《我个运道》丨诵读者：周恋云

我个运道

来源：李大伟随笔

作者：李大伟

改写：周红缨

讲述：周恋云

我勿大相信中医，但，是我一直看勿好个毛病却是中医看好个。

37岁前后，一到夜里向，我个后背就痛得勿得了，即使拿大枕头叠起来垫勒海也呒没办法睏觉，跑仔三家医院，侪没效果。一位朋友讲：侬个毛病，搭我阿弟个毛病老像个，仁济医院有一位名医，叫鲍春德，要么去看看看。

鲍医生低仔头听我讲，一句闲话也没讲，最后要我仰天睏勒床浪向，两根手节头抵压骶骨，问我：痛伐？我讲：痛个。伊判断：强直性脊柱炎。我一记头觉着五雷轰顶，我晓得作家陈村是迭个毛病；周杰伦也是迭个毛病。搿种毛病个概率是十万分之一，但是老难治得好个；但是，让我可以自我安慰个是，据说生迭个毛病个大多数是敏感体质，所以多数是聪明人。我身边就有三位，果然个个聪明。冒了巨大个痛苦，我总算也混进了聪明人个行列，但是我勿聪明啊，却去背上了聪明人个痛，彻夜难眠。

好医生就是好医生，搭我开了几帖药，邪气有用场，天天吃，腰椎腰背就勿痛了，只不过是隐隐叫还有点僵、硬：坚持吃药！得意勿忘形。假使一日天忘记脱吃，头颈就僵硬，转头牵引转身；两日天没吃，背部就僵硬，三日天勿吃，后脊梁骨痛，旧病复发。

药邪气便宜，以至于药店每趟侪要通过区医药公司经理调拨。后来我勒报纸浪看到一则中缝广告，黄兴路有家诊所，专门治疗类风湿搭仔强直性脊柱炎，其他人勿相信，我照广告地址一家头去了。一个疗程廿次，勒我病床旁边个一个病友，做到第十七次，还是呒没啥感觉，决定勿做了，我讲：还有三次，咬咬牙齿，做好全套再来验证。我做好18次，绷紧个后背松弛了，到了最后一次，僵硬个感觉呒没了，但我勿敢轻信，仍旧吃鲍医生个药，常怕复发。有次到日本去，我跟仔北大王新生教授引领个文化旅行了17天，到了日本再发觉药没带，马上打电话请夫人帮我邮寄过来，但是勿好寄。十七天哪能办呢？咬咬牙齿挺咾，实在挺勿牢就半当中回去伐！想勿到安然个度过了17天。原来，我个强直性脊柱炎就迭能好了，直到现在，廿几年过去了，我腰板活络个走勒马路浪。

我读中学个辰光有得严重个鼻炎，每人天擤鼻涕，一管一管个，掼得来满地黏搭搭个。后来得到一只偏方：冬天冷水汏面孔，然后用两只节头去搓鼻头个两侧，反复多次，据说可以激活微血管，最后迎仔冷风跑，我当时勒读大学，一个寒假没转去，天天坚持，一记头就侪好了。啥个叫治愈？勿知勿觉，神勿知鬼勿觉，突然回过头来，发现症状已经老长辰光呒没出现过了。

鼻炎，也属于过敏性体质，据说多数侪是聪明人。缺啥想啥，我勿聪明，却一辈子想要聪明，结果伊眼聪明个副作用却落勒我个身浪向。开心个是，最后侪拨中医去除了，搿是大于万里挑一个小概率事件，不幸中个大幸。

前几年体检查，我查出肺气肿，到现在居然一点也勿喘，毫无感觉，肺科医院个主任杨文兰医生讲：侬可能做过重体力生活，或者是搞过体育个。因为我戆，凡事亲力亲为，哼哧哼哧戆做，结果练成功一副打老虎个身胚，居然勿受肺气肿个煎熬，搿也是我个幸运，原来戆大真个有戆福个。

勿聪明也蛮好个，就像呒没钞票，小偷勿牵记，债主也勿肯放债，结果无债一身轻，万岁老百姓。