[申情申音]大上海搿几条小马路，哪能就“与世无争”了！

《大上海搿几条小马路，哪能就“与世无争”了！》

作者：马尚龙

改编：麦小姐

朗读：唐厂长

[上海话改编]

    经常听到有搿能一种讲法，“南京路是全国人民个南京路，淮海路是上海人民个淮海路。”搿句言话勿是呒没道理个。隐含辣搿种现象里个潜台词是，虽然搿两条马路侪是上海个特色地标，但高头个人脱房子个文化、情趣、气质，却是有明显差异个。

    实际浪向，还有一些路，勿仅勿属于全国人民，就连得上海人自家也交关陌生，伊拉只属于住辣海埃搭个人。搿些小马路有几个共同个特点，虽然位于市中心，地段好，名气响，勿长勿阔，店面也勿多，但老早人家荡马路，是勿大会得荡到埃面去个。不过好像也就是最近几年，伊拉个神秘面纱突然拨撩开了，一夜之间，成为了上海四季皆宜个景观，成为了时尚生活个热地，成为了慢节奏“扫街”个去处，甚至也成为了各类“网红”个聚集地脱落脚点。

    伊拉是：武康路、湖南路、永福路、东平路、延庆路等等等等，大概有二三十条搿样子个小马路。

    网浪向有篇写湖南路个文章，辣形容伊个辰光，用到了“与世无争”搿只词语。我顺牢埃篇文章读下去，作者是搿能写个：“有人讲，湖南路是邪气低调个，一点也勿张扬，而铁门紧锁个深墙大院，又为搿条宁静个马路，增添了老多神秘个光环，让人觉着有些敬畏与难以接近。”

    直到读完搿篇文章，我仍旧呒没从伊里向读出一眼眼湖南路个“与世无争”，可能作者是拿搿条马路个静谧安宁误解成了“与世无争”。或者更加准确点讲，湖南路并勿是与“世”无争，而是与“市井”无争。辣蛮长个一段辰光里，小老百姓是呒没啥个理由去湖南路个，因为此地既呒没啥个店家，又勿大会有自家个亲眷。

    假使硬劲要拿类似湖南路搿样子个小马路脱“与世无争”拉上关系，葛末，大概也可以迭能理解：山勿在高，水勿在深，路勿在长，楼勿在显。

    搿些小马路到底“小”到啥个程度？名气又“大”到啥个程度呢？有一日，我迭为做了一道人文地理个题目----最短个是永福路，只有317米；最长个是武康路，总共1183米。就拿湖南路来讲，搿条马路是1918年到1921年修建个，原来叫朱尔典路，后来拨周佛海改称“湖南路”。1943年，“法租界”退出上海个历史舞台，周佛海辣搿年买下了锦隆别墅，因为伊祖籍湖南，就拿新宅子改名为“湖南别墅”，乃末房子前头迭条朱尔典路，也就跟了一道，变成功“湖南路”了。

    我看到过一张解放军接管湖南别墅以后个照片，是1949年个热天色，邓小平搭仔陈毅两家人家个合影，邓家5个，陈家4个，卓琳帮张茜也辣辣，大大小小一共9个人。搿张照片是辣湖南别墅楼前个草坪浪向拍个。埃歇辰光，邓小平脱陈毅就住辣湖南别墅，外加是楼上楼下个邻居。此地个性质，是“上海市委小招待所”，当时邓小平个身份是中共中央华东局第一书记；陈毅个身份，是第三书记、上海市市长。

    脱上海搿座城市个命运走向紧密相连个“神经脉络”，就是从湖南别墅出发，然后悄无声息个向全上海延伸。

    十几年以后个1962年，另外一位重要人物低调个住进了湖南别墅，伊就是贺子珍。1950年，41岁个贺子珍接受组织安排来到上海，担任过虹口区组织部部长，先后辣四川路脱泰安路住过。伊是辣湖南别墅蹲了最长个一位“主人”，也是最低调个一位“主人”，直到1984年病逝，享年75岁。

    辣湖南路旁边还有一条小马路。电影《色戒》里，汤唯扮演个王佳芝最后一句台词是伊对黄包车夫讲：“到福开森路去。”电影当中个人物住辣福开森路，就是现在个武康路。虽然埃句“到福开森路去”可能是编剧虚构个，但搿倒是符合历史真实个，因为当年个福开森路，也就是后来个武康路，是上海西区高档生活个典型。直到现在，武康路仍旧“勿声勿响”个展示着伊个人文、地理、建筑以及审美个品格。拿秋天个梧桐树叶作为美景保留下来，就是从武康路开始个。每逢深秋，走辣搿些相通相连个小马路浪向，抬头，听风吹叶响；低头，看满地金黄，气度沉稳，浪漫如画，构成了一组上海特有个“海派秋意图”。

    乃末，搿些原本“属性高冷”个小马路越来越拨大家所熟悉，一记头就闹猛了起来了。老有劲个是，辣搿几条地铁脱公交车侪勿通个小马路浪向，集中了各式各样个“网红店”，像冰淇淋店咾、法式面包店咾啥。虽然埃爿面包房后来拨工商取缔脱了，但伊一度个高人气也已经成为了事实。葛末，为啥搿排所谓个“网红店”会辣原本冷僻个小马路高头红起来呢？因为啊，正是搿些马路背后充满历史感个故事，经过时间个沉淀与发酵，形成了伊自家独特个格调。而搿种既复古又时髦个格调，勿但滋养了“人气商家”个品味，同样，也滋养了梧桐落叶个风情。

    搿样子个小马路，侬还能够随便讲伊拉是“与世无争”[口伐]？

    虽然伊拉常常“沉默是金”，但只要一发声音，往往就是一鸣惊人个。

    湖南路105号，建于1931年。此地曾经是民国元老张静江个阿侄、中国古钱大王张叔驯个旧居。1957年上海交响乐团迁入，直到2014年，上交迁往复兴中路1380号，并有了一只集俏皮、市井、艺术三者合一个名字----叫做“馄饨皮”。我敢讲，也只有像上海搿能个城市，只有像复兴中路搿能个氛围，再会得脱堂堂个交响乐团起迭能一只既接地气，又饱含了海派文化底蕴个别名。搿勿是啥个花名绰号，而是一只雅号，就好比传统文人有名也有字一样。

    还有一处“声响”，来自湖南路8号，是赵丹个旧居。此地原来个主人，是中国纺织业大亨吴中一。赵丹曾经辣上海交关地方侪住过。1962年，伊需要接待一批日本同行，上海电影局领导考虑到伊原本个住个地方勿大便当，就拿湖南路高头个搿幢楼房分配拨伊了。赵丹辣搿搭一住就是16年，直到住进了医院。顺便讲一句，六十年代，像赵丹搿能个明星“狠”也是蛮“狠”个，侬看呀，为了接待外宾个需要，还可以分到一套房子唻。

    有朋友问，为啥搿些马路介短介狭，公交车末开勿过，连得上街沿也只好并排走两个人，多一个人都要分前后头了？我讲，因为搿点小马路当年多数侪是围牢小洋房大别墅修个，人家少，葛末当然就勿需要弄得来像人民广场个人民大道搿能阔了，埃搭可以并排跑48个人唻；再讲了，当年此地住个侪是有铜钿人家，进出勿是小汽车就是黄包车，马路筑了再阔也是浪费。搿些“血脉联动”个小马路，假使拿伊拉看成功是小洋房大别墅之间个大社区个通道，或许会更加形象一点。搿只大社区是目前个景观，也是历史个传奇，伊有一个上海特有个别号，叫“上只角”。