广播专辑 弄堂茄山胡564 姆妈来信寄深情

姆妈来信寄深情

陈日旭

 写信，是一种思想情感个书面交流方式，尤其是几十年前，埃歇辰光，家家户户都会有点信件往来，无非多少而已。我手里就有交关当年姆妈写拨我个信，已经保存六十几年了。

 上世纪60年代初，我光荣入伍，离开学堂奔赴军营。半个月新兵营集训结束分进连队，有了确切个部队番号、地址，当然就要抓紧辰光写封信回家。

 阿拉屋里父亲早故，祖母年迈，兄弟尚小，收信回信侪是姆妈亲手做嗰。姆妈是1924年出生嗰，能写会算，有一定个文字功底，按照当年个社会环境，搿是相当了不起嗰。

 进入连队勿到十天，部队外出野营训练，正是夏秋之交，南方山里又闷又热，长途跋涉、急行军，脚上起泡，半夜站岗，来自大城市个我，难免有点畏难情绪。返回驻地后，我拨姆妈写信，告诉伊自己个情况。一个礼拜后收到姆妈回信，伊辣信里写道：侬勿能怕苦，部队是个大熔炉，最能锻炼人。还讲，磨难是人生勿可多得个财富，叫我安心服役，好好锻炼。

 来信里个字里行间侪是暖心个宽慰话，让我深受感动和鼓舞，眼角也有了泪花。令我印象格外深个是，姆妈来信中个字体工整娟秀，因为伊习惯使用繁体字，很多字笔画繁复，却一笔一画写得一丝不苟。搿也是我除了姆妈个签名外，第一次看到伊写介许多字。行文间，还会夹杂几句半文言个句子。顶好白相嗰是，伊寄拨我信个信封，侪是桔黄色嗰，傍晚，通信员发信，我离得老远就可以一眼认出来。我晓得伊是辣弄堂口个小烟纸店里买嗰。顺便插一句，阿拉连队里我收到个来信最多，一方面是我除脱家信，还有亲戚、同学、朋友个来信；二方面是我笔头快，写信勤，当时军人寄信勿用贴邮票，有一种三角形个图章，正面是五角星图案搭仔“免费军事邮件”几个字，图章一敲，信就上路了。

 入伍一年半以后，有一天，收到姆妈来信讲，老祖母因病去世，并叫我勿要跟领导汇报，家中后事有亲眷、邻居帮忙办理，叫我放心。搿能，我也就拿悲伤情绪囥辣自己心里。到了休息天，我去军人信用社从津贴存款里拿出大部分寄回家。

 之后，一方面我已是老兵，适应部队训练，生活节奏。另一方面姆妈放心了，来信也就少了，但每月仍有至少一封信。有辰光，手捧来信，我总会想到伊因为长期操持家务，以及冬天洗衣做饭接触冷水，经常僵直肿痛个手……

埃歇辰光，虽然勿打仗，勿是“烽火连三月”个战争年代，但驻地靠近海边，附近常有敌特骚扰，突发处置行动勿少，所以辣我心里，依然有“家书抵万金”个感觉。

 流年似水，韶光易逝。如今，我已经是一个白发老人，九十余岁个姆妈也辣几年前一个暮春个夜晚离我而去，只余记忆与我相伴。