广播专辑 弄堂茄山胡503 谈谈买米搿桩事体

谈谈买米搿桩事体


钱红春


 结婚五十多年，屋里买米一直是我包下来个事体。


 老早买米交关简单，家家侪按定量买米，只要拿好粮票或者购粮证，肩浪搭只米袋到粮店付钞票就可以。埃歇辰光店里一般也就两种米：大米搭仔籼米，至于糯米，只有逢年过节才有少


 量供应。所以平时用勿着为买啥个米操心。米个价钿也是常年勿变，买多少米带多少钞票，出门前头就算得清清爽爽，连当时刚刚读书个儿子也会帮我买米。儿子买米，呒没算错钞


 票个烦恼；呒没“揩油”个担忧；更加呒没买错米个顾虑。


 呒没想到本来蛮简单个买米，有段辰光变成一桩让我头疼个事体。屋里附近个店家超市侪有米卖，但大多是规格多，品种多，产地多，品牌多，价钿也勿一样个袋装米，袋里向个米看勿见摸勿着。有趟买仔一小袋进口米，价钱蛮贵，口感还勿及国产米。店里一堆堆花花绿绿，大大小小个袋装米，常常看得我束手无策。买米难，难就难辣品种太多挑花眼。


 大点个超市也有散装米，但品种远远勿及袋装米，再讲拿起来也勿便当，所以我从来勿买。倒是菜场里有勿少米贩子，袋装米，散装米侪有，价钿比超市里便宜，有个摊位买得多了还可以帮侬送到屋里。不过辣菜场买米，勿但需要多长一点心眼，而且有辰光难免上当。缺点秤还算客气嗰，买到“劣米”吃出毛病就损失大了。


 现在粮食生产勿像老早主要追求产量，吃口也越来越讲究。外加现在检测手段越来越先进，市场管理也越来越严格，辣正规商场里，以次充好个现象勿大有了。所以讲，我搿几年买米又变得简单了，走进店里，常常价钿也勿看，拎袋米就到柜台付钞票。就搿能，还经常受到老伴表扬，讲我买个米吃口好。其实现在个米，口感一般侪勿推板，想想蛮好笑嗰。