广播专辑 弄堂茄山胡569 浦东丈人搭仔崇明女婿

浦东丈人搭仔崇明女婿

施在隆

 浦东三林个老崔，搿天一早对左邻右舍讲：“崇明女婿要我去白相，昨日夜里特意打电话拨我。”讲闲话辰光一面孔自豪。

 老崔一到崇明，女婿就拿陪老丈人当作头等大事。海塘是崇明个标志景观，也是伊拉个首选景点。老丈人一到海塘就称赞：“搿搭虽然呒没名山，但是有大川也邪气灵光！”崇明女婿马上纠正：“崇明不缺名山，鳌山路向东就是金鳌山，山浪有镇海塔，山下有玉莲池，玉莲池里向个得月桥是赏月个好地方……”崇明女婿讲起金鳌山如数家珍，老丈人听得心里乐滋滋，心想女婿肯定是为了接待自家事先做过勿少准备。伊个胃口也拨女婿个介绍吊起来了，讲：“搿趟我也要抽辰光去金鳌山看看。”

伊拉辣海塘边浪边走边看，讲讲笑笑。崇明女婿好像生怕老丈人辣崇明岛浪迷路一样，一路手牵手，呒没松开过。几个熟悉崇明女婿个朋友看到伊拉，辣旁边戚戚促促，讲：“女婿待老丈人介好真是勿大有个……”闲话传到老丈人耳朵里，让伊心里邪气开心。

 两个人立辣海塘边望野眼，天高云淡，江南景色分外妖娆。近看，长江水“无风也生波”，10几只洁白如雪个海鸥，时而群飞滑翔低空，时而双双停落江面，搿种“相亲相爱水中鸥”个倩影，让浦东丈人几度回眸。崇明女婿讲：“你假使欢喜看鸟，我陪侬去东滩湿地鸟类保护区，伊面看鸟更加扎劲。”

双休日，翁婿两家头拿仔鱼竿，到郊外小河边。眼门前马兰头青青，彩蝶翻飞，绿化带中鸟声啁啾。从闹市喧嚣里走出来个老丈人产生了一种拥抱大自然个激情，钓鱼还呒没开始，心已经醉了，讲：“来到搿搭即使钓不到鱼，心里也是蛮惬意个。”崇明女婿讲：“我出来钓鱼，从来勿会空仔手回去个。”伊拉一边讲闲话一边理线、验钩、装饵。等到钓竿出手，鱼钩下水，两家头侪眼睛不眨，屏气凝神，好像高僧入定。一旦线绷紧，竿似弓，沉甸甸个大鱼钓出水，女婿就会眉毛翘起，丈人则是眼睛眯成一条线。

 除脱钓鱼，浦东丈人还喜欢搭仔崇明女婿打牌。女婿是打牌高手，晓得对方心里想法，每趟打牌侪会装憨，故意让老丈人赢几趟。浦东丈人木知木觉，还邪气得意。

 辰光过得快，老丈人自家定个“半月游”眼看就到辰光了，想要回去了。女婿开口挽留：“侬已经退休了，用勿着介急，崇明也是侬屋里呀。”看到女婿满脸真诚，老丈人真是“越看越欢喜”。伊自言自语：“几个小辈里向，小施（指崇明女婿）对我最贴心。”旁边女儿听到了，有眼吃醋，讲：“阿爸只晓得女婿好。”浦东丈人就讲：“我讲闲话实事求是，小施对我确实好！”弄得崇明女婿难为情，讲：“其实我对阿爸呒啥好，只是一般性，一般性。”