广播专辑 弄堂茄山胡504 天冷了，吃杯老酒祛祛寒

天冷了，吃杯老酒祛祛寒

沈一珠

 大雪已过。古人讲大雪时节分三候：一候鹖鴠不鸣；二候虎始交；三候荔挺出。意思是前五天因天气太冷，寒号鸟也叫勿动了；中间五天因阴气盛极而衰，阳气有所萌动，老虎开始求偶；最后五天兰草“荔挺”会抽出新芽。

 其实，大雪和小雪、雨水、谷雨、小满等节气一样，侪是直接反映降水个节气。大雪节气最常见个就是降温、落雨或落雪。

 辣搿种日脚里向，除脱三两好友烧茶取暖之外，还有一桩事体也是可以用来风雅一记嗰：

 绿蚁新醅酒，红泥小火炉。晚来天欲雪，能饮一杯无？

 搿是白居易写给堂兄刘禹铜个一首小诗《问刘十九》，意思是：阿拉屋里新酿个米酒还呒没过滤，表面还有一层细细交、像蚂蚁一样个泡沫，烫酒用个红泥烧制个小火炉也已经准备好了。今朝夜里向，像煞要落雪，留下来，一道吃杯老酒好口伐？

 齐巧辣一本叫《草木有趣：跟着二十四个节气过日子》个书里，看到自制米酒个方法，摘录到搿搭。有空可以试一试，有人来，共饮；呒没人来，独饮，侪好。

 糯米淘清爽，用电饭煲烧成饭，水量比平常烧饭要少一眼。饭烧好以后，焖脱一歇，盛到一只揩清爽个盆里，200克冷开水，分两三趟加进去，让米饭吃透水，同时可以降温。

 取2克酒曲，压成粉，等糯米饭冷到三四十度勿烫手了，酒曲撒进去，拌匀压平，留一只小洞，盖好盖头。可以摆辣暖热点个房间里，或者拿一条绒毯包包牢。

 过一天一夜，米酒就酿好了，酒香扑鼻，当中个小洞里可以看到清亮个米酒，糯米块也氽起来了。

 米酒本来就从粮食里来，天然就有温寒补虚、补气养血个功效。想想看呀，肚皮饿个辰光，就算一碗白米饭下去，也是斜气养人嗰呀。