《沙三少之臨刑》新馬師曾 鐘麗容 附曲詞

撰曲：吳一嘯

沙三少（沙安伯）——新馬師曾

銀姐——鐘麗容

（大笛水底魚，監斬官，二劊子，縣兵以籮抬安伯，“衣斬簽枷鎖”上）

甲差：【口古】三少，你腳軟喇，你都算有咁耐風流有咁耐折墮囉，搞到我哋要揾籮抬你去行刑，你疊埋心水去投胎罷啦，最遲都係等到三聲炮響。

乙差：【口古】三少，你都抵有今日囉，恃住老竇勢力嚟蝦人蝦物，有王法嘅啵，到今日循環果報，等陣午時三刻，你便要刀落人亡。

三少：（重一才慢的的悲咽白）循環果報，刀落人亡！（長嘆一聲）【乙反南音】真個是天有網，我嘅罪無疆，一回懺悔，一斷腸，誰叫我一念貪淫，今日招罪降，萬惡淫為首，我錯戀杏花香，可憐我大好家庭，竟是由我喪，上有慈祥父母，下有賢德妻房，怎料個嬌俏女傭，銀姐引得我情放蕩，記得我幾回挑逗佢，好比粉蝶憐香，嗰陣妾愛郎情，真係冤孽賬，講乜嘢共把風流享。【二王下句】所以我橫刀奪愛，不惜辣手殺害佢夫郎，到今日果報循環，逃不脫恢恢天網。【白欖】想我沙安伯，做人太邋遢，我原本有嬌妻，又何必做成咁鬼賤格，恃住老竇做千總爺，好人唔做學古惑，亞媽佢縱到我出骨，索嘢全靠師爺幫我行策劃，請著亞銀做近身，啱啱又遇著我呢個脂粉客，用盡千方百計去偷情，難怪佢老公心胸狹，淫人妻子笑呵呵，不管果報循環我行暗殺，殺人填命理本該，奉勸世人咪學我沙安伯，原來一舉一動有鬼神知，點知瞞得世人唔呃得菩薩，做人要磊落與光明，千祈唔好學我咁衰格。（催爽）勸句好青年，貪淫就會犯法，小則影響前途，大則將頭殺。船到江心補漏遲，須知所為都要負責。【反線中板下句】我父大義滅親，綁子公堂認罪，佢甘愿毀滅倫常，所謂慈母多敗兒，只曉慣養嬌生，將我縱成咁放蕩，我死不足悲，可憐閨中淑婦，從此為我孀守凄涼。【花】我人將死，懺前非，無奈等候無常帶我離世上。（哭相思介）趕住去死囉

（快沖）（沙母、沙妻捧茶菜上介）

沙母：【喊口歌】唉！安伯啊安伯，仔啊仔啊，我見你引首待刑倍令娘悲愴，仔啊！仲指望你開枝散葉，點估到如此冷酷收場，【悲咽白】家嫂，快啲攞碗魚翅俾佢食啦。

三少：【悲咽白】唉！呢個時候乜嘢都食唔落囉，媽

沙母：【白】唉吔，唔食點得㗎仔，你做飽鬼好過做餓鬼吖嘛，你仲要飲飽食醉，你就乜嘢都冇痛苦喇

三少：【白：】唉！就算龍肝鳳膽，我都唔想食囉，只望亞銀見我最后一面啫，除非叫佢喂我就食喇。

沙妻：【花下句】怨郎至死尤不悟，臨刑尚望一見那禍水紅妝，我為妻子復何言，估不到郎在彌留使我還失望。

沙母：【白】啊，安伯，你想見亞銀啊，好啦！你臨死呢個要求我答應你，好彩佢跟埋一齊嚟唧，亞銀姐。快啲嚟見下三少啦

銀姐：【白】嚟囉，三少

沙母：【白】亞銀，我哋勸極佢都唔食，佢係要你喂㖞。亞銀，你三少最后嘅要求唔通你都忍心拒絕佢咩。

銀姐：【白】好啦！三少，你食咗佢啦【梨花慘淡經風雨】我捧茶湯，但愿你開懷歡暢，強飯還須莫個悲愴，且進佳肴和美釀。

三少：等我拂羹鮑翅飯，食飽臨泉壤。【序白】我都就死囉，仲食嚟做乜鬼吖銀。

銀姐：【白】食啦，多少食啲啦三少。

三少：我今時應受勸，不過食也神迷惘

銀姐：待我敬奉，醇醪，醉后魂歸天上。

三少：【苦笑白】我呢種人，點會魂歸天國啊，只有打落十八層地獄嘅啫。【下西歧】接罷葡萄神已傷，醉后魂歸心也安

銀姐：再奉敬一杯，偷看癡郎自暗傷，盼君你能見諒

三少：往事嘆息孽由自作，我貪色相，我罪大難忘

銀姐：想到前塵我累你個貪花漢，請把往事遺忘

三少：悔我橫強，平添我罪狀，誤己誤人恨未央

銀姐：死別永參商，三杯飲完聽大炮響

劊子：【喝白】時辰到

（眾同哭相思介）（三聲炮響介）（快雁兒落劊子殺三少介）（沙母暈倒介）

（沙妻、銀姐哭相思介）：罷了夫郎、三少。

銀姐：【花下句】默禱孤魂歸極樂，陰陽阻隔恨茫茫。