[申情申音]老上海个菊展

《老上海个中秋》

作者 朱少伟

改编 张林龙

朗读 麦小姐

    农历八月十五，是我伲传统个中秋佳节。辣辣老上海，伊也叫做“八月半”，搿日大家除脱吃月饼、欱桂花酒咾啥，还有勿少别个风俗。

    张春华个《沪城岁时衢歌》里向讲：“月盈良夜坐凭楼，无限明辉霁远眸。庭院开尊延赏处，二分秋色到中秋。”搿反映出老上海“斋月宫”（也就是“祭月”）个情景：月亮升起来个辰光，辣辣露天摆张台子，上头供月饼、瓜果咾啥，随着香烟飘逸，妇女先拜，男人后拜（也可以勿拜，因为月亮代表阴柔）；接下来，就一家门吃顿团圆饭，真是邪气开心。“斋月宫”虽然具有祭祀个性质，但呒没规定个复杂礼节脱仔考究供品，勿需要弄得严肃来死，可以比较随意。

    《上海县志》里向有“‘八月半’，又为芋艿生日、毛豆生日”个讲法。辣辣老底仔，“毛豆荚烤芋艿”是大家过中秋必备个，所选个毛豆脱仔芋艿，侪是上海郊区个特产。本地个“红梗芋艿”，根部稍微带一眼粉红，煠了勿会糊涾涾，香糯爽口；本地个“牛踏扁”（因豆子个形状像拨牛踏过一样扁平肥大而得名），荚又长又宽，一煠就酥，有点甜津津个，拿搿两样物事摆辣辣一只镬子里向煠熟剥了吃，实在是别有一番风味。根据研究，搿种岁时风俗食品，是有美好含意个：毛豆荚里向排列好几粒豆子，象征了兄弟姐妹个团结；芋艿是用球茎繁殖个植物，绝对是“母子相依”，交关子芋侪附生辣辣母芋个周围，象征了阖家团圆。

    李行南个《申江竹枝词》咏赞过“沪城八景”，里向有“石梁夜月”：“桂尊环饼答秋光，处处氤氲朝斗香；结伴良宵出城去，陆家桥上月如霜。”“陆家桥”就是陆家石桥，又叫做“万云桥”或者“学士桥”，横跨靠近黄浦滩个小东门外方浜（就是今朝黄浦区个东门路），是明代弘治年间，进士陆深捐钞票建造个；桥身高廿四级，有环洞三只，中秋个夜里向，月影斜穿环洞投射到水面高头，被叫做“串月”，搿搭也成为了一处观赏风景个胜地。老上海流行中秋“踏月”（也叫做“走月亮”），王韬个《瀛壖杂志》里向讲：“夜间妇女盛妆出游，互相往还，或随喜园亭，人静更阑，犹婆娑月下，谓之‘踏月’”；周兆鱼个《潜溪杂咏》里向讲：“芋魁大豆瓣香烧，玩月相邀夜漏分。走过三桥风露重，凉痕怕涴藉丝裙。”夜空晴朗，精心打扮过个妇女们一道出门，迎着染桂花香个秋风默默向月亮女神倾诉心愿；伊拉侪要走过勿同个三顶桥，最后往往来到陆家石桥，虽然长裙已经拨秋露弄湿，但仍旧兴致勃勃观赏圆月个倒影，搿真是有诗意啊！

    由于时代个变迁，中秋“斋月宫”脱仔“踏月”个风俗已经辣辣上海消失了，不过，吃“毛豆荚烤芋艿”个习惯却延续了下来。