广播专辑 经典上海闲话115 寻吼势、扳差头、装榫头

寻吼势、扳差头、装榫头

　　文图/阿仁

　　上海人吵相骂个事体现在是越来越少见了。老底仔大家住得局促，一幢三上三下个房子里要住五、六家甚至十几家人家。一只屋檐下要轧进七十二家房客，碰碰擦擦难免。一旦擦枪走火，吵相骂还会升级为打相打。一到大热天，大家火气大，弄堂里可以讲是大吵三六九，小吵天天有。寻相骂个开场白总归是搿样子几句上海闲话：“侬寻吼势是？阿拉奉陪！”“扳点啥个差头？啥人怕侬！”寻吼势要翻译成普通话，是寻衅，是故意来找别人家岔子。上海闲话是把吵架讲成为寻相骂，还是很生动形象个。一个“寻”字就点出了双方有备而来，勿大战几十回合就勿爽快、勿罢休个。扳差头也一样，是勾画出有一方是主动出击个，是有心要来兴师问罪个。扳差头个最高级别，上海人比喻为“象牙筷上扳皵丝”。皵丝，皵个读音与雀相近。因此也有就写成为雀丝个。反正大家认得就可以了。辣平常和平个生活中，扳差头也可以指追求过于个完美，非十全十美勿可。“搿篇文稿写得还勿错个。就是标点符号还点得勿哪能规范，重新再来一份！”“意思都讲清楚了。几只标点符号一点勿搭介个。侬真是扳差头，有空！”欢喜扳扳人家差头个朋友常常是少干事、勿干事个。勿做勿错。多做多错。也是生活中个常规哲理。

　　比寻吼势和扳差头更加辣手个是装榫头。榫，是指器具以凹凸相对连接部位中凸出那一头。榫头对榫眼，一拍即合了。上海闲话里个装榫头，是一方设下计谋，设下借口来让别人上当，请君入瓮。往往是无中生有，以莫须有个事体来上纲上线、栽赃寻衅。榫字，平常写得少、见得少。读音与笋同音。装榫头，是上海人当中有了点年纪与阅历个人还会讲讲用用个。要是80后、90后个小上海人还勿一定会听得懂听得明白个。设计来装榫头个脚色放到戏剧大舞台上去，葛一定是白鼻头个二花腔，是小丑个角色。周围朋友中要有欢喜寻吼势个，热衷扳差头个，常常使一手来装榫头个，葛末侬太触霉头了。快点调转枪头，搭搿样子个朋友拜拜。惹勿起，迓得起。晏歇会。

　　上海闲话里有交交关关个闲话已经变得活动性勿强、生命力消沉了。与寻吼势、扳差头、装榫头雷同个搿样一些上海闲话连回光返照个机会也少了。以此来观察，上海滩上个文明进步是老大老大个。是？