广播专辑 经典上海闲话117 上海闲话里向个工业元素

上海闲话里向个工业元素  
 
　　文 / 周钰栋
　　有“十里洋场”之称个上海也是一座历史悠久个工业城市，所以辣辣上海闲话里难免就多了一份工业元素。下面就是一些例子。

　　抛锚，本义是讲轮船停泊个辰光需要拿铁锚抛到水里向，拿轮船固定好；后来也指汽车出故障，开勿动了。但是，假使对某人讲“做生活勿要抛锚啊。”意思是讲，工作辰光要加油做，勿要停下来。

　　铆牢，本义是指用铆钉来拼接固定两个独立构件，引申到生活里可以指用眼睛来“盯”。比如，便衣警察发现目标可以讲：“目标已铆牢”。还比如，辣辣工作当中出了差错，拨人家发觉，就会讲：“我拨伊拉铆牢了。”

　　绞绞紧，“绞”是个动词，辣辣上海闲话里向是指“拧螺丝个动作”。引申到生活里就有“严格督促”个意思了。比如有个小囡读书成绩勿理想，家长会对老师讲：“一定要拿伊绞绞紧。”

　　上发条，“发条”是机械钟表里个零件，起储存动力个作用。“上”勒辣搿搭是指“拧”，是个动词，“上发条”就是要拿钟表发条拧紧，引申到生活中有“提醒、督促”个意思，与“绞绞紧”用法相似。

　　车车伊，“车”本义是指工厂里用车床加工零件，有“加工”个意思。用到生活里，一种意思是“开玩笑捉弄”，比如，“伊今朝有点鲜格格，我去车车伊。”还有一种用法是指略有“挑衅”个行为，比如，“侬再去车车伊，看伊嘴巴还老得出口伐。”“侬想车我？差得远口来。”

　　八级钳工，“八级”是钳工当中最高个技术级别，用到生活里就带有贬义了，专门指技术高超个小偷，“钳”辣辣搿搭是指小偷用两根手指头朝人家个衣裳袋袋里钳皮夹子。

　　开无轨电车，本义用不着多说，用在生活里是指讲话瞎七搭八，呒没主题。

　　刹车，辣辣生活里有“到此为止”个意思。比如，两个人吵架，旁边人出面阻止：“好勒，大家刹车。”比如某人讲话让人反感，于是有人就会对伊讲：“侬好刹车了。”

　　调频道，“调”是选择个意思，本义是选择电视频道，用了生活里就跟“讲闲话”联系起来。假如有人提醒：“快点调频道”，意思就是换一个话题。

　　拉线开关，本来是指一种靠绝缘蜡线拉动来控制个电灯开关，后来引申为比喻某人听别人摆布和控制、讲话呒没主见。比如，“伊就是一只拉线开关，人家叫伊讲啥，伊就讲啥；人家叫伊停，伊就刹车。”

　　开关坏脱了，是专门指一些人讲话滔滔不绝，呒没节制。即使听个人已经厌烦了，伊还呒没觉着，照讲勿误。

　　压马路，原来是讲修马路个辰光要用压路车来拿马路压平。后来引申为恋人谈恋爱荡马路。比如，“昨日夜里，侬又郜女朋友压马路去啦。”搿种荡马路谈恋爱个方式，有辰光上海人还叫“数电线木头”。

　　烫平，本义是指裁缝师傅做好衣裳后要用熨斗拿衣裳烫平，烫挺括。用到生活里就有“解决、摆平”个意思。

　　模子，本义是铸造厂翻砂车间里需要做出用铁水浇铸零件的模具。引用到生活里是指有水平，有才能个人。不过，假使“模子”搭上“打桩”，成了“打桩模子”，就变成指那些让人讨厌个“黄牛”。

　　绣花，迭个词个本义蛮清爽，用到日常里就有点勿大好听，是批评工作磨磨蹭蹭。比如：侬勒辣绣花啊，迭眼生活就做了半天！

　　劈硬柴，就是上海人讲个劈柴。后来演化成大家侪晓得个AA制。

　　其实还有交关类似词语，比如:翘辫子、拗造型等等侪是如此。搿就应了一句老话：一方水土养一方人。