但有个细嘅米色储物柜，我几中意架，想搬埋囖。唔知阿伟部车放唔放到呢
麦：咁聪哥哥呢？佢应该帮你一齐搬吧
CC：佢梗系要帮我啦。我意思即系，如果阿伟开车，储物柜放喺后座，加埋我同聪哥哥，麦麦你可能就无（座）位坐啦 。
麦：（笑）哦，我知道啦。咁你直接问佢啦，如果佢得闲一定会帮你嘅。
CC：咦，你帮我问下佢呀。你讲好过我讲呀
麦：（笑）好
CC：唔该晒麦麦，如果阿伟应承嘅话，等阵落班就辛苦你自己返屋企啦。
麦：嗯嗯，无事
CC：麦麦真系好架嗻。等我搬屋搞掂晒之后，我请你哋两个食饭。咁我出返去做嘢先啦。
麦：嗯