广播专辑 弄堂茄山胡576 想起老早签票游

想起老早签票游

许德华

 阳光明媚，心里就有了出游个冲动，勿由想起年轻辰光乘火车到外地白相个事体，其中最有意思个就是中途签票下车，辣当地小游一番。

 我是1986年结婚嗰，当时我比较潇洒，勿欢喜摆酒席，仅仅安排两家人见了一面，阿拉夫妻俩就去桂林旅游了！搿种结婚仪式辣当时绝对新潮。至于为

 啥去桂林，因为我有一个邻居曾经辣桂林服役，一直讲“山水甲天下”，受伊个影响，桂林就成了搿趟旅行结婚个目的地。

 从上海出发辰光，身浪穿个是棉袄，到桂林下车就穿单衣了，就是到了芦笛岩、七星岩才觉得有点冷。

 从其他游客口中，我了解到火车有中途签票个服务。从桂林返回上海个辰光，我搭先生商量，打算辣衡山站下车，见识一下南岳衡山！咨询过车厢里个列车员，晓得要去火车中间一节车厢办理。负责签票个列车员相当热心，搭我讲清中途下车允许停留个辰光长短，还建议我返回辰光搭乘个列车车次。当时个火车票是一小块硬纸板，签票就是用钳子辣上头轧一只记号，标记下车个日脚。凭搿张标记过个火车票就可以再次进站上车。

 到衡山站个辰光正好半夜，因为是山区，感觉邪气阴冷，比上海个“倒春寒”还要结棍。车站工作人员吃个宵夜里侪有红辣椒。

 白天，爬衡山上祝融峰，沿途看到当地人侪欢喜吃辣，乃末晓得湖南人吃辣本事大，搿叫一方水土养一方人。因为白天爬山吃力了，半夜回到车站上车就打瞌睡。正辣迷迷糊糊个辰光，一股馨甜黏液从行李架浪流下来，滴到我头浪。一开始，蛮吃惊，勿晓得是啥物事。后来邻座勿断打招呼，讲是蜂蜜漏出来了。我听了一下子笑出来。哎呀，搿记真是名副其实个“蜜月”了。

 后来我又几次利用中途签票，去过商丘、徐州，虽然签票下车以后能停留个辰光勿长，旅行比较赶，但是当时年纪轻，倒也勿觉得吃力。

 现在已经呒没搿种签票服务了，我想可能是过去交通勿发达，人均收入也勿高，所以铁路部门好心，超常发挥一张火车票个作用。现在高铁朝发夕至，电子票取代了纸质票，火车中转十分流畅，所以就用勿着签票了。