[申情申音]小辰光吃黄浦江大闸蟹

《小辰光吃黄浦江大闸蟹》

作者：朱少伟

改编：麦小姐

朗读：唐厂长

根据媒体报道，经过有关部门脱科研机构个联合攻关，松江个青背、白脐、金爪、黄毛个黄浦江大闸蟹，搿两年又“重出江湖”。听到迭个好消息，我回想起自家几十年前头吃黄浦江大闸蟹个有劲事体。

辣读小学个辰光，礼拜六下半天放学放得早，我就会到南码头去孛相。因为埃面搭有一爿蛮大个木材加工厂，车间背后个黄浦江边一直漂辣盖交关木排，沿牢木排可以跑到老外头个位置，去欣赏水里向游个鱼。有一趟，我迎了冷嗖嗖个秋风踏上木排，看到我个老朋友刘伯伯立辣前头，伊是我个隔壁邻舍，平常主要靠用“扳罾”辣黄浦江里捉鱼捉蟹过日脚。“扳罾”搿种“老法”渔具用起来其实是蛮便当个：靠扎成“十”字形状个两根竹片撑开尼龙网个四只角，当中用线荡一眼鱼食，再缚牢一根用来控制个长竹头。刘伯伯捏紧长竹头，眼睛盯牢水里向，隔脱一歇，就拨尼龙网拉上来，拿里向头个物事收脱。

我跑过去寻伊茄山河:“喔哟，是黄浦江大闸蟹嘛，侬已经捉仔勿少唻！”伊回答我：“搿又呒啥稀奇个。我年轻个辰光常庄去松江，辣埃面搭捉着个黄浦江大闸蟹特别好吃，因为黄浦江上游个水质更加好。”伊晓得我有兴趣，就拿根长竹头传过来，脱我讲:“尼龙网里向有物事了，侬来试试看!”我搓了搓手，立稳双脚，捏紧长竹头拼命一拉，尼龙网露出水面，有两只黄浦江大闸蟹辣里向爬，像啥要对自家个落网提出“强烈抗议”。我开心得来穷拍手。接下来，阿拉两家头轮流控制“扳罾”，到黄昏头里已经捉着廿几只蟹，还有鱼咾、虾咾。

刘伯伯拉我到伊拉屋里去孛相。刘家嫲嫲马上拿点蟹汏汏清爽，放辣镬子里去煠。等蟹煠得“红光满面”了，伊还拣出来了几只顶大个拨我吃。我剥开一只蟹盖，里向个蟹黄交关多，覅忒㜺噢！刘伯伯平常欢喜看民间个逸闻趣事，乃末伊绍兴酒渳渳，帮阿拉介绍起老早上海人个一种“发明”：“清朝秦荣光个《上海县竹枝词》注释里向提到，‘螯内有片壳，白而透明，雄者较大。两片相合，粘 贴墙上，俗呼蟹蝴蝶’。”伊还用一只蟹来做示范：扳开两只大蟹螯，剔光肉，拿出一对白色透明个片壳，伊拉是对称个，摆到台面浪向，真像是一只漂亮个蝴蝶。我开心煞了，拿这只“蟹蝴蝶”夹辣课本里向。齐巧搿歇，我个阿奶寻得来了，刘家嫲嫲交关客气，硬劲拉伊坐下来一道尝尝黄浦江大闸蟹，乃末大家坐辣客堂间里向讲讲吃吃，笑声勿断。