广播专辑 弄堂茄山胡562 芒种 黄梅 咸酸饭

芒种 黄梅 咸酸饭
小申
 《新民晚报》历年刊载关于“咸酸饭”个文章勿少，最近一篇褚半农老师写个《咸酸饭上话“咸酸”》读起来尤其让人感觉耳目一新。葛末迭种让上海人心心念念、津津乐道个“咸酸饭”究竟是从啥地方来嗰呢？搿就要从江南地区农耕劳作个种田人讲起。
 每年六月初，是农历“芒种”节气，搿段辰光南方大多潮湿多雨，所以也叫“黄梅”季节。“芒种”个意思，就是播种水稻之类含芒刺个农作物，农民从搿歇辰光开始繁忙个插秧劳作。为了提高效率、勿误农时，屋里向会拿中饭直接送到田间地头，免得做生活个人一来一回耽误辰光。搿种早期农田送餐行为，就叫做“发黄梅”。清代枫泾人沈蓉城有首《枫溪竹枝词》：“梅雨频连时雨催，家家具饭发黄梅”；伊辣词末特地注释：“农人种秧日发黄梅”。现在从百度浪也可以查到：“松江农民称插秧为‘种秧’，插秧第一天称‘开秧门’，亦称‘发黄梅’。”“开秧门”个重点是插秧，“发黄梅”个重点是送吃食。上词中“具饭发黄梅”就是准备送去田头个吃食。迭种“发黄梅”个习俗，阿拉辣宋代蔡伸个《长相思·村姑儿》词里向就已经可以看到了：“村姑儿，红袖衣，初发黄梅插秧时，双双女伴随；长歌诗，短歌诗，歌里真情恨别离，休言伊不知。”讲嗰就是小姑娘借送饭个机会，用唱山歌个方法向心仪个小伙子传递相思之情。

 清代末期另一位枫泾人程兼善写了一首《枫溪槕歌》，帮阿拉拿“发黄梅”搭仔“咸酸饭”联系起来：“黄霉（梅）时节雨霏霏，饼饵咸酸可疗饥”。伊进一步解释：“田家始插秧日，以酒肴饷田工，名‘发黄霉（梅）’，乡人唤肴馔曰‘咸酸’”。想想也是对嗰，送去个吃食既不能太简单委屈了干力气活个人，也不宜七大碟八大碗，饭菜合一、荤素兼备个“菜饭”实在是最好选择。否则哪能讲劳动人民个创造力是无穷无尽嗰呢！至于“咸酸饭”里个“酸”字是啥意思，阿拉不妨先看看宋代《新城道中》诗，迭首诗是苏东坡辣杭州做知府个辰光巡游县乡，路浪向看到农民种田个场景以后有感而发，其中尾联：“西崦人家应最乐，煮葵烧笋饷春耕”，葵，指葵菹，就是早期农村里向腌制个酸菜。拿吃勿光个蔬菜腌起来便于存放，一直是古代先人个优良传统。芒种时节青黄不接，翻出去年酱瓮里个酸菜，味重、下饭、管够，正当其用；搿也是为啥上海人经典菜饭要用咸肉、腊肠个原因，搿侪是当年各家雪藏箱底个硬菜！当然，“咸酸”一词也有不同口味个意思，以之形容餐食丰盛、不拘一格，不失为另一重解释。


 总之，可以确定个是：旧时有荤有素、多滋多味个田头快餐，就是风行上海滩个“咸酸饭”前身。