广播专辑 弄堂茄山胡575 想起从前捉汏浴

想起从前捉汏浴

朱锦华

 看到迭个题目，勿少读者肯定要问，啥叫捉汏浴？喏，就是拿混进阿拉厂里来汏浴个人捉出去。日脚一长，就成了阿拉个一句口头禅。

 上世纪90年代，我辣一家钢铁厂上班。厂里有三个轧钢车间，车间里个烘炉拿钢坯烧得通通红，还会产生大量热水搭仔蒸汽，可以拨食堂搭仔浴室用，甚至还可以供应附近个其他厂家。厂里浴室也造得既宽敞又明亮，男浴室个浴池大得像游泳池，淋浴个莲蓬头超过四十只，走廊里还有滚烫个热水汀供热。可以讲，辣附近所有工厂里，阿拉钢厂个浴室是最适宜嗰。所以么，一到冬天，就会有勿少厂外人员混到厂里来汏浴。

 本来么，有人混进来汏浴勿算啥大事体，但是通向浴室个小路边有废钢堆场，其中一部分钢条是刚刚从轧机里出来嗰，温度邪气高。厂里人侪晓得搿搭危险，会避开，厂外人员勿晓得，就容易发生人身伤害事故，所以厂里保卫科下令，有人混进厂里汏浴，一律捉出去。有一段辰光，我辣厂门口个警卫室上班，“捉汏浴”就是工作内容之一。

 一般来讲，搿点混进来汏浴个人早班勿会来，夜班也勿会来，但是上中班个辰光就一定要当心，一勿留意就可能有人溜进去。有一趟，我眼看有人溜进去，马上追过去，结果伊已经熟门熟路冲进浴室了。我追进去一看，伊已经立辣莲蓬头下面了。我先凑过去客客气气问一句：“老师傅，侬是啥车间嗰？”他一呆，支支吾吾回答勿出。我面孔一板，一声吼：“侬汏好马上出来，到保卫科接受处理，否则我拿了侬衣裳先走！”伊只好讨饶：“老爷叔帮帮忙，下趟勿来了！”看伊蛮诚恳，我叮嘱千万覅去废钢堆场，注意安全，还是放伊出厂了。

“捉汏浴”最忙个辰光是每年春节前后，人人侪想干干净净过新年，但是当时个居民住宅里基本呒没汏浴设备，厂门口总有人来吵吵闹闹，纠缠不休，弄得阿拉警卫室有眼挡勿牢了。厂领导考虑到厂里的灰尘、废气、噪音一定程度浪也影响周边居民生活，就联系附近居委会，同意发放一部分汏浴票，让居民可以辣规定个辰光进厂汏浴。搿能一来，附近居民侪开心得勿得了，纷纷扶老携幼进厂来，一片喜气洋洋。

 现在大家个生活条件大大改善，家家户户侪有浴室，热水也是水龙头一开就有，根本勿会提心吊胆溜到啥个工厂里去汏浴，想到搿点，我心里总是十分感慨。