广播专辑 弄堂茄山胡502 塌苦菜炒年糕

塌苦菜炒年糕  

沈一珠  

　　碧绿生青塌苦菜，新鲜上市嫩冬笋，切根年糕炒一炒，吃饱肚皮好睏觉。

塌苦菜长得蛮好白相，菜梗细长挺挺刮刮，菜叶圆短卷卷曲曲；好个塌苦菜要塌，菜梗梗带了菜叶要横过来长，层层叠叠塌辣地面浪，有一眼像老底子用红皱纸扎出来个大红花，要铺平了戴；又有点像烫得密密麻麻小卷个头发。所以，上海人有辰光会得迭能开玩笑：哦哟，搿只头哪能烫得像塌苦菜啦！

　　塌苦菜颜色蛮煞克，梗浅白叶深绿，就是吃口有点苦隐隐，而且横炒竖炒总勿容易酥。不过，作为一种冬季时令菜，打过霜个塌苦菜就带一眼甜味道，吃口也稍许软一眼。炒好仔碧绿生青，交关登样。

　　所以，上海人欢喜拿伊炒年糕，配当令、新鲜、掐得出水个冬笋，再切一眼夹精夹肥个肉片。冬笋切片焯焯水，肉片用菱粉黄酒浆一浆；先炒肉片，再炒笋片、塌苦菜，根据自己欢喜放咸淡，最后年糕放下去，等年糕软熟了就好盛起来了。

　　炒年糕油要重，即使从前油配给供应个辰光，炒年糕也勿好省油。所以，一般侪是过年才有得吃。另外，也有讨口彩个意思——祝福新一年向更高方向进步。

　　还有一种讲法，“塌苦”就是“脱苦”，葛末，吃一碗“脱苦菜炒年糕”，来年就可以甜甜蜜蜜，更上一层楼了。

　　【沪语解释】

　　煞克：形容狠狠的、很厉害的，也可形容很过瘾。

　　苦隐隐：有点苦味。

　　登样：形容像样、合适、入眼。

　　焯焯水：放到沸水里略微一煮就捞出来。