广播专辑 弄堂茄山胡574 外婆个“上海闲话”

外婆个“上海闲话”

陈金生

 春节长假呒没出门，一家老小有了充足个辰光茄山河，讲起勿少小辰光个事体，其中就有外婆个有趣谈吐。记忆里，外公埃歇辰光辣一家慈善机构工作，外婆辣屋里操持家务，伊讲一口糯搭搭个上海闲话，勿少讲法邪气有趣，六十多年过去了，我仍旧记得清清爽爽，下面摘录部分。

 徐胧胧：疲倦，头脑朦朦胧胧，昏昏欲睡。例句：今朝我一觉醒过来精神老推扳，徐胧胧嗰，只想再困一只回笼觉。

 眼闭瞌目充：跟“徐胧胧”差勿多。不同的是，更加疲倦，瞌目充连连，眼皮搭辣一道是显著特点。例句：搿桩生活老重嗰，又连辣海做仔一整天，夜快头了，大家侪是眼闭瞌目充。

 打昏涂：打呼噜、打鼾。“昏”表示入睡达到的状态，“昏涂”表示呼噜、鼾声——用搿两个字，正好表示：困得昏沉，肚皮里个气不断冲出，响声一片。例句：一进旅馆，导游就对阿拉讲：打昏涂嗰住辣一道，省得影响人家。

 伴野猫猫：即普通话所讲“躲猫猫”游戏。“伴”：意思是躲藏，但勿是当真不拨人家寻着侬，而是躲起来白相相嗰。例句：搿点小鬼头伴野猫猫门槛老精嗰，一歇歇工夫就看勿见了。

 五斤吼六斤：说话、争论时激烈急迫的样子。例句：有闲话可以平心静气讲么，何必搿能介五斤吼六斤个样子！

 亨八冷打：总共、统统、全部个意思。例句：我身边亨八冷打只有搿点钞票，侪借拨侬好了！

 阿王炒年糕：形容吃力不讨好。例句：我吃吃力力帮侬忙，侬还怪我，真叫阿王炒年糕。

 腻滋疙瘩：指优柔寡断、做事拖泥带水，勿爽气、勿利索。例句：伊做生活腻滋疙瘩，一点也勿爽气。

 牙齿笃笃齐：意思是说话之前要考虑清楚，不要信口开河，胡言乱语。例句：侬覅瞎三话四，拿牙齿笃笃齐再讲。

 饭瓜生辣甏里：饭瓜即南瓜，甏指陶罐，当南瓜在陶罐里长大后就取不出来了，要么打破陶罐取出南瓜，要么把南瓜切碎取出，比喻事不能两全。例句：搿桩事体做得勿二勿三，真是饭瓜生辣甏里。