广播专辑 弄堂茄山胡572 适可而止“卖面子”

 适可而止“卖面子”


胡维兴


 上海闲话“卖面子”，是指看在情面上帮忙，类似个说法还有“卖面孔”“卖人情”“卖交情”。


 总个来讲，上海人是爱面子嗰，对于人生“三碗面”（体面、情面、场面）邪气讲究，乃末为了讲面子，难免掼票子。碰着亲眷朋友婚丧嫁娶，迭份礼金总归少勿脱。碰着自家结婚生小人，生日做寿摆宴席，哪怕自家勒紧裤带，对外也要台型扎足。


 乃末有辰光，稍微一豁边，就变成死要面子活受罪。就像有一年春晚上个小品，主人公吹嘘有内部关系可以随便买到火车票（火车票邪气紧张），结果大家侪来寻伊帮忙，乃末伊只好自家深更半夜去火车站排队买票，甚至花高价买黄牛票，结果是“打肿面孔充胖子”，吃力勿讨好。


 上海人讲“卖面子”，其实讲嗰是感情，正是因为感情深厚，才有面上光彩。假使只是泛泛之交，覅讲“面子”，连“夹里”也勿会拨侬。乃末，讲是讲“卖”，其实属于人情往来，今朝侬卖伊面子，明朝伊卖侬面子，一来一去，有来有往。


 当然大家侪是“瞎子吃馄饨心里有数”，互相“拎得清”，假使一趟又一趟个麻烦别人，到头来，迭只面子就“卖”勿出去了。


“卖面子”讲究互相尊重，“侬敬我一尺，我敬侬一丈”，“卖面子”需要慎重，花出去“票子”勿一定就能换来“面子”！有人想要“卖面子”，需要看是啥事体，有种忙可以帮，有种忙勿能帮，原则性错误更加勿能犯。还有个辰光，碰着自家能力搭勿够，“卖面子”成了一道“难关”，搿辰光只好拿情况如实向对方说明，覅自家拨自家吃药。