粤读时光 41 ： 学东西从来都是三分学七分练

粤读时光，看见生命中嘅光。

呢个世界有啲人好叻，

人哋一点就明，

嗰啲人就系叻仔叻女，

但系都有好多天资普通嘅人，

同一个错误硬系要犯好多次先会改正过嚟。

我就系咁样一个人。

所以我自细就有一个印象，

我唔多醒目。

甚至有啲钝。

好彩蠢钝嘅我终于安全长大。

最近我开始得闲，

所以我决定学啲新嘅嘢，

一开始嗰时我觉得学乜嘢都有啲难。

我开始学瑜伽，

但系我发觉我嘅身体好硬，

真系全身都好硬，

点弯都弯唔到落去。

上瑜伽有时会令我好泄气，

身体好硬，

我都冇计。

后来好偶然咁瑜伽老师开始设置有氧操，

配合住音乐跳嚟跳去，

我即刻就好中意呢节课。

因为我发觉自己跟音乐跟得好好。

其他人乱跳嗰时，

我已经可以正确咁跟住节奏跳啦。

后来瑜伽学校仲开咗舞蹈课，

我觉得要试下。

我发现自己嘅动作模仿能力都好好。

虽然我冇学好瑜伽，

但系我发现咗自己嘅优势。

我节奏感好好，

而且学动作学得好快。

我前二十几年完全冇发现自己呢个优点。

我忽然之间明白，

可能我对自己嘅了解真系太少。

但系我又谂咗一下，

其实我节奏感好，

应该唔系天生嘅，

我节奏感好，

其实系因为我喺大学上咗一年嘅健美操课，

因为老师不断训练我哋听节奏，

所以我嘅节奏感先会变好。

啱啱上健美操课嗰时，

其实我啲节奏感都系好差。

动作模仿能力嘅提高估计亦都系因为健美操课。

毕业咁多年。

其实我都冇点练健美操，

我宜家已经一啲都唔记得自己学过嘅健美操啦，

真系一啲都唔记得啦。

估计如果宜家重新翻去上健美操，

我都系要从零学起。

不过原来只要你练过一样嘢，

佢就会喺你嘅身体入面留低痕迹，

例如节奏感，

例如模仿能力。

我听讲学习嘅过程，

就系系脑入面建立一啲连接，

而呢啲连接一旦建立起身，

就好难好难先会消失。

所以就算我已经忘记晒所有学过嘅嘢，

但系通过学习健美操而建立起身嘅连接并冇消失。

当我重新再学一样或者类似嘅嘢嗰时，

呢个曾经嘅连接就会听到呼唤，

即刻帮我快速学识呢样嘢。

我一直一直都冇发觉呢个道理。

如果你学识咗一样嘢，

呢样嘢就会伴随你终身，

有时佢会喺不知不觉间帮你快速学识其他嘢。

可能我真系一个钝感嘅人，

好多大道理有啲人细细个就明白，

而我就硬系就经历好多嘢，

犯好多错先会明白，

不过我觉得还OK啦，

迟啲明好过一世都唔明。

我已经接纳咗呢个钝钝嘅自己。

咁系唔系一学习一样嘢，

你就即可可以建立起呢种能力嘅连接？

绝对唔系。

学识一样嘢同喺脑袋建立连接其实系同一件事嘅两个唔同嘅层次，

学识只系需要你明白同操作，

但系如果要建立连接，

其实需要大量重复嘅训练。

意思系学识跳一只舞，

只系需要你记住动作同埋控制身体，

但系要建立连接，

就需要你对呢只舞高度熟悉，

熟悉到音乐一响起，

你就已经知道动作系乜野，

甚至第一个动作仲未完成，

你已经知道下一个动作系乜嘢。

唯有喺呢种程度，

你先可以喺脑袋建立起一个非常好嘅连接。

我之前都讲过一个过度学习嘅理论，

宜家嚟重复吓，

所谓过度学习，

指嘅就系，

你感觉自己学识咗一样嘢之后，

要再练习一下，

呢种练习并唔系多余嘅，

而系可以加强学习嘅印象，

达到一种更加好嘅学习效果。

细个嗰时，

其实我都听过老师讲学习理论，

不过好可惜，

嗰时嘅我根本就听唔明，

我以前应该一直就系喺一种糊涂嘅状态下读书嘅，

亦都唔知道乜嘢读书方法。

我宜家先特别感触人同人嘅感悟力差距真系好大，

一个人明白道理越早，

其实真系可以行少好多弯路。

最近我决定继续发掘自己嘅能力，

所以我又开始学新嘅嘢，

开始嗰时真系觉得好难好难，

乜都难。

不过我有个优点，

就系乜嘢都唔会轻易放弃，

我继续坚持，

而且我仲发觉，

学嘢真系要揾方法，

只要揾到适合自己嘅方法，

学嘢就会学得快好多。

唉，其实细细个就已经听过呢句话，

不过当时仲系体会唔到。

人可能真系有一个开悟嘅过程。

例如我学钢琴，

我想学琴已经好耐，

计起身应该有超过十年时间，

但系真系可以好好学，

应该就系呢两年。

我尝试过好多方法，

但系都系学唔落嚟。

两年前我嘅读谱能力几乎为0，

每一次睇谱，

我都要靠数，

后来数到我直接放弃。

会出现呢个问题嘅原因，

其实系我眼高手低，

我明知自己读谱能力差，

但系又睇唔上嗰啲简单嘅谱，

啱啱睇识简单嘅谱，

就急住想学难嘅谱，

点都冇办法将一本书从头到尾弹完。

一年前我识咗个朋友，

佢同我讲清楚咗呢件事，

想练好听嘅歌，

必须要从简单嘅歌开始，

等我可以谈好简单嘅歌，

自然难嘅歌都会学识。

所以我就乖乖咁开始学小星星之类嘅歌。

呢种循序渐进嘅方法其实真系有效嘅，

几个月之后我真系慢慢学识睇谱。

不过我并冇达到熟练嘅水平。

学琴嘅转折点系我开始使用一个学琴嘅软件，

因为呢个软件，

我练习嘅时间长咗好多，

我以前只系会练二十分钟左右，

宜家我可以每日练一个钟左右，

而且呢个软件有个打分嘅制度，

为咗罗到最高分，

我就会不停练同一首歌，

就系因为我不停咁练同一首歌，

所以我对音符嘅熟悉程度先得到咗大幅度嘅提高。

宜家我一睇到音符就知道呢个系乜嘢音符，

再都唔使数五线谱。

就系喺练钢琴嘅过程中，

我明白咗刻意练习、过度学习理论。

有一个成语叫醍醐灌顶，

我练钢琴嗰时就有呢种感觉。

如果你想学识一样嘢，

但系你觉得自己学得唔好，

问题好可能系你重复嘅次数唔够多。

正所谓三分学，七分练，

千奇唔好以为自己明白点样做就够，

其实系完全唔够，

必须要练习。

上个星期我又报咗一个真正嘅舞蹈班，

我好感兴趣，

而且我都想挑战自己。

一上课我就知道我跟唔上，

动作好复杂，

音乐节奏唔明显，

但系我唔服输，

我觉得自己翻屋企继续练，

一开始我都完全唔知点练，

我冇舞蹈镜，

冇舞蹈老师，

但系我认真咁谂咗下，

我有投影仪，

我有个大窗，

哈哈，就咁样我就自己喺屋企搭建咗一个小小嘅舞蹈室啦。

我上网揾咗舞蹈分解视频，

一次又一次咁重复，

我感觉自己跳得一次熟过一次。

我忽然之间感慨，

学习就系咁样，

揾方法，

然后不断重复，

就算系天资愚钝，

只要肯练习，

一定会学识。

粤读时光，看见生命中嘅光。