广播专辑 弄堂茄山胡588 寻勿见个结婚证

寻勿见个结婚证

钱红春

 前几日我同老伴到公证处去办事体，工作人员审查了各种证明材料以后，讲还缺阿拉两家头个结婚证。

 阿拉是上世纪七十年代初结婚嗰，埃歇辰光出门办事体，袋袋里除脱钞票，还需要各种各样票证，但结婚证基本呒啥用场，还勿及每个号头用一趟个煤球卡。勿过呢，要讲结婚证一眼用场呒没也勿是事实，当时凭结婚证可以到家具店买一套新家具。勿过么，阿拉当时住辣七平方米个亭子间里，想添一只小凳子也要用尺量半天，根本呒没地方放新家具，所以搿套可以凭结婚证买个家具只好放弃脱了。

 结婚证另外一个用场是夫妻一道出远门，旅馆登记住宿要用。勿过对我来讲，每天工作忙忙碌碌，平常连附近个电影院也难得进去一趟，更覅讲出远门了，所以结婚证领来以后就一直放辣五斗橱抽屉个角落里。

 本来认为寻结婚证勿难，因为结婚证领来以后就基本呒没拿出去过，肯定放辣抽屉里。呒没想到，翻箱倒柜连寻几天，连老早仔个购粮证、豆制品卡、煤球卡、粮票、点心票侪翻出来了，就是呒没看到结婚证。

 定下心来想一想，倒也勿奇怪，老早住辣亭子间里，要寻样物事，勿辣五斗橱里，就辣床底下，寻起来交关便当。后来搬过好几趟场，房子越搬越大，屋里大大小小个橱柜越来越多，搿张五十年呒没用过个结婚证天晓得被塞辣啥地方了，甚至有可能被夹辣旧书里，当垃圾处理脱了。

 眼看递交公证书个日脚要到了，我同老伴到公证处讲清情况，工作人员一听，就让阿拉抓紧辰光补办结婚证。我一听又急了，担心辰光来勿及。记得当时从单位开结婚证明，到领取结婚证，前后用了两个多月。工作人员听我搿能一讲，连连安慰我讲：“老先生哎，现在是啥个年代了？现在当场就好领嗰。”

一眼勿错，搿天从公证处跑到婚姻登记处，除脱花辣路浪向个辰光，从审查、拍照、填表，整个过程只用了个把钟头，工作人员就帮阿拉补办好结婚证。

“早晓得补办介便当，也用勿着辣屋里翻得一天世界了。”回去个路浪，老伴自言自语。但我勿是搿能想嗰，虽然呒没寻着当年个结婚证，但寻着了交关已经流逝个记忆，也让阿拉对目前个生活增添了勿少幸福感。